Read lango 1 Obakki 6 Bible Online

1 Obakki 6 - lango bible

1 Obakki 6

¹Culeman rik te cako gero ot a Rwot, i mwaka me aŋwen me loccere ame en onwoŋo loo kede jo Icrael, i dwe me aryo, ame olwoŋo ni Jib. I kare-ni onwoŋo doŋ okato mwaka mia aŋwen kede pyeraboro twal cakere i kare ame jo Icrael onwoŋo oya kede i lobo Miciri.

²Ot ame abaka Culeman ogero-nono onwoŋo bor me yie romo futi pyeraboŋwen, kun lac me yie tye futi pyeradek, eka borrere me malo te bedo futi pyeraŋwen wie abic.

³Icika ame tye tutuŋ doggola me donyo, i nyim icika adwoŋŋere, borrere onwoŋo romo futi pyeradek ame rom aroma i lac me icika acil, kede laccere futi apar wie abic.

⁴Dirica onwoŋo popol i ottono, kun otio kede purem ame orwakere i kor apama, ame tuŋ a nen i oko diŋ, eka en ame nen iyi ot te bedo alalac.

⁵En dok te miyo gero gedo ocele i ŋe ottono kun ogero mannono i dyere, kun icika adwoŋŋere kede icika ame tye tyelo ame en icika acil meicel tye iye. I kom gedo i oko-nono en dok te gero iye icika ocele atitino ame okubere i wi wadgi, kun mom oweko kannono odoŋ ame twolo a mom ogero iye ici ka.

⁶Icika i pinyere onwoŋo lacgi tye futi abiro kede nucu pi acel acel; icika i dyere lacgi te bedo futi aboŋwen pi acel acel; eka icika imalo te bedo futi apar kede nucu pi acel acel. Cakere i piny wot malo, obedo jwiko dit a kor apama me wek ot i malo cuŋ i kom apama i piny aboŋo dok rwako arii ocele iyi apama.

⁷I kare me gedo, obedo tic i kiddi ame onwoŋo doŋ otyeko yiko oko i ka muko kiddi. Man omio i kare ame otye ka gero ot Obaŋa dwon ginnoro me nyonyo ame otio kede i toŋo onyo i payo jami mom owinyere kuno acalo anyul onyo lee.

⁸Doggola me donyo iyi icika atitino i pinnyege onwoŋo tye i tutuŋ anyarodi me ot Obaŋa, kun rwom tye me yito iyi icika i udi i dyere kede dok en ame kato i adekkere ame tye malo.

⁹Mannono en kite ame rik en ogero kede ot Obaŋa naka otum. Otio apama me wi ot ame mio ot bedo ŋie, otio apama-nono kede yen ame oririo aria kede bao me cedar ame opeto i wi yen me Cedar.

¹⁰Gedo ocele-naca omano ot luŋ, icika atitino mege ame oryeye i yore adek-ki, en ipiny kede en i dyere kede en i malo, ame bocogi cakere i dye ot piny tuno i wi ot malo romo futi abiro kede nucu pi ot acel acel kun okukuba i kom bao cedar ame oririo aria.

¹¹I kare-nono Rwot te kobbi Culeman ni,

¹²“Kop a mako ot ame igero-ni, ka ce yin ibedo lubo icwilla kun itio gin ame aciko dok daŋ igwoko cikka luŋ, itio daŋ kedgi, abino cobo i komi kop a rik aciko baŋ pappi Daudi.

¹³Dok abino bedo baŋ jona Icrael kun mom aya i akina jona Icrael kadi acel.”

¹⁴Culeman rik te gero ot Obaŋa naka tyeko.

¹⁵I kor apama i yi ot en ocacano iye bao cedar cakere i piny naka i kom apama me wi ot ame mio ot bedo aŋic; aco piny i dye ot ote cano iye bao me cipre.

¹⁶Aco icika i tyelo ame olwoŋo ni Kabedo Acil Meicel, en te gero i bao cedar, cakere piny i dye ot naka malo i kom apama me wi ot ame mio ot bedo aŋic; borrere onwoŋo romo futi pyeradek.

¹⁷Aco icika adwoŋŋere ame tye i nyim Kabedo Acil Meicel, borrere onwoŋo romo futi pyerabicel.

