Read lango 1 Obakki 7 Bible Online

1 Obakki 7 - lango bible

1 Obakki 7

¹Culeman dok te gero ode en ikome, ame ticcere otero mwakki apar wie adek twal te tum.

²En ogero ot ocele ame olwoŋo ni Buŋ me Lebanon. Borrere onwoŋo romo futi mia acel kede pyerabic, eka laccere te bedo futi pyerabiro wie abic, borrere me malo te bedo futi pyeraŋwen wie abic. Pagi me ottono onwoŋo tye oryeye i yore adek, ame i yore acel acel tye iye pagi me yat cedar apar wie abic, kun arii me bao cedar obuto i wigi malo.

³Icika atitino i malo daŋ ogero i yen cedar, ame oririo obuto i wi pagi pyeraŋwen wie abic, ame oryeye i yore adek ca, kun i yore acel acel tye iye pagi apar wie abic.

⁴Bao me purem me waŋ dirica daŋ oryeo i yore adek kun dirica acel acel otikere awottere.

⁵Doggola luŋ kede dirica luŋ twokgi onwoŋo tye aŋwen aŋwen, kun dirica otikere kede dirica wadgi, ame oryeye daŋ i yore adek.

⁶Dok te gero ot ocele ame pagi tye iye apopol; borrere onwoŋo romo futi pyerabiro wie kany, eka laccere te bedo futi pyeraŋwen wie kany, kun i doggola me donyo i tuŋ nyime tye iye ot ocele atidi ame wie obuto i wi pagi.

⁷Dok te gero icika ocele ame kommere me loc bedo iye ame olwoŋo daŋ ni Ot ŋolo kop, ame en kan ame Culeman ŋolo iye kop. Ottono daŋ onwoŋo ocano bao cedar me wumo apama mere, cakere i dye ot piny tuno kede naka i kom apama i malo iyi ot.

⁸Culeman dok te gero ot ocele me bedo mere. En ogero mannono i kit gedo acellono, kun ogero i dyekal ocele i ŋe ot ŋolo kop. En daŋ dok te gero kit ot acellono pi dako mere, ame obedo nyaka abaka me Miciri, ame rik en onyomo.

⁹Udi magi luŋ, anaka ot a Rwot, cakere iyi acakki tergi piny naka i wigi malo, onwoŋo ogerogi luŋ i kiddi mogo ame welgi malo meicel, kun opaogi aber i kite ame onwoŋo rik amito ikokome; ŋegi kede yigi luŋ onwoŋo oyiko aber meicel, kun oyiko kede ocumeno.

¹⁰Iyi acakki te udi onwoŋo ogero i kiddi adoŋo, dok ame oyiko aber meicel, kiddi ocele onwoŋo romo futi apar wie aryo, kede en ocele ame romo futi apar wie abic.

¹¹I wi kiddi me acakki te ot ote keto iye kiddi ame welgi malo meicel, kun opaogi dokopimo ditogi i kite ame amito ikokome, karacel kede bao me cedar.

¹²I cel ame onwoŋo omano dyekal adwoŋ ocano iye kiddi ame opao i yore adek, eka ote tiyo bao cedar i wigi; dyekal me yie ame omano ot a Rwot, kede ot atidi ame tye i doggola me donyo i ot a Rwot daŋ ogero amannono.

¹³Abaka Culeman ocwao kwena i Turo, ote kelo lomoro ame nyiŋe Kiram, ame onwoŋo adiro i tic me mola.

¹⁴Pappere onwoŋo rik obedo dano ame oya i Turo, en daŋ onwoŋo rik obedo lo ame adiro meicel i tic me mola, cite i kare-nono onwoŋo doŋ oto oko. Tottere rik onwoŋo oya iyi atekere a Naputali. Kiram rik obedo twon lo moro aryek meicel dok daŋ onwoŋo doŋ ocwiny atek i tiyo jami luŋ ame otio i mola. En oye gamo tic ame Culeman rik olwoŋe pire, tic me loyo tic luŋ ame otio i mola.

¹⁵En otio pagi me mola aryo, kun acel acel borrere romo futi pyeraryo wie abiro, lac a kore te bedo futi apar wie aboro ka opimo i tol; yigi onwoŋo twolo, inoŋŋere onwoŋo buco romo inci adek.

