Read lango 1 Obakki 22 Bible Online

1 Obakki 22 - lango bible

1 Obakki 22

¹Jo Curia kede jo Icrael rik te medde bedo mot aboŋo lwennyoro i akinagi pi mwakki ame romo adek twal.

²Ento i mwaka me adekkere Yekocafati abaka me Juda te wot baŋ abaka me Icrael.

³Abaka me Icrael te kobbi omiro mere ni, “Wun mom iŋeo wunu ni Ramot-gilead obedo megwa? Wan oliŋ mot kun mom mito gamo oko i ciŋ abaka me Curia.”

⁴En dok te lokere penyo Yekocafati ni, “Yin daŋ itwero wot kedwa me wot lweny i kom Ramot-gilead?” Yekocafati te gamo dog abaka me Icrael ni, “Jamina luŋ obedo megi, an amegi kede jona kede aguragurana daŋ.”

⁵Yekocafati te kobo baŋ abaka me Icrael ni, “Koŋ ige penyo Rwot, me owiny ŋo ame en bino kobo.”

⁶Abaka me Icrael te coko odwarpiny luŋ karacel, ame romo jo mia aŋwen twal, en te kobbigi ni, “Awot lweny i kom Ramot-gilead onyo kur awot kuno?” Odwarpiny te gamo ni, “Woti; pien Rwot bino miyo i ciŋi.”

⁷Cite Yekocafati te dok kobo ni, “Adwarpinnyoro ocele ame obedo me a Rwot mom tye kan me koŋ openy?”

⁸Abaka me Icrael te gamo ni, “Otye kede lo moro ocele ame olwoŋo ni Mikaya ame otwero penyo kop a Rwot i baŋe, en obedo wota Imla; cite an cunya mom mito dano-nono kadi acel, pien en kom mom ru otyeto kopporo aber pira, kare luŋ tyeto kop a mom ber keken.” Yekocafati te gamo ni, “Pe amannono abaka, wek kur ikob amannono.”

⁹Abaka me Icrael te lwoŋo adwoŋŋoro, te kobbe ni, “Wot ilwoŋ Mikaya wota Imla ru bino oyotoyot.”

¹⁰I caa-nono onwoŋo abaka me Icrael kede Yekocafati abaka me Juda tye obedo i wi komgi me loc, kun oruko boŋŋigi me kwogo, ote bedo kede i laro kal ame onwoŋo tye i ŋet dogcel me donyo i boma me Camaria, kun odwarpiny luŋ tye atyet i nyimgi.

¹¹Jedekia wot a Kanaana otio cal tuŋ lee me nyonyo, te kobo ni, “Rwot okobo ni, ‘Yin ibino coro jo Curia i tuŋ acalo magi tuno waŋ ame ijwerogi ducu.’ ”

¹²Odwarpiny luŋ te tyet kittono, kun ŋat acel acel kobo ni, “Woti i Ramotgilead me iwot ilo; Rwot bino miyo gire i ciŋi, yin abaka.”

¹³Lo ame onwoŋo owoto lwoŋo Mikaya, obino te kobbi Mikaya ni, “Nen ba, kop odwarpiny luŋ cukoro ka cuny abaka; mi koppi daŋ bed ame rom aroma kede megi ame cukoro cuny abaka.”

¹⁴Mikaya te gamo ni, “Kite a Rwot tye kede kwo-ni, gin ame en bino kobo baŋa, en ame abino kobo.”

¹⁵Kare ame en doŋ obino baŋ abaka, abaka okobbe ni, “Mikaya we, owot olweny i Ramot-gilead, onyo kur owoti?” Mikaya te gamo ni, “Wot kuno me iwot ilo lweny, Rwot bino miyo gire i ciŋe, yin abaka.”

¹⁶Ento abaka dok te kobo ni, “An abino ciki i nyiŋ Obaŋa tyen adi ni myero ikobba kop ateni keken i nyiŋ Rwot?”

