Read lango 1 Obakki 4 Bible Online

1 Obakki 4 - lango bible

1 Obakki 4

¹Abaka Culeman onwoŋo obedo abaka ame loo jo Icrael luŋ.

²Magi en jo onwoŋo loo tic apapat i te loccere. Ajaria wot a Jadok onwoŋo obedo alamdog.

³Elikorep kede Akija, ame gin luŋ onwoŋo obedo awobe a Cica, onwoŋo obedo orani; eka Yekocafati wot Akilud te bedo aco kop i kom ginnoro luŋ ame otimere.

⁴Benayo wot a Yekoyadi te bedo atel wi mony; kun Jadok kede Abiatar te bedo olamdog.

⁵Ajaria wot a Natan te bedo amitam baŋ abaka.

⁶Akicarte te bedo alo jo ame tio i paco abaka, kun Adoniram wot Abda te bedo alo tic eroni.

⁷Culeman oketo daŋ gabuna apar wie aryo me loyo lobo apapat iyi lobo me Icrael luŋ. Omiogi tic me coko cam pi abaka kede jo me ode luŋ, kun ŋat acel acel i akinagi mio cam dwe acel i mwaka acel.

⁸Nyiŋ jo-nono ene kede nyiŋ kabedo ame onwoŋo gin loo: Ben-kur ame onwoŋo loo lobo me Epraim obedo kidikidi.

⁹Ben-deker ame onwoŋo loo boma magi, Makaj, Calbim, Bet-cemec kede Elon-bet-kanan;

¹⁰Ben-keced ame onwoŋo loo boma me Arubot, Coko kede lobo me Keper luŋ;

¹¹Ben-abinadab ame onwoŋo onyomo nyaka a Culeman a nyiŋe Tapat, en onwoŋo loo lobo me Dor luŋ.

¹²Bana wot Akilud ame onwoŋo loo boma me Tanak, Megiddo, kede lobo luŋ me Bet-cean ame tye i ŋet boma Jaretan ame tye i luŋ me Jejreel, tuno kede naka iyi Abel-mekola kede Jokmeam.

¹³Ben-geber onwoŋo loo boma ame obedo me a jo a Jair wot a Manace, kede lobo me Argob ame tye i Bacan ame tye iye pacci adoŋo pyerabicel twal ame ocecelo oko i cel apama ame ogero atek, dok acegi i dogcelgi daŋ obedo me mola.

¹⁴Akinadab wot a Iddo, onwoŋo loo boma me Makanaim.

¹⁵Akinaj rik daŋ onwoŋo onyomo nyaka abaka Culeman ame nyiŋe Bacemat, en onwoŋo loo lobo Naputali,

¹⁶Bana wot a Kucai onwoŋo loo lobo me Acer kede paco me Bealot.

¹⁷Yekocafati me Parua, ame onwoŋo loo lobo me Icakar.

¹⁸Cimei wot a Ela, onwoŋo loo lobo me Benjamin.

¹⁹Geber wot a Uri, onwoŋo loo lobo me Gilead ame rik koŋ Cikon abaka a jo Amor oloo kede Og abaka me Bacan. Ŋat ocele daŋ onwoŋo tye ame loo lobo me Juda luŋ.

²⁰Jo Juda kede Icrael rik onwoŋo pol atek ame rom kede kwoyo me dog nam. I kare a Culeman gin obedo ame cunygi yom kun ocemo oyeŋ dok daŋ omatte.

²¹Culeman omedde mwonyo loc ocele luŋ i te loccere, cakere i kulo me Efurate tuno naka i loba a jo Piriciti, kede naka i waŋ lobo me Miciri. En obedo loyogi kun gin oculo ocolo baŋe pi kare me kwo mere luŋ.

²²Nina acel acel rik omio Culeman moko kwon apwottere ame roma puku mia acel, kede moko kwon ocele puku mia aryo,

²³twoni olobakino apar, dok pyeraryo, rommi mia acel, kun nwoŋo mom okwano iye aderi, atil, apali kede gwen ame opito aber.

²⁴En onwoŋo loo loba luŋ ame onwoŋo tye tutuŋ anyarodi me kulo Efurate, cakere i Tipica tuno kede naka i Gaja. En onwoŋo loo obakki luŋ ame onwoŋo tye tutuŋ anyarodi, dok daŋ onwoŋo en bedo i kuc i loba luŋ amano loba mere.

²⁵Jo Juda kede jo Icrael luŋ obedo i kuc i kare me kwo mere luŋ, cakere i Dan tuno kede naka i Beerceba, kun jo me ot acel acel tye olokgi kede odurogi.

²⁶Culeman rik onwoŋo tye aguragura tutumia pyeraŋwen iyi awi mere pi gadigadi mere, kede cirikale ame riŋo aguragura tutumia apar wie aryo.

²⁷Gabuna mere apar wie aryo ame rik onwoŋo loo lobo apapat me Icrael obedo miyo cam baŋe, kun ŋat acel acel miyo kit cam luŋ ame omito aboŋo rem, dok mio i dwe mere ame opoke.

²⁸Ŋat acel acel i akinagi daŋ rik mio cayiri kede reŋ kal ame omito me acama aguragura kan ame omito iye, kede pi aguragura ocele ame otio kedgi.

²⁹Obaŋa onwoŋo omio Culeman ryeko kede ŋec atut meicel. Tammere onwoŋo malo ame mom roma akoba.

³⁰Culeman onwoŋo ryek ame ryeko mere kato kit ryeko oryeko luŋ ame onwoŋo tye tuŋ kide kede me oryeko me Miciri luŋ.

³¹Ryeko mere onwoŋo kato me a jo luŋ; onwoŋo ryek ame kato Etan dano me Ejira oko, kede Keman, kede Kallol, kede Darda, ame gin luŋ obedo awobe a Makal. Nyiŋe orwo atek i loba luŋ ame rik onwoŋo amano loba mere.

³²En obedo ŋat acel ame ocako carokop ame romo tutumia adek kede wer ame kato tutumia acel oko.

³³En okobo kop i kom yen, kun cako i kom yat cedar ame tye i Lebanon tuno kede i kom ogudo ame tu doŋo i kor apama; okobo daŋ kop i kom leyi me tim, kede i kom winy, kede i kom gin ame lak alaka, naka i kom rec-gu.

³⁴Obakki me rok apapat me wi podo luŋ owinyo pi ryeko a Culeman, ote cwayo jo me wot winyo kop i kom ryeko mere.