Read lango 1 Obakki 2 Bible Online

1 Obakki 2 - lango bible

1 Obakki 2

¹Kare ame abaka Daudi doŋ ceggi to, ociko wode Culeman kun kobbe ni,

²“An doŋ aceggi wot i wot ame jo luŋ i wi lobo woto kede. Yin myero icuŋ atek acalo ico.

³Gwok gin a Rwot Obaŋani ociko, kun ilubo gin a en mito, igwoko icwillere, cikkere, kede gin ame en ociko, kede kop ame en okobo luŋ, kite ame ocoo kede i buk cik a Muca, me ibed aber i jami ducu ame itio, i kabedo ducu ame ibino wot iye.

⁴Ka ce itimo mannono, Rwot bino gwoko gin ame rik eciko baŋa, kun kobo ni, ‘Ka ce ikwai bino bedo jo a kitegi beco, kun ogenne i tiyo gin ame an amito i cunygi ducu kede tipogi luŋ, aloc me Icrael bino ya i komgi nakanaka.’

⁵“Yin iŋeo aber gin ame rik Yoab wot a Jeruya otimo i koma, gin ame en otimo i kom otel wi mony a jo Icrael aryo, Abuneri wot a Neri kede Amaca wot a Jeter. Yin ipo kite ame en rik obin onekogi kede i kare me kuc, me culo kwor me remo a jo a gin oneko i kare me lweny. En rik oneko jo a mom i bal, ame en te miyo bal me remo a jo-nono guda.

⁶Pi mannono ba, yin doŋ myero iti i kome kede ryekoni, cite myero kur iwek two me pyen en a neke.

⁷Cite itino a Baŋillai dano me Gilead myero ibed kedgi aber meicel, igwokgi daŋ kun imiogi obedo i akina jo ame cemo i wi mejani; pien gin daŋ rik orwatte keda aber amannono i kare ame ariŋo ominni Abicalom.

⁸Cimei wot a Gera, dano me Benjamin, ame oya i Bakurim daŋ pwod tye baŋi. En rik ocena atek meicel i nino ame awoto i Makanaim, cite i kare ame rik en dok orwatte keda i kulo Jordan, ate cikere baŋe i nyiŋ Rwot ni mom abino neke i pala lweny.

⁹Cite yin doŋ myero kur iweke ame mom itimo ginnoro i kome. Yin giri iŋeo gin a myero itim i kome, cite myero inen ni en oto.”

¹⁰Daudi te doŋ to oko, te wot weo karacel i kwari mere, ote yiko kome i paco mere.

¹¹Daudi onwoŋo oloo jo Icrael pi mwakki pyeraŋwen, kun en ogeo loc i Kebron pi mwakki abiro kede pyeradek wie adek i Jerucalem.

¹²Culeman doŋ te bedo i wi kom loc a pappere, loccere te medde bedo atek meicel.

¹³Adonia wot a Kagit te wot baŋ Batceba tota a Culeman. Batceba te penye ni, “Ibino baŋa i kuc?” En te gamo ni, “Ee, abino i kuc.”

¹⁴Adonia te medo ni, “Tye kopporo ame amito kobo baŋi.” Batceba te gamo ni, “Kop aŋo-nono kara?”

¹⁵En te gamo ni, “Yin iŋeo ni an en a myero rik abed abaka, dok daŋ jo Icrael luŋ onwoŋo agenno ni an en ame abino loyogi. Cite man dok olunyo lokere oluktuke, ominna en ame dok odoko abaka, pien mannono onwoŋo oya ibaŋ Rwot.

¹⁶Doŋ aman an atye i ginnoro acel ame amito kwayo baŋi; tim ber kur ikwer.” Batceba te kobo ni, “Aco kob do.”

¹⁷Adonia te kobo ni, “Tim ber ikwaya abaka Culeman, aŋeo ni en mom bino kwerri; amito ni en mia Abicaki, nya jo Cunam me bed cega.”

¹⁸Batceba te gamo ni, “Mannono gire ber, an abino cwalo kwacci i nyim abaka.”

¹⁹Batceba te wot baŋ abaka Culeman, me wot kop kede abaka Adonia. Abaka ka onene, oya malo jole, te ryebere piny i nyime; eka te dok bedo piny i kom me loccere, te miyo kom ocele pi tottere. Tottere te bedo i laŋete tuŋ cem.

²⁰Tottere te kobo ni, “Atye kede kwaecoro acel anonok ame amito keto i nyimi; tima ber kur ikwer ba.” Abaka te gamo ni, “Koŋ ikobba awiny do, totta; pe abino kwero.”

²¹En te kobo ni, “Tim ber imi Abicaki nya jo Cunam baŋ ominni Adonia me bed dako mere.”

²²Abaka Culeman te gamo kop a tottere ni, “Piŋo kara ikwao Abicaki nya jo Cunam pi Adonia? Kwaye daŋ doŋ loc do, pien en obedo ominna adwoŋ, dok daŋ Abiatar alamdog kede Yoab wot a Jeruya ocwake.”

²³Abaka Culeman te kwoŋ akwoŋa i nyiŋ Rwot ni, “Obaŋa myero mi ginnoro timere i koma ka ce mom amio oneko Adonia pi kwaccere-nono.