¹⁶En dok te twako tok mola aryo me aketa i wigi, kun acel acel borrere romo futi abiro kede nucu.

¹⁷Dok te tiyo gin obedo bwobwo, ame okedo i nyor; otio gin aryo, acel pi tok me aketa i wi pagi acel kede acel pi en ocele.

¹⁸En te tiyo dok cal okwer pomegranat yore aryo ame omano tok me aketa i wi pagi acel acel kun bedo i wi gin obedo bwobwo ame owumo tok me aketa i wi pagi.

¹⁹Tok me aketa i wi pagi-nono rik onwoŋo odeo luŋ i cal kalaŋweka ame bocogi romo futi abicel abicel.

²⁰Ginnoro oluŋere bala gulu pii onwoŋo oketo i wi pagi aryo luŋ. Cal okwer pomegranat luŋ onwoŋo tye mia aryo pi pagi acel acel, kun ocanogi i yore aryo i dog obwo nyor i kom tok me aketa i wi pagi.

²¹Kiram rik te keto pagi aryo-nono i nyim icika ame tye i doggola ame donyo i ot Obaŋa; oketo acel tuŋ anyarolum te cako nyiŋe ni Jakin, eka te keto en ocele tuŋ anyarodi, te cako nyiŋe ni Boaj.

²²Otio cal kalaŋweka i wi pagi aryo luŋ. Mannono en kite ame rik otyeko kede tic i kom pagi.

²³Kiram dok te tiyo dero pii me mola oluŋere aluŋa ame tuttere romo futi abiro kede nucu, lac me yie futi apar wie abic, ya i doge tuŋ cel tuno naka i doge tuŋ cel; eka laccere mano kore luŋ te bedo futi pyeraŋwen wie abic.

²⁴I lak doge i piny ote ryeyo iye cal opoko mano amana, ame kan oryeo iye nono romo futi pyeraŋwen wie abic. Cal opoko-nono oryeo i yore aryo. I kare ame otio dero pii me mola, otio daŋ cal opoko i kome cutu.

²⁵En otero dero gwoko pii-nono te wot cibo i ŋe cal twoni me mola apar wie aryo, kun ocuŋ adek adek: adek oneno tuŋ anyarodi, adek oneno tuŋ anyarolum, adek oneno tuŋ to, kede adek te neno tutuŋ kide, ŋegi luŋ odok i te dero.

²⁶Inoŋ a kom dero-nono onwoŋo romo inci adek; doge ote tiyo bala dog kopo, ame rom aroma i tur kalaŋweka. Dero gwoko pii-nono onwoŋo twero donyo iye pii ame romo debe tutumia aŋwen.

²⁷Kiram dok te tiyo gadigadi me mola apar. Gadigadi acel acel onwoŋo borrere romo futi abicel, laccere daŋ futi abicel, eka borrere me malo te bedo futi aŋwen kede nucu.

²⁸Gadigadinogo rik otio kit man; opeto mola apada arorom i ŋete luŋ, kun gin luŋ okubere kede arii me mola.

²⁹I kom mola apada-nogo onwoŋo ogogoro i komgi cal eŋatu, kede cal twoni, kede cal okerubi. Arii me mola daŋ onwoŋo odeo doggi i cal nyor ame odwalo malo i wi cal eŋatu kede cal twoni, dok daŋ odwadwalo en ocele i tyengi.

³⁰Gadigadi acel acel onwoŋo tye kede tyene me mola aŋwen kede arii me mola aryo me notogi aryo aryo. Itwoke aŋwen ducu te bedo iye akwak tako lwok ame tye iyi gadigadi. Akwakkono luŋ onwoŋo odeo komgi i cal nyor ame odwalo i komgi.

³¹I doge onwoŋo tye iye ginnoro ame oluŋere aluŋa, kun ocuŋ malo i wi gadigadi ame borrere romo futi acel kede nucu, cakere i kom gadigadi dok kede malo. Doge ogurre agura kun tuttere ya i doge dok i tere piny romo futi aryo. Odeo doge-nono kede callogo ame ogogoro iye.

³²Okot tyengi onwoŋo tye futi aryo ka ocuŋ acuŋa; gin aŋwen luŋ otye i te mola apada kun arii mola okukubogi onotogi kede kom gadigadi.

