Read lango 1 Obakki 8 Bible Online

1 Obakki 8 - lango bible

1 Obakki 8

¹Culeman rik te lwoŋo odoŋe me Icrael, odoŋ atekere, kede odoŋe ame loo doggola a kwarigi, me bino baŋe i Jerucalem, me bino kwanyo canduk cikere a Rwot ame rik onwoŋo tye i paco a Daudi ame olwoŋo ni Cion.

²Jo Icrael luŋ te bino cokere baŋ abaka Culeman i kare me kwero ecuban, i dwe me Etanim, ame en dwe me abiro.

³I kare ame odoŋe luŋ me Icrael obino, olamdog doŋ te tiŋo canduk cikere a Rwot,

⁴kun jo Levi konyogi. Gin te tero candukkono kede kema me rwatte karacel kede jami acil luŋ ame rik onwoŋo tye i kema.

⁵Abaka Culeman karacel kede jo Icrael luŋ te cokere karacel i nyim canduk kono, kun oŋolo lwak rommi kede twoni apipim, ame welgi mom ŋeye, dok daŋ mom romo kwanne, me yalo Rwot.

⁶Olamdog te doŋ tiŋo canduk me cikere a Rwot tero naka i kabedo mere iyi icika acil ame tye i tyelo i ot a Rwot, ame en kabedo acil meicel, ote wot keto piny kuno i te bwom okerubi.

⁷Bwom okerubi ame oyarre te wumo candukkono oko karacel kede ludi luŋ me tiŋe.

⁸Ludi onwoŋo rik boco meicel, ame ka ŋattoro ocuŋ i kabedo acil i nyim kabedo acil meicel ame tye i tyelo, twero neno wigi, ento pe twero nen i oko; ludi-nono pwod tye kuno naka atot t in.

⁹Ginnoro ocele onwoŋo rik mom i candukkono, kono ka kiddi apada ame rik Muca okelo kuno i te kidi me Cinai, kan ame Rwot rik ocikere iye i jo Icrael i kare ame gin oya i Miciri.

¹⁰I kare ame olamdog oya i kabedo acil, pol obino te poŋ ot a Rwot oko.

¹¹Mannono omio olamdog mom dok romo tiyo ticgi i ot a Rwot pi pollono, pien kwogo a Rwot onwoŋo doŋ opoŋ iyi ot oko.

¹²Abaka Culeman te cako kwayo Obaŋa kun kobo ni, “Rwot doŋ okelo cen i polo, ento en oyero gire bedo i pol acol icuc.

¹³Agerri doŋ twon ortoro amalo meicel, me bedo kabedoni nakanaka.”

¹⁴Abaka Culeman te doŋ lokere neno lwak, eka te lamo winyo i kom jo Icrael luŋ, kun jo tye ame ocuŋ gigi mot.

¹⁵Abaka te kobo ni, “Pwo wunu Rwot Obaŋa me Icrael! Pien en ikome omio gin a rik eciko i doge baŋ pappa Daudi ocobere, ame en rik okobo ni,

¹⁶‘Cakere i kare ame akwanyo jona Icrael i lobo Miciri, mom ru ayero boma moro iyi atekere me Icrael luŋ me gero ottoro iye, kan ame amito ni wora iye; ento an ayero Daudi me loyo lwakka Icrael.’ ”

¹⁷Culeman te medde kobo ni, “I kare-naca pappa Daudi obedo kede tam i cunye me gero ot me woro Rwot Obaŋa a jo Icrael.

¹⁸Cite Rwot en ame rik te juko pappa kun kobbe ni, ‘Itimo ber me bedo kede tam me gero ot me wora,

¹⁹ento mom yin en ame ibino gerra ot, wodi ame ibino nywalo en ame bino gero ot me wora.’

²⁰Nen Rwot doŋ otyeko miyo gin a rik eciko ocobere oko; pien en omio an aleo kaka pappa Daudi acalo abaka me Icrael, kite ame Rwot ociko-naca, dok daŋ doŋ atyeko ot me woro Rwot Obaŋa me Icrael.

²¹Dok daŋ atyeko keto ka gwoko canduk a Rwot i ode-naca, canduk ame tye iye kiddi apada aryo me cikere ame rik Rwot ocikere kede i kwariwa, i kare ame kwanyogi i lobo me Miciri.”

²²Culeman te ya wot cuŋ i nyim keno lam kun lwak jo Icrael luŋ tye aneno, te taŋo ciŋe malo i polo,

²³okwao Rwot kun kobo ni, “Ama Rwot Obaŋa a jo Icrael, mom dok tye Obaŋa moro ocele ame cal kedi, akadi malo i polo onyo piny i wi lobo, ame gwoko cikere mere calo yin, yin ame inyuto marri baŋ omironi luŋ ame lubi kede cunygi luŋ.

²⁴Ibedo lubo ginnoro luŋ ame rik ititti pappa Daudi; gin ame yin rik ikobo kede dogi, aman doŋ yin ikomi icako miyo cobere oko, dok daŋ tye acobere luŋ kakare.

