Read lango 2 Obakki 1 Bible Online

2 Obakki 1 - lango bible

2 Obakki 1

¹I kare ame Akab abaka me Icrael doŋ otyeko to oko, jo me Moab te cako jem oko i kom Icrael.

²Akajia abaka me Icrael onwoŋo orette piny i waŋ dirica me icika mere i malo i Camaria, eka te wanne atetek. I kare ame en tye ka twoye, en ocwao kwena me wot penyo Baal-jebub, kun kobbigi ni, “Wot ipeny wunu Baal-jebub ame obedo obaŋa a jo Piriciti ame tye i boma me Ekron, me en mia aŋe ka ce abino caŋ i two man onyo pe.”

³Ento amalaika a Rwot te kobbi Elia, ame obedo adwarpiny, ame onwoŋo obedo dano me Ticibe, ni, “Ya malo i wot irwatte kede okwena abaka me Camaria, iwot ikobbigi ni, ‘Piŋo kara i wot wunu penyo kop i baŋ Baal-jebub, obaŋa me Ekron? Wun itamo wunu ni Obaŋa pe iyi Icrael bo?’

⁴Wot ikobbi wunu abaka ni, Rwot okobo ni, ‘Yin mom ibino caŋ i twoni-nono, ento ibino to gire oko.’ ” Elia daŋ te cako wot kite ame Rwot okobbe kede,

⁵okwena te dok cen baŋ abaka. Abaka te penyogi ni, “Piŋo kara idwogo wunu cen?”

⁶Gin te gamo ni, “Wan orwatte i dano moro i yo ame te kobbiwa ni Rwot okobo ni wan odwog cen baŋi yin abaka ame i orowa, obin okobbi ni, ‘Piŋo kara icwao okwena me wot penyo Baal-jebub obaŋa me Ekron? Wun itamo wunu ni Obaŋa pe iyi Icrael bo? Pi gin itimonono mom ibino caŋ i twoni-nono, ento ibino to gire oko.’ ”

⁷Abaka te dok penyogi ni, “En dano ame irwatte wunu, te kobbiwu koppono, onwoŋo calladi?”

⁸Gin te gamo ni, “En onwoŋo oruko boŋo ame obedo yeyer kun otweo pyere kede del.” Abaka te koboni, “Mannono Elia enno, ame obedo dano me Ticibe.”

⁹Abaka dok te cwayo adwoŋ ame onwoŋo telo mony ame onwoŋo loo jo pyerabic karacel kede jo mere me wot baŋ Elia. Gin te wot naka baŋ Elia, ote nwoŋe tye obedo i wi kidi, ote kobbe ni, “Dano Obaŋa we, abaka okobo ni myero iwot baŋe.”

¹⁰Ento Elia te gamo dog adwoŋ me mony ame loo jo pyerabic ni, “Ka ce abedo dano Obaŋa wek acik mac ya i polo me waŋwu oko, yin karacel kede joni pyerabic.” Obaŋa daŋ te cwalo mac i polo te waŋogi oko ducu, en karacel kede jo mere pyerabic.

¹¹Abaka dok te cwalo adwoŋ me mony ocele ame onwoŋo daŋ loo jo pyerabic, te wot daŋ i wi kidi malo baŋ Elia, kun woto karacel i jo mere luŋ, te kobbe ni, “Dano Obaŋa we, abaka okobo ni myero iwot baŋe oyotoyot.”

¹²Elia te kobo ni, “Ka ce an abedo dano Obaŋa, wek acik mac ya i polo me waŋwu oko, yin karacel kede joni pyerabic.” Obaŋa daŋ te cwayo mac i polo ame te waŋogi oko gin ducu, en karacel kede jo mere pyerabic.

¹³Abaka dok te cwayo adwoŋ me mony me adekkere karacel kede jo mere pyerabic. En te wot naka i wi kidi malo, te wot rumo piny i nyim Elia, te bako doge baŋe ni, “Ama dano Obaŋa we, tim ber kur ineka an karacel kede jona luŋ, mi kwowa bed gin a pire dit i nyimi.

¹⁴Pien odoŋe me mony aryo ame otelo nyima karacel kede jogi pyerabic ame mac oya i polo owaŋogi oko ducu; ento aman akwai tim ber imi kwona bed gin a pire dit i nyimi.”

¹⁵Amalaika a Rwot te kobbi Elia ni, “Wot karacel kede; kur ilwore.” Elia daŋ te ya wot karacel kede naka baŋ abaka,

¹⁶te kobbi abaka ni, “Rwot okobo ni, ‘Pien yin icwao okwena me wot penyo Baal-jebub, obaŋa me Ekron, pien yin onwoŋo itamo ni Obaŋa pe iyi Icrael bo, ame myero ipeny? Pi gin itimo-nono omio mom ibino caŋ i twoni-nono, ento ibino to gire oko.’ ”

¹⁷Abaka Akajia te to oko kit ame Rwot omio Elia okobo kede. Ominnere Jekoram en ame te leyo kakare acalo abaka i mwaka me aryo me loc a Jekoram wot a Yekocafati, abaka me Juda, pien Akajia onwoŋo rik mom tye kede wode moro.

¹⁸Kop ocele luŋ ame odoŋŋere i kom Akajia kede gin ame en otio a mom ocoo kan, gin luŋ tye ocoo i buk me Tekwaro ame tito kop i kom oloc me Icrael.