³³Okot tyengi otio arom aroma okot me gadigadi lweny; jami komgi luŋ obedo mola ame olio alia.

³⁴Akwak mola onwoŋo tye i te gadigadi acel acel, ame gin luŋ okubere oko kede kom gadigadi.

³⁵I wi gadigadi acel acel onwoŋo otio iye ginnoro ame oluŋere aluŋa, ame borrere romo inci aboŋwen, dok akwak tako lwok iyi gadigadi kede mola apada luŋ okubere oko i kom gadigadi.

³⁶I kom akwak luŋ kede mola apada, ogogoro iye cal okerubi kede cal eŋatugu karacel kede cal otit-gu, kannoro ame oneno ni cal romo goye iye, ote daŋ dok dedeo oko kede cal nyor ame odwalo i ŋetgi.

³⁷Kiram otio kodi gadigadi-nono apar. Gin luŋ onwoŋo ororom dok daŋ ocacal.

³⁸Kiram daŋ dok te tiyo tako lwok apar, kun acel acel tye pi gadigadi acel acel. Tako lwok acel acel laccere onwoŋo romo futi abicel dok oromo onyo iye pii ameromo debe pyeraboro.

³⁹En te ryeyo gadigadi abic tutuŋ anyarolum me ot a Rwot, kede abic tutuŋ anyarodi, eka dero me gwoko pii en te miyo cuŋ i gul ot tutuŋ anyarolum ame dok tutuŋ kide.

⁴⁰Kiram dok te tiyo tako jobo buru apol, atok buru kede becen lwok. Kiram te tyeko tic abaka luŋ i kom ot a Rwot.

⁴¹Jami ame en otio ene: pagi aryo, tok me aketa i wi pagi daŋ aryo, ame oluŋere calo gulu, kede bwo daŋ aryo me wumo wi tok ame oketo i wi pagi.

⁴²Cal okwer pomegranat mia aŋwen pi bwo aryo-nu, eka te ryeyogi i lak bwo acel acel kun ryeogi i yore aryo, me wumo wi tok ame oketo i wi pagi aryo ca.

⁴³Dok te tiyo daŋ gadigadi apar kede tako lwok apar ame oluto iyi gadigadi.

⁴⁴Te tiyo daŋ dero gwoko pii acel, kede cal twoni apar wie aryo ame ocibo dero gwoko pii i ŋegi.

⁴⁵Jami magi luŋ ame rik Kiram otio pi abaka Culeman, gin luŋ rik otio i mola ame olilio komgi apwot meicel.

⁴⁶Abaka rik omio orio: magi luŋ i bar me kulo Jordan kan ame lobo me cweyo gulu tye iye i akina Cukot kede Jaretan.

⁴⁷Jami ame otio-nono luŋ Culeman mom omio opimogi pien onwoŋo pol meicel; mannono omio pek a mola ame otiogi kede mom ŋeye.

⁴⁸Mannono en kite ame rik Culeman otio kede jami luŋ ame tye i ot a Rwot, gin jami-nono ene: keno lam me jabu, meja me jabu pi ogati aketa i nyim Rwot,

⁴⁹acib tara me jabu ame olio aber, ame oryeo i nyim kabedo acil ame tye i tyelo, kun kany tye tutuŋ anyarolum kede kany tutuŋ anyarodi; kede cal ature apipim, karacel kede boi kwanyo mac, ame gin luŋ otiogi i jabu;

⁵⁰kede ikopo apopol, makac apopol, tako lwok daŋ apopol, tako me waŋo odok akur kede weer me lodi mac, ame gin luŋ daŋ otiogi i jabu ame olio aber; kede pata me aketa i kika me doggola ame donyo iyi icika i tyelo, ame en kabedo acil meicel, kede me aketa i kika me doggola ame donyo iyi icika adwoŋŋere me ot Obaŋa.

⁵¹Man en kite ame rik tic luŋ ame abaka Culeman otio i kom ot a Rwot otum kede. Culeman te daŋ kelo jami luŋ a rik pappere Daudi ojalo baŋ Rwot iye; okelo ryal, jabu, kede jami ocele acalo tabbi, cupa, kopo, te kanogi luŋ i ot kano lim a Rwot.