²⁵Ama Rwot Obaŋa a jo Icrael doŋ ityeko giri lubo ginnoro luŋ ame rik ikobo baŋ pappa Daudi ni, ‘Mom gire ibino bedo aboŋo akwarri moro i wi kom me loc me Icrael, tekki ikwaeni bino bedo jo ame kitegi beco, kun otio gin ame an amito, kite ame yin ibedo tiyo kede-ni.’

²⁶Ama Obaŋa me Icrael, tim ber aman doŋ imed moko koppi-naca ba, ame rik ikobo baŋ pappa Daudi, me bed kit ame rik ikobo kede.

²⁷“Ento Obaŋa bino bedo piny i lobo kan ateni? En ame kadi polo twal mom daŋ romme-nie, kara doŋ ot ame ogero-ni twero romme niŋo?

²⁸Kadi amannono ba, tim ber iwiny kwacca, an amironi, abako doga Ama Rwot Obaŋa, tim ber iwiny kokona kede kwacca ame akelo i nyimi tin-ni.

²⁹Tim ber inen ot man dyewor kede dyeceŋ, kabedo man ame yin iyero me bedo kan ame myero jo wori iye. Tim ber iwiny kwacca ame akelo i nyimi i ot man.

³⁰Winy kwacca kede kwac a joni Icrael ka ce gin okwao i ot man. Winy ba, Ama Rwot, i kabedoni ame tye malo i polo dok daŋ i timwa kica i kom balwa.

³¹“Ka ce ŋattoro otimo balloro baŋ dano wadgi, eka ote kele kan i nyim keno lam me en kwoŋ iye,

³²Ama Rwot, tim ber iwiny i kabedoni i polo ite ŋolo kop iyi akina omironi. Mi can pot i kom abalo, kun imio ŋat a kopporo mom i kome lo kop.

³³“Ka ce okwor a joni Icrael oloogi oko pi balloro ame gin obalo i nyimi, ka ce oŋut ote dwogo baŋi, ote bino paki i ot man, kun obako doggi baŋi,

³⁴tim ber iwiny kwacgi i kabedoni ame tye malo i wi polo. Tim joni kica i kom balgi ite dwoggogi i lobo a rik imio baŋ kwarigi.

³⁵“Ka ce joni Icrael otimo balloro baŋi eka ite keto can i komgi, kun itwonogi kot oko, icennere gin te ŋut, ote dwogo kwayi i ot man kun daŋ opako nyiŋi,

³⁶tim ber iwiny kwacgi i kabedoni ame tye malo i wi polo. Tim ber itim omiro-ni kica i kom balgi ame gin obedo joni Icrael. Pwonygi me bedo i kit kwo ame yin imito, mi kot cwe i loboni, ame rik imio baŋ joni Icrael me bedo lobogi doŋ atwal.

³⁷“Ka ce kec opoto i lobo onyo two edeke onyo ceŋ alyet otwoo kal oko, onyo oner oko, onyo kit kudi mogo ocele en ocamo; onyo ka okwor oero lweny i kom joni, onyo ka two moro ocele en ame opoto i akinagi,

³⁸tim ber iwiny kwacgi. Ka ce ŋattoro keken i akina joni Icrael ame cunye ocwer obino ocwalo kwaccere baŋi i ot man, onyo jo Icrael luŋ ocwalo kwacgi baŋi,

³⁹tim ber iwiny kwacgi. Winy kwacgi i kabedoni ame tye malo i wi polo, timgi kica, ite timo gin ame ineno ni porre pire onyo pirgi, i kom gin ame gin okwao. Yin keni giri iŋeo gin ame tye i cuny dano acel acel; pi mannono, yin timmi ŋat acel acel gin ame ineno ni porre pire,

⁴⁰me joni Icrael bed kede lworo i komi i kare luŋ ame gin tye i lobo ame rik imio baŋ kwarigi.

⁴¹“Ka ce arokkoro ame mom obedo dano me Icrael owinyo piri,

⁴²kede pi gigi mogo adoŋodoŋo ame ibedo timo baŋ joni Icrael, eka te bino i ot man pi bino wori, kun oya i lobo aber,

⁴³tim ber iwiny kwaccere i kabedoni ame tye malo i wi polo. Tim ber iti gin ame en okwai pire, me jo me wi podo luŋ ŋei ote bedo kede lworo i komi ame rom aroma kede joni Icrael. Mannono bino miyo gin ŋeo ni ot an agero kan piri-ni en ame obedo kan ame myero wori iye.

⁴⁴“Ka ce yin iciko joni me wot lweny okworgi, ka ce gin okelo kwacgi i nyimi i kan ame gin tye iye kuno, kun nyimgi oneno kabedo ame yin en iyero, kede ot ame an agero piri-ni,

⁴⁵tim ber iwiny kwacgi, i kabedoni ame tye malo i wi polo, ite miyogi loyo okworgi oko.