¹⁷Mikaya te kobo ni, “Aneno jo Icrael luŋ tye oket atata i wi kidi calo rommi ame akwatgi mom; dok Rwot daŋ okobo ni, Adwoŋ ame loo jo man gire pe tye; wek ŋat acel acel dok gire ipaco mere i kuc.”

¹⁸Abaka me Icrael te kobo baŋ Yekocafati ni, “An mom onwoŋo akobbi ni Mikaya mom twero tyeto kopporo aber i koma kono ka en arac keken?”

¹⁹Mikaya dok te gamo ni, “Koŋ doŋ iwiny kop a Rwot: Aneno Rwot tye obedo i wi kom me loccere, kun mony me wi polo luŋ tye ocuŋ i ŋete tuŋ cam kede tuŋ cem.

²⁰Eka Rwot te kobo ni, ‘Ŋa ame bino bwobwolo Akab me wot to i Ramot-gilead?’ Jo luŋ te bedo kobo kop apapat.

²¹Cuny te bino anyim, te bino cuŋ i nyim Rwot, te kobo ni, ‘An abino bwobwolo en.’

²²Rwot te penye ni, ‘Ibino bwole i yore aŋo?’ En te gamo ni, ‘Abino wot kuno ate wot miyo cuny arac me goba bedo iyi odwarpinnyere luŋ.’ Rwot te kobo ni, ‘Yin ibino bwobwolo en, ibino cobo ticci gire; wot kuno iwot itim kittono.’

²³Doŋ aman ba, Rwot doŋ otyeko keto cuny arac me goba iyi odwarpinnyini luŋ; Rwot okobo kop arac i komi.”

²⁴Jedekia wot a Kenaana owoto baŋ Mikaya, te bapo leme kede ciŋe, kun kobo ni, “Cuny a Rwot oya i baŋa i yore aŋo te kobo baŋi kop kedi?”

²⁵Mikaya te gamo ni, “Nen ba, ibino neno man i nino ame ibino wot pono iyi icika i tyelo.”

²⁶Abaka me Icrael te kobo ni, “Mak wunu Mikaya idwok wunu baŋ Amon ame gabuna me boma, kede baŋ Yowaci wot abaka;

²⁷me iwot ikobbigi wunu ni, ‘Abaka okobo ni, “Ket wunu dano man i buc, mie wunu en cam cem ame obuc camo, kun imie wunu ogati kede pii keken tuno waŋ ame an adwogo paco kede kuc.” ’ ”

²⁸Mikaya ogamo ni, “Ka ce idwogo paco i kuc, mom Rwot en okobo keda.” Dok te medo ni, “Wun lwak luŋ myero iwiny wunu!”

²⁹Abaka me Icrael kede Yekocafati abaka me Juda te wot i Ramot-gilead.

³⁰Abaka me Icrael te kobo baŋ Yekocafati ni, “An abino ruko boŋo apat acalo dano moro ata, ate wot kede i lweny, ento yin myero iruk meri me loc.” Abaka me Icrael te ruko boŋo apat acalo dano moro ata, te wot i lweny.

³¹I kare-nono onwoŋo abaka me Curia ociko odoŋe pyeradek wie aryo ame loo gadigadi mere ni, “Kur ilweny wunu i ŋattoro ocele kadi dwoŋ onyo tidi, cite myero ilweny wunu ka abaka me Icrael.”

³²Doŋ i kare ame odoŋe ame loo gadigadi oneno Yekocafati, gin okobo ni, “Abaka me Icrael kom ene.” Gin te cako lweny kede oko; Yekocafati te mwoco koko oko.

³³Kare ame odoŋe ame loo gadigadi oniaŋ ni en mom obedo abaka me Icrael, gin te doŋ weko ryemo yore oko,

³⁴Ento lo moro te telo atero mere bayo ata, te celo abaka me Icrael; atero mere te poto i akina nyonyo me geŋo kore kede nyonyo ocele me geŋo kome ame onwoŋo calo pok rec. Abaka me Icrael te kobbi lo ame onwoŋo aryemo gadigadi mere ni myero lokere dok kede cen pien owane oko.