¹⁸Bao cedar ame onwoŋo tye i ottono, onwoŋo odedeo komgi kede cal opoko kede cal ature ame ogoro i komgi. Yi ot luŋ onwoŋo ocano iye bao cedar, ame kom kiddi ame ogero i ot mom twero nen.

¹⁹Eka tyelo ote gero iye icika acil me keto canduk me cikere a Rwot.

²⁰Kabedo acillono onwoŋo borrere tye futi pyeradek kede borrere me malo daŋ futi pyeradek, kun omwono kome oko i jabu ame olio aber. Dok ote tiyo keno lam daŋ i bao me cedar.

²¹Culeman omwono yi ot Obaŋa oko i jabu ame olio aber, te ŋolo dye ot i nyor me jabu ame en orio i nyim kabedo acil meicel ame tye tyelo ame onwoŋo daŋ omwono oko i jabu.

²²Yi ot Obaŋa luŋ onwoŋo omwono oko i jabu karacel i keno lam ame onwoŋo tye i kabedo acil ame tye i tyelo.

²³Abaka rik te miyo payo cal okerubi aryo, kun opao i yat jeituni, ote ketogi i kabedo acil meicel ame tye tyelo; okerubi acel acel onwoŋo borrere tye futi apar wie abic.

²⁴Bwomgi me tuŋ cel keken onwoŋo romo futi abiro kede nucu, tuŋ ocele daŋ abiro kede nucu; mannono omio ya i lanni bwomgi tuŋ cel tuno tuŋ ocele romo futi apar wie abic.

²⁵Bor okerubi acel acel onwoŋo tye futi apar wie abic, kun bwome daŋ tye futi apar wie abic. Gin aryo luŋ onwoŋo bocogi rorom, komgi daŋ rorom.

²⁶Bor a ŋat acel acel onwoŋo tye futi apar wie abic.

²⁷En te cibo okerubi-nono i dye ot ame tye tyelo, kun ŋat acel acel ocuŋ i ŋet awottere ame bwomgi oyarre ayara, bwom ŋat acel acel tuŋ cel ogudo kor apama tuŋ cel kede bwom a ŋat acel tuŋ ocele ogudo kor apama tuŋ ocele, eka lanni bwomgi me dyere te rwatte i dye ot.

²⁸Kom okerubi onwoŋo omwono oko kede jabu.

²⁹Kom ot luŋ ote deyo i cal okerubi, kede cal otit kede ature ame ogogoro i kom icika i yie kede icika i oko daŋ.

³⁰Dok omwono dye ot daŋ oko i jabu, kun otimo man iyi icika ame tye tyelo kede i en ame tye oko daŋ.

³¹Kika me doggola me donyo i kabedo acil onwoŋo tye aryo ame otio i bao me yat jeituni, kun arii me doggolanono luŋ kede akaragi, acel acel onwoŋo tye kede twoke abic.

³²Kika aryo luŋ ame otio i bao me yat jeituni-nono onwoŋo odeo komgi kede cal okerubi kede cal otit, kede cal ature ame ogogoro i komgi. Cal ame ogogoro-nono luŋ onwoŋo omwono oko luŋ i jabu.

³³Aco kika me doggola ame donyo iyi icika adwoŋŋere karacel kede akara mere onwoŋo otio i bao me yat jeituni, kun omio twoke tye aŋwen.

³⁴Dok ote tiyo kika aryo ame twero dolle oko, kun otio magi-nono i bao me yat cipre.

³⁵Odeo daŋ kome oko i cal okerubi, cal yat otit kede cal ature ame ogogoro i komgi, ote mwono komgi luŋ i jabu ame olilio acil meicel.

³⁶Dyekal onwoŋo ogero tuŋ nyim ot Obaŋa, ame ote guro oko kede cel ame otio i kiddi ame opao ocano i yore adek, kede bao me yat cedar yore acel.

³⁷Culeman ocako gero acakki me te ot a Rwot i mwaka me aŋwen me loccere, i dwe me aryo ame olwoŋo ni Jib.

³⁸Eka i mwaka me apar wie acel, i dwe me aboro, ame olwoŋo ni Bul, en ame tic me ot a Rwot te tum iye, kun otum aber i kite ame rik oyiko ni myero ti kede. Gedo mere otero mwakki abiro.