Read lango 1 Obakki 9 Bible Online

1 Obakki 9 - lango bible

1 Obakki 9

¹Kare ame Culeman doŋ otyeko gero ot a Rwot, kede ot abaka, kede udi ocele luŋ ame rik en amito,

²Rwot dok omedo nen baŋe tyen me aryo mere, kite ame rik koŋ onen kede baŋe i Gibeon ca.

³Rwot okobbe ni, “Atyeko doŋ winyo kwacci luŋ ame ikwao. Atyeko lonyo ot ame igero-ni me bedo kabedo acil kan ame jo bino wora iye nakanaka. Wia mom bino wil iye kadi acel.

⁴Aco yin ba, ka ce yin ibino tic baŋa kite ame pappi Daudi obedo timo, kun yii ler dok daŋ atira, ce ibedo tiyo gin ame aciko luŋ, kun igwoko daŋ cikka luŋ,

⁵an abino moko locci i Icrael bedo atwal, kun a gwoko gin a rik aciko baŋ pappi Daudi kare ame akobbe ni, ikwae en ame bino loyo jo Icrael nakanaka.

⁶Ento ka ce yin onyo ŋattoro iyi akina ikwai ogak oko iyo apat kun mom dok luba dok daŋ mom tio gin ame aciko, mom daŋ mako cikka ducu, eka ite kobo wunu oko baŋ obaŋe ocele kun daŋ dok iworogi wunu,

⁷an abino kwanyo jona Icrael oko i lobo ame rik amiogi. Ot man ame doŋ atyeko lonyo obedo acil me wora-ni daŋ abino weko ata, dok abino miyo jona Icrael doko gin ame rok luŋ lolo i doggi, kun oceko kop i komgi.

⁸Ot man bino doko twon wi oburroro oyido ibim, ame jo luŋ ame bino beo i ŋete bino wuro awura kun ojwiye kengi kengi okobo ni, ‘Ŋo kara omio Rwot otimo lobo man kede ot man kit man ba?’

⁹Jo ocele bino kobo ni, ‘Pien jo Icrael oweko Rwot Obaŋagi oko ata, ame rik okwanyo kwarigi i lobo me Miciri, gin gigi dok olunyo kobo baŋ obaŋe mogo ocele, kun oworogi dok daŋ otio tic pirgi. Mannono en omio Rwot oketo twon can agwa wok-ki i komgi.’ ”

¹⁰Gero ot Obaŋa kede me abaka oterri Culeman mwakki pyeraryo twal me tumo

¹¹Abaka Kiram me Turo en obedo miyo Culeman bao me cedar kede bao cipre luŋ karacel kede jabu ame onwoŋo en mito. Kare ame tic me gedo doŋ otum, Culeman omio Kiram pacci ame romo pyeraryo twal i lobo me Galilaya.

¹²Cite i kare ame Kiram oya i Turo te bino i pacci-nono, en onwoŋo ni pacci ame omie-nono mom yomore cunye.

¹³En te kobbi Culeman ni, “Ominna, man en kit pacci ame yin imia?” Man omio kan ame rik omio Kiram-nono luŋ pwod olwoŋo ni Kabul naka atot tin, ame te koppere ni, “Konygi mom.”

¹⁴Kiram onwoŋo rik ocwayi Culeman jabu ame pekkere romo tan abic ame romo poŋo lori adittere me kare-ni.

¹⁵Abaka Culeman obedo rono jo arona i tic me gero ot Obaŋa kede mere, kede Millo, karacel kede cel me Jerucalem. Otio daŋ amannono i kare ame gero pacci me Kajor, Megido kede me Gejer.

¹⁶Parao abaka me Miciri onwoŋo rik owoto olwenyo i kom boma me Gejer te mako oko, eka te waŋo bomagi-nono oko. Doŋ kare ame Culeman onyomo nyare, en te miyo boma-nono acalo mot ame omio i kare me nyomere,

¹⁷eka Culeman te dok gero. Culeman orono daŋ jo pi gero boma ame olwoŋo ni Bet-Koron Apiny,

¹⁸kede Baalat, kede Tamar, ame tye i tim i lobo me Juda,

¹⁹kede boma luŋ ame rik ogwoko iye cam a Culeman, kede boma luŋ ame ogwoko iye gadigadi me mony kede boma a wegi aguragura, kede kit gedo ocele luŋ ame en rik omito ni ger i Jerucalem, i Lebanon, kede i lobo luŋ ame en onwoŋo loo.

²⁰Jo ame en obedo rono i tic me gedo obedo jo luŋ ame odoŋ i kin jo Periji, jo Kivi, kede jo Jebuc, ame gin mom obedo jo Icrael.

²¹Ikwaegi ame rik jo Icrael mom oneko i kare ame gin gamo lobogi me bedo meggi, gin en ame Culeman obedo rono i tic kite ame pwod otye ka ronogi i tic naka atot tin.

²²Culeman mom otio i jo Icrael ikokome acalo opii; gin obedo ocirikale, odoŋe a loo tic apapat, kede odoŋe me mony, kede odoŋe me gadigadi lweny, kede oŋwec aguragura abaka.

²³Odoŋe ame loo tic apapat me gedo ame rik Culeman oketo rik romo mia abic kede pyerabic. Jo-ni en ame obedo loyo tic luŋ ame Culeman otio.

²⁴Kare ame dako a Culeman ame obedo nya jo Miciri odak oko i ode ame Culeman ogerre, Culeman te dok gero Millo.

²⁵Culeman rik te bedo yalo Rwot tyen adek i mwaka acel, kun yalo Rwot i mot awaŋa kede mot me kweyo cuny i wi keno lam ame en ocano me yalo Rwot. En daŋ obedo waŋo mot a ŋwece kur me yalo Rwot. Mannono kite ame en rik otyeko kede tic me gero ot a Rwot.

²⁶Abaka Culeman daŋ rik otio mel apipim i paco me Ejion-geber ame ceggi kede Elat i dog nam Arema, i lobo Edom.

²⁷Abaka Kiram rik te cwayo jo mere ame gin odiro i nam, gin te wot tic i mel ame otio-nono kun otio karacel i jo a Culeman.

²⁸Gin rik te wot i melenogo naka i Opir ote wot kelo jabu i kuno, ame pekkere onwoŋo buco romo tan apar wie abic; romo poŋo lori adito me kare-ni adek gin te kelo jabu-nono luŋ baŋ abaka Culeman.