³⁵Lweny rik te bedo agwa meicel i nino-nono, omiro Akab rik te bedo jeŋo adwoŋgi i kom gadigadi kun nyime oneno jo Curia tuno naka otyeno, eka te to doŋ oko. Remo ame ocwer i kan ame ocobo te cwer mol piny i te gadigadi.

³⁶I kare ame ceŋ doŋ ceggi poto, jo te cako redo malo ame dwon jo te romo bar me lweny, kun oredo ni, “Ŋat acel acel myero dok tuŋe. Dano acel acel odok i lobo mere!”

³⁷Abaka Akab rik te to kittono, ote kelo kome i Camaria, ote yiko kuno, kelo

³⁸Gin te cako lwoko gadigadi oko, i kut me kulo Camaria. Gwogi te nano remo mere, otim tim alaya alaya daŋ te lwokere i remo mere kite ame Rwot onwoŋo okobo.

³⁹Kop i kom ginnoro luŋ ame Akab obedo timo a mom ocoo kan, kede kop i kom ot me kwogo ame rik en ogero i lak lyec, kede pacci apol atata ame en rik ogero, i lak lyec, kede pacci apol atata ame en rik ogero, gin luŋ tye ocoo i buk me Tekwaro ame tito kop i kom oloc me Icrael.

⁴⁰Abaka Akab rik te to kittono, en te wot weo karacel i kwari mere. Wode Akajia en ame te leyo kakare.

⁴¹Yekocafati wot Aca odoko abaka me Juda i mwaka me aŋwen me loc Akab abaka me Icrael.

⁴²Mwaka me dittere onwoŋo doŋ romo pyeradek wie abic kare ame en doko aloc me Juda; en te bedo loc i Jerucalem pi mwakki ame romo pyeradek wie abic. Nyiŋ tottere Ajuba ame obedo nyaka a Cilki.

⁴³En te bedo lubo kit a pappere Aca luŋ, kun mom ya iye kadi acel; en obedo tiyo gin ame nen aber baŋ Rwot. Cite ka woro jogi ame onwoŋo tye i wi kiddi en mom omuko; jo te medde yalo jogi kuno, kun daŋ owaŋo odok akur.

⁴⁴Yekocafati te medde bedo i kuc gin kede abaka me Icrael.

⁴⁵Kop i kom ginnoro luŋ ame Yekocafati obedo timo ame mom ocoo kan, teko mere luŋ kede kite ame en olwenyo kede, gin luŋ tye ocoo i buk me Tekwaro ame tito kop i kom oloc me Juda.

⁴⁶En ojwero co luŋ ame rik mio co wadgi buto kedgi i ot jogi ame rik onwoŋo pwod odoŋ ame mom ojwero i kare a pappere Aca.

⁴⁷I kare-nono onwoŋo abaka pe tye iyi Edom; onwoŋo tye ka dano moro ame oketo me kuro kabedo abaka.

⁴⁸Yekocafati rik otio mel me Tarcic me wot omo jabu iyi Opir, ento naka mom owoto pien mel oturigi oko i Ejion-geber.

⁴⁹Icennere Akajia wot Akab te kobo baŋ Yekocafati ni, “Wek omirona wot karacel omironi i meli-ni.” Ento Yekocafati te kwero gire oko.

⁵⁰Yekocafati te to wot weo karacel kede kwari mere, ote yiko kome karacel i kwari mere i paco a Daudi. Wode Jekoram en ame te leyo kakare.

⁵¹Akajia wot Akab ocako loyo jo Icrael kun bedo i Camaria i mwaka me apar wie abiro me loc a Yekocafati abaka me Juda, en te bedo loyo jo Icrael pi mwakki aryo.

⁵²En obedo tiyo gin a mom nen aber baŋ Rwot, obedo lubo kit a pappere kede kit a tottere, kede kit a Jeroboam wot a Nebat, ame rik omio jo Icrael otimo bal.

⁵³En obedo tic baŋ Baal kun woro, en te miyo akemo mako Rwot Obaŋa me Icrael i yore luŋ ame pappere obedo tiyo.