Read lango 1 Obakki 21 Bible Online

1 Obakki 21 - lango bible

1 Obakki 21

¹Nabot me Jejreel rik onwoŋo tye kede poto olokkere i Jejerel i ŋet paco Akab abaka me Camaria.

²Abaka Akab te penyo Nabot ni kono omie poto olokkere, odoko mege me pito dek, pien ceggi kede ode, me wek en emi Nabot poto olok ocele kakare, poto ame ber kato mannono oko; onyo ka pe amannono me en doŋ eluny culo lim me wilo.

³Ento Nabot te gamo dog abaka Akab kun kwero oko, ni mom gire etwero ye, pien Rwot mom twero ye ni emi poto a kwaro mere baŋ abaka Akab.

⁴Abaka Akab te lokere dok i ode kun akemo ociro oko dok waŋe daŋ oballe atek pi kop ame Nabot me Jejerel okobo baŋe. Pien Nabot onwoŋo okobo ni mom etwero miye poto ame en eleo i baŋ kwaro mere. Abaka te wot buto piny i kabuto mere, olokki jo ŋee, obuto ame mom daŋ ocamo ginnoro.

⁵I kare ame dako mere Jejebel obino baŋe te penye ni, “Ŋo kara awaŋo cunyi cwara, ame omio ikwero cam oko-ni ba?”

⁶En te kobbe ni, “Woki an onwoŋo akobo wan kede Nabot kun akwae ni kono omia poto olokkere me an awil awila kede lim onyo amie poto olok ocele kakare, cite en okwero oko ni mom ebino miya poto olokkere.”

⁷Dako mere Jejebel te gamo ni, “Aloko ni yin en aman aloc me Icrael. Ya malo me icem, kun cunyi gire yom; an abino miyi poto olok a Nabot me Jejerel.”

⁸Jejebel te cako coyo waraga i nyiŋ abaka Akab, te goyo iye citam abaka, te cwayo baŋ odoŋe kede jo ame oworo ame bedo i Nabot i paco mere,

⁹En onwoŋo ocoo waraga-nono kit man: “Rabbi wunu jo pi kare me ri kec, ket wunu Nabot obed i wi kom me dito i akina lwak;

¹⁰kel wunu jo aryo a kitegi reco, ibin imi wunu cuŋ i nyime. Mi wunu jo-nono cak dote kun kobo ni, ‘Koŋ inen yin iceno Obaŋa kede abaka.’ Wun doŋ kwanye wunu oko, itere wunu oko, ite wot napo wunu oko kede kiddi tuno waŋ ame oto.”

¹¹Odoŋe kede jo ame oworo ame bedo i paco mere te daŋ timo kit ame Jejebel otito baŋgi i waraga.

¹²Gin te cako rabbi lwak pi kare me ri kec, ote daŋ keto Nabot bedo i wi kom me dito i akina lwak.

¹³Jo aryo a kitegi reco te bino cuŋ i nyime, te cako dote kun kobo ni, “Nabot oceno Obaŋa kede abaka.” Gin te kwanye oko i boma ote tere oko, ote wot nanapo en oko kede kiddi tuno waŋ ame en oto.

¹⁴Gin te cwayo kwena baŋ Jejebel me titte ni, “Nabot doŋ otyeko nanapo oko i kiddi, daŋ doŋ oto oko.”

¹⁵Kare ame Jejebel doŋ owinyo ni otyeko nanapo Nabot oko i kiddi, daŋ doŋ oto oko, en okobbi Akab ni, “Ya doŋ malo igam poto olok a Nabot me Jejreel, ame rik ekwero miyi wilo kede lim-mi; Nabot doŋ mom kwo, otyeko doŋ to oko.”

¹⁶Akab ka owinyo ni Nabot doŋ oto oko, oya malo te wot oyotoyot i poto a Nabot me Jejerel me wot gamo.

¹⁷Rwot te kobbi Elia dano me Ticbe ni,

¹⁸“Ru ya malo iwot irwatte Akab abaka me Icrael, ame tye i Camaria; aman en tye i poto olok a Nabot, owoto kuno me wot gamo.

¹⁹Wot ikobbe ni, ‘Rwot okobo ni yin ineko dano dok daŋ igamo anaka poto mere. Dok ikobbe daŋ ni, kan ame gwogi onaŋo iye remo a Nabot, en ame gwogi bino naŋo iye daŋ remoni.’ ”

²⁰Akab te kobbi Elia ni, “Akworra doŋ onwoŋa oko ba.” Elia te kobbe ni, “Anwoŋi doŋ oko ta, pien yin giri en ame icatte keni itimo gin a mom nen aber baŋ Rwot.

²¹Nen ba, abino cwalo can i komi, abino weyi oko luŋ owec, abino neko itinoni awobe luŋ iyi Icrael, opii kede anywalli.

²²Abino timo jo me odi kite ame rik atimo kede jo me ot a Jeroboam wot a Nebat, dok ame rom aroma i ot a Baaca wot Akija, pien yin imio akemo omaka, dok daŋ imio jo Icrael otimo bal.

²³Aco kop i kom Jejebel, Rwot okobo ni, ‘Gwogi en ame bino mwodo kom Jejebel i lobo ame tye i ŋete.’

²⁴Wot Akab ame bino to paco, gwogi en ame bino mwodo kome; aco en ame bino to i tim ata, winy en ame bino camo kome.”

²⁵Mom tye dano moro ame yam koŋ ocato kome kene pi timo gin anen arac baŋ Rwot calo Akab, ame rik dako mere Jejebel odio tetek.

²⁶En otimo bal me ipyeda arac meicel pi bedo woro jogi, kite ame rik jo Ammon obedo timo; jo ame rik Rwot oryemo i nyim jo Icrael.

²⁷Kare ame Akab doŋ owinyo kop ame Elia okobbe, oyeyeco boŋŋi mere oko, te daŋ cako ruko boŋo cola oko i kome i caa-nono, te kanyo kec. Akab te bedo wot kun kome doŋ oto oko,

²⁸Kop a Rwot dok te bino baŋ Elia dano me Ticbe, kun kobbe ni,

²⁹“Ineno kite ame Akab doŋ omwolle kede i nyima? Pien en doŋ omwolle kene i nyima, mom dok abino kelo can i kare mere, ento abino kelo can i ode i kare ame wode en ame tye i loc.”