²⁴Pien Rwot doŋ otyeko moka oko me bedo i wi kom loc a pappa Daudi. Dok Rwot ogwoko gin a rik eciko baŋ pappa, te miyo loc i ciŋa kede i ciŋ ikwaena, kite a rik ociko. Doŋ pi mannono, acalo Rwot tye kwoni, obino neko Adonia oko tin.”

²⁵En te cwayo Benayo wot a Yekoyadi, te wot cobe neke oko.

²⁶Abaka Culeman te kobbi Abiatar alamdog ni, “Yin myero iwot oko i paconi i Anatot; pien yin onwoŋo myero neki oko. Cite mom abino neki i kare-ni, pien yam ibedo tiŋo canduk a Rwot Obaŋa i nyim pappa Daudi, dok daŋ inywako kede peko mere ducu ame obedo poto i kome.”

²⁷Culeman te ryemo Abiatar oko i tic me bedo alamdog a Rwot, ame man te miyo kop a Rwot cobere kakare, ame rik ekobo i Cilo i kom jo Eli kede ikwae.

²⁸I kare ame Yoab owinyo gin ame otimere, kite acalo en rik onwoŋo obedo dano acel ame ocwako Adonia kun mom cwako Culeman, en oŋweco atir i kema a Rwot, te wot mako tuŋ keno lam me elar kwo mere.

²⁹I kare ame Culeman owinyo ni Yoab oŋweco i kema a Rwot, tye kuno omako tuŋ keno lam pi laro kwo mere, Culeman ocwao Benayo wot a Yekoyadi ni wot cobe neke oko,

³⁰I kare ame Benayo otuno baŋ Yoab i kema a Rwot, en okobbi Yoab ni, “Abaka ociko ni yin myero iya oko i kannono.” Cite Yoab te gamo ni, “An gira mom aya. An abino gira to kan.” Benayo te dwokki abaka kop kun kobbe gin ame Yoab okobo.

³¹Abaka te kobo ni, “Wot itim kit ame en okobo-nono. Cobe ineke oko ite yike. Mannono bino miyo bal me remo a jo ame en oneko aboŋo bal mom dok bedo i wia kede i wi jo me ot a pappa.

³²Rwot bino dwoko bal me remo a jo ame rik eneko naca i wie, pien en rik onekogi kun pappa Daudi mom oŋeo ginnoro iye. En rik oneko jo aryo ame onwoŋo obedo jo abeco a kitegi atira kate oko, adwoŋ Abuneri wot a Neri ame onwoŋo obedo atel wi mony a jo Icrael, kede adwoŋ Amaca wot a Jeter ame onwoŋo atel wi mony a jo Juda.

³³Bal me remo a jo-nono bino dok i wi Yoab kede ikwae luŋ. Cite Daudi kede ikwae kede jo me ode, kede kom me loccere, Rwot bino miyo iye kuc nakanaka.”

³⁴Benayo te wot i kema a Rwot, te wot cobo Yoab neko oko; eka ote yike i ode ame onwoŋo tye i dye tim.

³⁵Abaka te keto Benayo bedo atel wi mony akaka Yoab kede Jadok me bedo alamdog akaka Abiatar.

³⁶Abaka rik te lwoŋo Cemei te kobbe ni, “Yin myero iger odi i Jerucalem kan, dok myero ibed kan kun mom iya iye; kur iwot kannoro ocele kadi acel.

³⁷Pien i nino ame yin ibino ya iye i kan, eka ite ŋolo luŋ me Kidron, myero iŋe oko i nino-nono ni ibino to; remoni giri bino dok i wi.”

³⁸Cemei te kobbi abaka ni, “Gin ame ikobo gire ber; an abino tiyo gin ame yin abaka ikobo.” Cemei daŋ te bedo i Jerucalem kannono pi kare alalac.

³⁹Cite i ŋe mwaka adek, opii a Cemei aryo te lwi riŋo gigi oko naka baŋ Akic wot a Maaka, ame onwoŋo obedo abaka me Gat. I kare ame okobbi Cemei ni opii mere tye i Gat.

⁴⁰Cemei oya oko te tweyo kom bedo i wi kar; a mere i kom kana, te wot naka i Gat baŋ Akic, pi wot yenyo opii mere. En te wot nwoŋogi kuno, te dwoggogi paco.

⁴¹I kare ame Culeman owinyo ni Cemei owoto naka i Gat twal te dwogo,

⁴²abaka ocwao jo baŋe te wot lwoŋe, eka te penye ni, “Rik mom amii ikwoŋo akwoŋa i nyiŋ Rwot ni myero kur iya i Jerucalem, kun aciki atek ni i nino ame ibino ya iye i kan ite wot kannoro ocele, myero iŋe i nino-nono ni ibino to? Dok yin mom rik igamo ni kop ame an akobo tye aber, yin ibino lubo?

⁴³Kara piŋo mom dok icobo kwonni ame rik ikwoŋo baŋ Rwot kede gin ame an aciki iye?”

⁴⁴Abaka dok te medo kobbi Cemei ni, “Yin giri iŋeo atira i cunyi tim areco ame rik ibedo timo baŋ pappa Daudi. Pi mannono ba, Rwot bino miyo timmi-naca luŋ dok gire i wii.

⁴⁵Aco an gira Obaŋa bino miya winyo, bino miyo kom loc a Daudi medde gire bedo atek nakanaka i nyime.”

⁴⁶Abaka te doŋ miyo Benayo wot a Yekoyadi tere oko, te wot cobe neke oko. Mannono te miyo loc a Culeman medde doŋ bedo atek meicel.