Read lango 1 Obakki 19 Bible Online

1 Obakki 19 - lango bible

1 Obakki 19

¹Abaka Akab te titti dako mere Jejebel ginnoro luŋ ame Elia otimo, kede kite ame en oneko kede odwarpiny a Baal luŋ.

²Jejebel te cwayo kwena baŋ Elia kun kobbe ni, “Obaŋawa myero mi ginnoro timere i koma, ka ce diki i kodi caa-ni onwoŋo mom aneki kite ame yin ineko kede odwarpiny.”

³Lworo omako Elia te miyo en riŋo oko pi laro kwo mere; en oya karacel kede omiro mere, te wot oko i Beerceba i Juda. En te weko amiro mere kuno,

⁴ento en te woto wot me nino acel luŋ, kun woto kene i tim kede tyene. En te wot bedo i te yattoro, te tamo ni kono doŋ eto oko. En te kwayo Rwot ni, “Man doŋ romo! Tim ber Ama Rwot, ikwany doŋ kwona tin oko; pien an giire mom aber ame akato kwarina!”

⁵Elia te buto piny nino oko i te yattono. Oyotoyot amalaika a Rwot te ru mule kun kobbe ni, “Ya malo me icem.”

⁶Kare ame en otiŋo waŋe tuŋŋi i tuŋŋi oneno capat ame otedo i wi kidi alyet, kede opoko pii tye tuŋ wie. En te cem, te daŋ mato pii-nono, eka te dok buto piny.

⁷Amalaika a Rwot te dok dwogo baŋe tyen me aryo, te dok mule, kun kobbe ni, “Elia we, ya malo me icem, pien wot bino loyi oko.”

⁸Elia dok te ya malo, te cem, te daŋ mato pii; cammono te medde teko ame te miye woto wot me nino pyeraŋwen, kun woto dyeceŋ kede dyewor, naka i Koreb ame en kidi Obaŋa.

⁹I kare ame en doŋ otuno oko kuno, en odonyo i gorogoro, te wot bedo kuno. Oyotoyot Rwot te kobbe ni, “Yin itimo ŋo kan?”

¹⁰En te gamo ni, “Nyeko en ame obedo maka piri, Ama Rwot Obaŋa me mony, pien kare luŋ an abedo woro yin keken, cite jo Icrael oturo cikeregi kedi oko, omumuko keno lam me yali-gu oko, oneko daŋ odwarpiny-nyi oko; an kena a pwod adoŋ, daŋ omito neka-gu oko.”

¹¹Cite Rwot te kobbe ni, “Wot i wi kidi malo iwot icuŋ i nyima kuno.” Rwot te cako beo i ŋete kuno, te miyo yamo kodo atek meicel, yamo-nono oyeyeŋo kidi dok omio gweŋe obabara atitino, cite Rwot ikome onwoŋo gire mom i yamo-nono. Kare ame yamo oliŋ, oyeyeŋ te cako yeŋo piny, cite Rwot gire onwoŋo mom tye iyi oyeŋonono.

¹²Kare ame oyeŋo oliŋ, mac dok te cakere agwa, cite Rwot gire onwoŋo mom tye i maccono. A doŋ mac oto oko, dwonnoro te winyere atitidi.

¹³Kare ame Elia owinyo dwonnono owumo waŋe oko kede boŋo mere, te wot cuŋ i dog gorogoro. Dwonnono te kobbe ni, “Elia we, kara yin itimo ŋo kan?”

¹⁴En te gamo ni, “Nyeko en ame obedo maka piri, Ama Rwot Obaŋa me mony, pien kare luŋ an abedo wori yin keken, cite jo Icrael oturo cikeregi oko kedi, omumuko keno lam me yali-gu oko, oneko odwarpinnyi-gu oko; an kena a pwod adoŋ, daŋ omito neka-gu oko.”

¹⁵Rwot te kobbi Elia ni, “Dok cen kun ilubo yo tim. Dok cen i wot i tim ame tye i ŋet Damaciko; ka ituno kuno, wot i boma, iwot iwir Kajael i moo me bedo abaka me Curia.

¹⁶Wot i wir daŋ Yeko wot a Nimci me bedo abaka me Icrael. Wot i wir daŋ Erica wot a Capat, ame en dano me Abel-mekola, me leyo kakari acalo adwarpiny.

¹⁷Pien dano ame bino bwot ame mom Kajael oneko i pala lweny, Yeko en ame bino neko; aco ŋat ame dok bino bwot ame Yeko mom oneko, Erica en ame bino neko.

¹⁸Cite pwod abino weko jo tutumia abiro doŋ iyi Icrael, jo ame mom ru orumo coŋgi i nyim Baal, dok doggi daŋ mom ru ono to lem Baal.”

¹⁹Elia te cako ya oko i kuno, te wot nwoŋo Erica wot a Capat kun tye apur i kweri dyaŋ apar wie aryo; kun jo tye i kweri acel acel, ame gin luŋ otye opur i nyime, en onwoŋo tye apur i kweri me agikki. Elia te wot i ŋete, te kwanyo boŋo mere i kome, te bolo i kom Erica.

²⁰Erica te ya weko twoni ame onwoŋo etye epur kedgi oko, te mwomere i ŋwec i yo Elia, kun kobo ni, “Koŋ iwek awot acik pappa kede totta, me ate bino wot kedi.” Elia te gamo ru, “Yin dok giri cen, kara ŋo ame atimo i komi?”

²¹Erica te dok cen wot gonyo twoni mere aryo oko; en te tedo kun tedo i lodi ŋutgi me yen. En te poko riŋo mere-nono baŋ jo, eka gin te camo. En doŋ te lubo yo Elia, kun tio baŋe acalo ŋat ame konye.