Read lango 1 Obakki 5 Bible Online

1 Obakki 5 - lango bible

1 Obakki 5

¹Kare ame Kiram abaka me Turo owinyo ni jo Icrael otyeka wiro Culeman kede moo me bedo abaka akaka pappere Daudi, en ocwao kwena baŋe. Man otimere pien Kiram onwoŋo rik maro Daudi con.

²Culeman te dwokki Kiram kop kit man:

³“Yin iŋeo aber ni gero at a Rwot Obaŋa obin oloo pappa Daudi oko, pien obedo lweny kare i kare okworrere ame onwoŋo tye i ŋete. En onwoŋo mom romo gero ot tuno waŋ ame Obaŋa omie eloo okworrere luŋ.

⁴Cite aman doŋ Rwot Obaŋana otyeko gire miya kuc i kabedo luŋ. Okworra moro doŋ pe, dok daŋ mom atye kede peko moro kadi acel.

⁵Mannono omio doŋ atamo ni myero ager at woro Rwot Obaŋana, kite ame Rwot rik ociko kede baŋ pappa Daudi kun koba ni, ‘Wodi ame abino keto me leyo locci en ame bino gero orpira.’

⁶Man omio doŋ akwai me cwayo joni i Lebanon me owot otonna yen cedar. Jona daŋ bino wot tic karacel kedgi, an abino culo ocara a joni kite ame yin ibino moko. Yin iŋeo aber ni mom tye ŋattoro i akina jona ame ŋeo toŋo yen aber acalo jo Cidon.”

⁷Kare ame abaka Kiram owinyo kop a Culeman, olelo meicel, te koba ni, “Tin gire myero pwo Rwot pi miyo Daudi awobi aryek-ki me loyo twon rok adwoŋ wok-ki!”

⁸Kiram te dwokki Culeman kop kun kobo ni, “Atyeko winyo kwena ame icwao, daŋ doŋ atye ame atere oko me tiyo gin ame ikobo, abino miyi yen cedar kede bao me ciprec.

⁹Abino miyo jona kwanyo yennono i Lebanon kelo naka i nam; i dog nam kuno, gin dok bino tweyogi karacel ote keto i nam me kwaŋ i wi pii calo boda naka kan ame ibino mitogi iye. Ka doŋ otuno kuno, jona bino gonyogi oko, eka joni te gamo. Gin ame yin ibino timo pira ene, yin ibino miyo jo me odacam.”

¹⁰Abaka Kiram te cako cwalo bao apipim me yen cedar kede ciprec baŋ abaka Culeman kite ame onwoŋo en amito.

¹¹Abaka Culeman te cako cwayo ŋano a nyige ame romo puku tutumia pyerabicel me acama a jo mere, kede moo jeituni ame oodo ame romo debe tutumia pyeraŋwen. En obedo miyo man luŋ mwaka i mwaka.

¹²Obaŋa te miyo ryeko baŋ Culeman kite ame rik ociko. Kuc obedo tye i akina Kiram kede Culeman, gin te keto cikere i akinagi.

¹³Abaka Culeman te cako rayo jo iyi Icrael luŋ pi tiyo tic atek; jo luŋ ame orono te romo tutumia pyeradek.

¹⁴En te cwalogi i Lebanon, kun cwao jo tutumia apar dwe i dwe. En onwoŋo opokogi i dul adek, kun dul man woto bedo kuno dwe acel te dok dwogo bedo i paccigi dwete aryo. En onwoŋo oketo Adoniram me loyo jo ame orono-nono luŋ,

¹⁵Culeman onwoŋo daŋ dok tye i jo ocele ame romo tutumia pyerabiro ame ticgi obedo me yeyo kityec ducu kede jo ocele daŋ tutumia pyeraboro ame ticgi obedo payo kiddi i lobo obedo kidikidi.

¹⁶Medo i kom jo-nono onwoŋo daŋ dok tye jo ocele ame romo tutumia adek kede mia adek ame onwoŋo abaka oketogi me loyo lwak ame onwoŋo tio tic.

¹⁷Jo te muko twoni kiddi adoŋo ame opao aber kite ame onwoŋo abaka ociko, me gero acakki te ot Obaŋa.

¹⁸Mannono en kite ame ogedo a Culeman, kede ogedo me Kiram, karacel kede jo Gebal obedo tiyo kede ticgi me payo bao kede kiddi me gero ot Obaŋa.