Read lango 1 Obakki 20 Bible Online

1 Obakki 20 - lango bible

1 Obakki 20

¹Ben-adad abaka me Curia rik te coko monnyere ducu karacel; rwode ocele pyeradek wie aryo rik onwoŋo tye karacel kede kun otye daŋ aguragura kede gadigadi me lweny. En te tero monnyere-nono wot guro Camaria, te cako lweny i kom jo me kuno.

²En ocwao akwena iyi boma baŋ Akab abaka me Icrael me wot kobbe ni,

³“Abaka Ben-adad mito ni yin ijalle ryal kede jabu luŋ, kede monni abeco mege karacel kede itinoni atekkege luŋ.”

⁴Abaka me Icrael te gamo ni, “Wot ikobbi wunu abaka Ben-adad ni an aye, an karacel kede jami ame atye kede luŋ doŋ odoko gire mege, en doŋ adwoŋwa.”

⁵Akwena a Ben-adad te dok dok baŋ Akab tyen me aryo kun kobbe ni, Ben-adad oko bo ni, “An rik acwao akwena baŋi kun akobo ni yin myero ijalla ryal kede jabuni ducu, kede monni abeco mege kede itinoni atekkege.

⁶Doŋ ba, diki i kodi caa-ni, abino cwayo omirona adoŋo baŋi, gin bino ŋiyo odi, kede udi omironi adoŋo mege, gin bino kwanyo ginnoro luŋ ame gin oneno ni ber, ote yako bino kede oko.”

⁷Akab abaka me Icrael te lwoŋo otel luŋ me lobo mere, te kobbigi ni, “Koŋ inen wunu kite ame dano man tye ka yenyo kede kolo. En ocwao kwena baŋa kan ni an myero amie monna kede itinona kede ryal kede jabu-gu luŋ, ento an mom akwero.”

⁸Otel te gamo kop abaka ni, “Mano kop apala, kur itam kadi acel, kur daŋ iye miye ginnoro.”

⁹Abaka Akab te kobbi okwena a Ben-adad ni, “Wot ikobbe wunu en adwoŋŋa-naca ni, an akobo ni, gin a rik egeo mito i baŋa an abino tiyo, cite en ame dok ekwao me aryo-ni en a mom twerre.” Okwena te dwoko kop baŋe, ote dok dwoggogi baŋ abaka Akab,

¹⁰kun Ben-adad okobbigi me kobo ni, “Obaŋewu myero mi ginnoro timere i koma ka ce mom akelo lwak jo apipim obalo bomani-nono odoco, ame ŋido jami a gin obalo, kadi okobo ni omako, mom romo cuny ciŋ ŋat acel acel i akinagi.”

¹¹Abaka Akab te kobbi okwena ni, “Wot ikobbi wunu Ben-adad ni, ‘Kur ikwo abeno a mom ru onyalo atin.’ ”

¹²Kop man otuno baŋ abaka Ben-adad i kare ame en karacel kede rwode ocele ame onwoŋo onotte kede otye omato koŋo i gonyegi. En te ciko ni monnyere myero doŋ yikere me wot i lweny, jo daŋ te ryeye oko i tyen, me wot cako lweny oko i kom Camaria.

¹³I kare-nono adwarpinyoro te wot baŋ Akab te wot kobbe ni, “Rwot okobo ni myero kur ibed i lworo moro kadi acel i kom mony adwoŋ wok-ki pien tin ebino miyogi luŋ i ciŋi, me yin iŋe ni en ebedo Rwot.”

¹⁴Abaka Akab te penyo adwarpiny ni, “Kara ebino tic i jo mene?” Adwarpiny te gamo ni, “Rwot okobo ni ebino tic awobe ame tye i te loc a gabuna me lobo acel acel.” Abaka dok te penyo ni, “Kara ŋa ame bino bedo atel wi mony.” Adwarpiny te gamo ni, “Yin ikomi.”

¹⁵Mannono te miyo abaka lwoŋo awobe a tye i te loc a gabuna i lobo acel acel ame romo mia aryo kede pyeradek wie aryo me geyo telo wi mony. En te dok lwoŋo mony me Icrael ame romo tutumia abiro.

