Read lango 1 Obakki 3 Bible Online

1 Obakki 3 - lango bible

1 Obakki 3

¹Culeman te nyomo nyaka a Parao abaka me Miciri, mannono te miyo en notte oko gin kede abaka me Miciri. En okelo nyannono i paco a Daudi, tuno waŋ ame en ogero ode, kede ot a Rwot, kun daŋ doŋ ogero cel oguro Jerucalem luŋ.

²Jo rik onwoŋo pwod yalo Obaŋa i wi kiddi malo, pien ottoro rik onwoŋo pwod mom ame ogero pi Rwot.

³Culeman rik obedo ŋat ame maro Rwot, kun lubo cik a pappere Daudi, cite en rik onwoŋo ŋolo mot me yalo Obaŋa dok daŋ waŋo odok akur, i kabedo me woro Obaŋa ame onwoŋo tye malo i wi kiddi.

⁴Kare moro abaka Culeman owoto i Gibeon me wot yalo Obaŋa kuno, pien maci-naca en a rik obedo ka woro Obaŋa adwoŋŋere. Culeman onwoŋo rik yalo Obaŋa i mot awaŋa tutumia acel i wi keno lam kuno.

⁵Kare ame en tye i Gibeon kuno, Rwot onen baŋe dyewor i waŋ lek te kobbe ni, “Peny gin ame imito ni myero ami baŋi.”

⁶Culeman te gamo ni, “Yin doŋ ityeko nyuto twon mar meri adwoŋ a mom lokere baŋ amironi pappa Daudi, pien en rik obedo ŋat a genne i tiyo gin ame yin imito, dok kite onwoŋo tye atira, kun yie daŋ ler i komi. Dok yin imedde nyutte twon mar adwoŋ a mom lokere-ni, imie-gu wode ame aman en ame tye ka loc kakare.

⁷Doŋ ba, ama Rwot Obaŋana, yin doŋ imia an amironi adoko abaka akaka pappa Daudi, kadi bed an pwod atin atidi moro, ame mom ru aŋeo loc.

⁸An doŋ atye i akina joni ame yam iyero, ame gin obedo rok adwoŋ meicel, welgi bup atek ame mom romo kwanne pi polgi.

⁹Tim ber doŋ imia an amironi cuny me ryeko me loyo lwakki, me aŋe poko gin aber kede gin arac. Kara ŋa ame romo loyo rokki adwoŋ wok-ki?”

¹⁰Kwac a Culeman-ni te yomoro cuny Rwot atek.

¹¹Obaŋa te gamo ni, “Pien ikwao man, kun mom iparo piri keni ite penyo ni kono ami iperakino kare alac, onyo ni amii lonyo, onyo ni kono aneko okworri oko, ento ilunyo kwayo ni amii cuny me ryeko ame twero miyi iŋeo gin atye atira,

¹²an abino timo kittono. Nen ba, amii doŋ ryeko kede diro adwoŋ meicel a kato jo luŋ ame otelo nyimi kede jo luŋ ame bino lubi; mom tye ŋattoro ame bino bedo aryek calo yin.

¹³Abino daŋ miyi gin ame mom ikwao: ibino bedo twon alonyo a mom twerre, kun daŋ owori atek, ame mom tye abaka moro ame bino pore kedi pi kare luŋ me kwoni.

¹⁴Dok daŋ ka ibino tiyo gin ame an amito, kun igwoko icwilla, kede cikka, kite ame pappi Daudi obedo timo, abino medo kare me kwoni daŋ bedo abubup.”

¹⁵Culeman te co oko i waŋ nino, te nwoŋo ni eleko. Kare ame en odok i Jerucalem, en owoto te wot cuŋ i nyim canduk me cikere a Rwot, te yalo Obaŋa i mot awaŋa kede mot kweyo cuny; te daŋ tedo arama pi omiro mere luŋ.

¹⁶Mon aryo ame onwoŋo obedo olaya obino te cuŋ i nyim abaka Culeman.

¹⁷Dako acel i akinagi te kobo ni, “Ama adwoŋŋa, an kede dako-ni obedo i ot acel; doŋ i nino acel an ate nywalo atinna kun en tye i ot.

¹⁸I ŋe nino adek ame an doŋ atyeko nywal oko, en daŋ dok te nywal, kun wan onwoŋo otye kenwa i ottono. Ŋattoro ocele gire onwoŋo mom tye, kono wan aryoni keken.

¹⁹Doŋ atin a dako-ni te to oko dyewor pien en onwoŋo obuto i kom atin.

²⁰En te ya i cuny dyewor ame an anino oko, te kwanyo atinna oko i laŋeta, te wot pyelo i laŋete, en te lunyo kwanyo mege oto ca kelo pyelo i laŋeta.

²¹Kare ame aco odiko me doto atinna, anwoŋo atin oto oko; cite amedo ŋiyo atinnono aber ame piny doŋ ler, anwoŋo ni mannono mom obedo atin ame onwoŋo an anywalo.”

²²Ento awottere te gamo ni, “Pe gire, atin akwo-ni gire mera, en oto gire megi.” Dako okwoŋo kop te gamo ni, “Pe gire atin oto en a megi, en akwo-ni gire mera.” Mannono kite ame gin oporo kede kopgi i nyim abaka.

²³Abaka te kobo ni, “Koŋ inen, ŋat acel acel tye akobo ni, ‘Atin akwo-ni mera, en oto ca megi’; kun wun luŋ daŋ dok akwero akwera ni, ‘Pe gire, atinni gire oto oko, mera gire en akwo.’ ”

²⁴Aco doŋ koŋ ikella wunu pala, “Ote daŋ kelo pala baŋ abaka.

²⁵Abaka te kobo ni aco bar yi atin akwo-nu oko aryo, mi nucu baŋ ŋat acel kede nucu ocele baŋ ŋat ocele.”

²⁶Dako ame onwoŋo atinnere kwo te gamo ni, “Pe gire amannono, adwoŋŋa, mi atin akwo-nu baŋ dako-nu, kur inek.” En okobo amannono pien cunye onwoŋo oton atek pi atinnere. Cite ŋat ame mege onwoŋo oto oko te gamo ni, “Ee, wan ducu obino kec, pok yi atinnono gire oko.”

²⁷Abaka te kobo ni, “Mi atin-nu baŋ dako ame ogeo kop, kur inek, pien dako-nono en toto atin.”

²⁸Jo Icrael luŋ te winyo kite ame abaka oŋolo kede koppono. Jo luŋ te cako lworo abaka atek meicel, pien gin oniaŋ ni ryeko Obaŋa tye i yie, en omio oŋolo kop kakare.