⁴⁶“Ka ce joni Icrael opoto i bal i nyimi, pien mom tye dako moro kadi acel a mom timo bal, eka akemo te maki i komgi, ite miyo okworgi loyogi oko, te daŋ terogi oko acalo opii i lobo moro ocele ame tye kan abor onyo ame tye kan aceggi;

⁴⁷cite ka ce i kare ame gin tye kuno cunygi te kolo piny, ote ŋut, ote kwayi kun otuco balgi i nyimi, kun oye ni kitegi oballe oko pi gin arac ame gin obedo timo, tim ber iwiny kwacgi, Ama Rwot.

⁴⁸Ka ce i kare ame gin otye i lobo ame oterogi iye acalo opii, gin te ŋut kun oŋut ateteni i cunygi ducu, ote kwayi i kuno kun tuŋ nyimgi oneno lobo man ame yin rik imio baŋ kwarigi, kede kabedo man ame yin giri en iyero, kede ot ame an agero piri-ni,

⁴⁹tim ber iwiny kwacgi, i kabedo ni ame tye malo i polo, ite timogi kica i kom balgi.

⁵⁰Timgi daŋ kica pi jem i komi, imi jo ame oterogi iyi opii bed kedgi aber.

⁵¹Gin obedo joni ame yin rik ikwanyo i lobo me Miciri, kun iwotogi i kom mac alyet.

⁵²“Ama Rwot Obaŋa, tim ber i kare ducu iwiny kwacca kede kwac a joni Icrael i kabedo ducu ame gin tye iye, kur iwir waŋi teŋe ka ce gin okok baŋi.

⁵³Yin yam doŋ iyerogi oko i akina rok ocele me wi podo, me gin bed joni ikome, kite ame rik yin imio amironi Muca okobo i kare ame rik ikwanyo kwarigi i Miciri, Ama Rwot Obaŋa.”

⁵⁴I kare ame Culeman doŋ otyeko kwayo Rwot, en oya oko i nyim keno lam, kan ame en onwoŋo orumo iye kun otino ciŋe malo i polo.

⁵⁵En oya malo te cako lamo winyo i kom lwak luŋ ame onwoŋo ocokere kaci-naca, kun redo i dwon aloŋo ni,

⁵⁶“Myero pwo Rwot ame omio jo mere Icrael kuc, kite ame en rik ociko kede. Kopporo luŋ ame en rik ociko, mom tye moro iye ame mom ocobere kite a rik en okobo baŋ amiro mere Muca.

⁵⁷Rwot Obaŋawa myero medde bedo kedwa kite ame en rik obedo kede kwariwa; en myero kur ya i baŋwa onyo wekwa ata;

⁵⁸en myero miwa obed jo ame winyo kun otio gin ame en mito, dok daŋ ogwoko cikere kede ginnoro luŋ ame en rik ociko onyo okobo baŋ kwariwa.

⁵⁹Dyeceŋ kede dyewor Rwot Obaŋawa myero poyo kwacca ame akelo i nyime-ni luŋ. Myero nino i nino en kony jo Icrael kede abakagi, kun timo gin a mitte.

⁶⁰Mannono bino miyo rok luŋ me wi podo ŋeo ni Rwot kene en obedo Obaŋa, Obaŋa moro ocele doŋ pe.

⁶¹Rwot myero miwu ibed wunu jo ame geno Rwot Obaŋawu i cunywu luŋ, kun itio wunu gin ame en mito dok daŋ igwoko wunu cikkere luŋ, kite ame itye wunu ka timo i kare man.”

⁶²Abaka kede jo Icrael luŋ a rik tye kuno te yalo Rwot.

⁶³Culeman oyalo Rwot i mot me kweyo cuny, twoni tutumia pyeraryo wie aryo, kede rommi tutumia mia acel i pyeraryo nono. Abaka karacel kede jo Icrael luŋ akwero ot a Rwot kittono.

⁶⁴I nino-nono daŋ abaka okwero iye dyekal ame tye i nyim ot Obaŋa. En oyalo Rwot kuno i mot awaŋa, kede mot me moko kwon kede mot me dwol leyi ame oya i kom mot me kweyo cuny, pien keno lam me mola ame onwoŋo tye i nyim ot Obaŋa onwoŋo mom romo yalo mot magi luŋ iye.

⁶⁵Culeman kede jo Icrael luŋ te kwero ecuban; gin te bedo i nyim Rwot Obaŋawa nino abiro. Jo Icrael ame onwoŋo okwero ecubannono onwoŋo dwoŋ meicel, jo luŋ ame onwoŋo oya i dog yo ame woto Kamat tuno kede naka i kulo me Miciri.

⁶⁶I nino me kany wie adekkere, Culeman te cwayo doŋ lwak dok i paccigi. Jo luŋ te pwoyo abaka, ote wot i paccigi kun cunygi yom atek meicel pi jami abeco luŋ ame Rwot otimo pi amiro mere Daudi kede lwakkere luŋ ame gin jo Icrael.