¹⁶Mony Akab te ciro dyeceŋ me wot lweny. I kare-nono onwoŋo abaka Ben-adad karacel kede rwode pyeradek wie aryo ca onwoŋo obino me konye, tye ka mero i gonyegi.

¹⁷Awobe ame tye i te loc me gabuna me lobo acel acel en ame te geyo telo yo. Orot piny a Ben-adad te dwoko kop baŋe ni, “Jo tye aciro abino kun oya i Camaria.”

¹⁸Abaka te gamo ni, “Mak wunu jonono amaka, kur inekgi wunu, kadi gin obino pi yiko kop me kuc onyo obino me lweny.”

¹⁹Awobe a tye i te loc a gabuna me lobo acel acel en ame te geyo ero lweny kun mony me Icrael daŋ lubo yorgi.

²⁰Ŋat acel acel i akinagi rik te neko akworrere ame elwenyo kede oko. Jo Curia te mukere oko i ŋwec, jo Icrael daŋ te buto i yorgi i ŋwec, ento Ben-adad abaka me Curia te bwot oko, pien oriŋo oko aguragura mere karacel kede wegi aguragura mogo.

²¹Lek me lweny te doŋ i ciŋ abaka me Icrael, en te mako lwak aguragura apipim kede gadigadi, dok te neko jo Curia atek meicel.

²²Adwarpiny te wot baŋ abaka Akab, te kobbe ni, “Dok doŋ paco me iwot iyik monnyi bed atek meicel dok daŋ iyik kite ame ibino lweny kede, pien jo Curia dok bino dwogo me bino lweny i komi i oro abino.”

²³Omio omiro abaka Ben-adad adoŋo te kobbe ni, “Jo Icrael tye kede obaŋe me wi kidi, mannono en omio gin oloowa i lweny. Wan myero dok olweny i jo-ni i dye bar kannaler, mannono bino miyo wan en a doŋ oloogi.

²⁴Aman myero yin ikwany rwode pyeradek wie aryo ca oko i ticgi, me iket otel wi mony en ame le kakargi.

²⁵Ka man otum, lwoŋ doŋ mony adwoŋ atek ame rom aroma i jo a rik koŋ bin ŋwec i nyim jo Icrael oko ca, kede aguragura, i gadigadi daŋ a rom aroma i megi-naca. Wan obino wot lweny i jo Icrael i dye bar kannaler. Man doŋ wan en ame obino loyogi.” Abaka Ben-adad rik daŋ te ye tamginaca.

²⁶I kare me oro en te dok cwano monnyere coko karacel, te wot kedgi naka i Apec me wot cako lweny i kom jo Icrael.

²⁷Jo Icrael rik daŋ te lwoŋo monygi, jo te yikere oko luŋ i jami ducu me lweny kede cam. Jo Icrael te wot guro gonygi kun otikere i mony me Curia, ento monygi onwoŋo opokere i dul aryo. Monygi onwoŋo nonokkoro cite me a jo Curia onwoŋo dwoŋ atek.

²⁸Adwarpiny dok te bino kobbi abaka me Icrael ni, “Rwot okobo ni, pien jo me Curia okobo ni an abedo obaŋa me wi kidi pe me dye bar kannaler, abino miyo twon monygi adwoŋ wok-ki i ciŋi, me yin karacel kede joni iŋe ni an abedo Rwot.”

²⁹Pi nino abiro twal mony aryo luŋ obedo cuŋ i gonygi kun mony man otikere akworrere. I nino me abiro mere gin doŋ te cako lweny, jo Icrael te neko cirikale a jo Curia wegi tyen ame romo tutumia acel i nino-nono.

³⁰Jo odoŋŋege te mukere oko i ŋwec, ote wot laro boma me Apek; i kuno dok apama cel me boma te rette i kom jo ame romo tutumia pyeraryo wie abiro. Ben-adad daŋ onwoŋo oriŋo i bomanaca, te wot laro icika i tyelo, me ottoro ame onwoŋo tye i boma kuno.

³¹Omiro mere adoŋo te wot baŋe kuno, ote kobbe ni, “Nen ba, wan owinyo ni obakki me Icrael okica meicel. Doŋ yin myero iwekwa oruk boŋo cola i pyerwa, kun otweo tol kwero cola daŋ i wiwa, me owot kede baŋ abaka me Icrael, gwok onyo en twero ye timi kica, mom te neki.”

³²Gin te cako tweyo boŋe cola i pyergi kede tol kwero cola i wigi gin te wot kede naka baŋ abaka me Icrael ote wot kobbe ni, “Amironi abaka Ben-adad okwai ni itime kica, kur doŋ ineke.” Abaka me Icrael te gamo ni, “En pwod tye kwo? Mannono ber! En doŋ bino bedo awota.”

³³Jo a Benadad-nono onwoŋo tye ka ŋiyo ginnoro aber ame nyuto, ame gin oniaŋ kite ame piny tye awot kede. Kare ame gin owinyo abaka me Icrael okobo ni, “ ‘Awotta,’ gin te ru gamo oko oyotoyot ni, ‘Ee, Ben-adad en awotti.’ ” Abaka Akab dok te kobo ni, “Aco wot ikele wunu.” Kare ame Ben-adad obino baŋe, abaka me Icrael te lwoŋe yito baŋe i wi gadigadi mere.

³⁴Ben-adad te kobbe ni, “An abino dwoko boma luŋ ame yam pappa omao i ciŋ pappi, adwokogi luŋ i ciŋi, dok yin daŋ itwero yabo ka cato wil-li i Damaciko kite ame rik pappa obedo kede mege i Camaria.” Akab te kobo ni, “Mom abino timo ginnoro i komi pi kop ame ikobo-nono.” Eka te keto cikere kede, te weke gire wot oreme.

³⁵Adwarpinnyoro ame onwoŋo tye i akina odwarpiny okobbi awottere ni myero goe atek pien Rwot en okobo ni goe; cite awottere te kwero goye oko.

³⁶En te kobbi dano-nono ni, “Pien yin ikwero winyo kop a Rwot, aman yin doŋ ityeko ya oko i baŋa kan, eŋatu bino maki neki oko.” I kare ame dano-nono oya oko i baŋe, oyotoyot eŋatu te daŋ mako neko oko.

³⁷Adwarpinnyono dok te nwoŋo lo moro ocele, te kobbe ni, “Amito igoa atek.” Dano-nono daŋ te cunyu goye oyotoyot atek meicel, ogoe te wane oko.

³⁸Adwarpinnyono te ya oko i kannono, te wot kuro abaka i ŋet yo, kun otweo waŋe oko kede atambala.

³⁹Doŋ i kare ame abaka onwoŋo akato, en oredo baŋ abaka kun kobo ni, “An abedo amironi ame rik onwoŋo awoto i lweny, ate wot donyo i kan ame lweny onwoŋo okur iye agwa meicel. Acirikale moro te bino baŋa kun okelo dano moro eka kobba ni, ‘Gwok dano man aber. Ka ce yin iweko dano man orwenyo i baŋi, ŋe ni yin ibino to kakare; ka pe, ibino culo ratili mia acel me ryal.’

⁴⁰Nen ba adwoŋŋa, i kare ame an alolle i tic kun a dok tuŋŋi i tuŋŋi, en gire te wot oko.” Abaka me Icrael te kobbe ni, “Obino ŋolo koppi kite ame yin i komi i ŋolo kede.”

⁴¹Adwarpiny te ru gonyo atambara oko i waŋe. Abaka me Icrael te niaŋ ni en kara dano acel i akina odwarpiny.

⁴²En te kobbi abaka ni, “Rwot okobo ni, ‘Pien yin iweko dano ame onwoŋo atyeko jalo me aneka owoto i ciŋi, yin en ame doŋ obino kwanyo kwoni kaka kwo mere, obino neko joni akaka jo mere.’ ”

⁴³Abaka te cako dok paco kun cunye aton atek dok waŋe daŋ doŋ oballe oko, te wot naka i Camaria.