Read lango 2 Obakki 10 Bible Online

2 Obakki 10 - lango bible

2 Obakki 10

¹Awobe Akab rik onwoŋo tye pyerabiro ame bedo i boma me Camaria. Yeko rik te coyo waraga, cwayo i Camaria baŋ odoŋe ame loo kuno kede baŋ odoŋe ame onwoŋo gwoko awobe Akab, kun kobo ni,

²“Wun en ame ibedo wunu jo ame gwoko awobe abaka, dok daŋ itye wunu kede gadigadi lweny, kede aguragura, kede jami ocele me lweny, kun bomawu daŋ gire ocelo oko atek. Doŋ ba, ka ce waraga man otuno baŋwu,

³myero iru yero wunu awobi moro acel aber i kom awobe abaka ame romo loc, me ikete wunu bed abaka le ka pappere wun doŋ ite bedo lweny wunu pire kede pi jo me ot Akab.”

⁴Odoŋe me Camaria rik te bedo kede lworo meicel, kun okobo ni, “Kara wan obino cuŋ i nyim Yeko i yore aŋo kun loye rik oloo obakki aryo ca oko?”

⁵Man omio odoŋe ame loo paco abaka kede odoŋe ame loo boma, kede jo adoŋo me bomanono, kede odoŋe ame rik gwoko awobe abaka ote cwayo kop baŋ Yeko kun okobo ni, “Wan gire obedo omironi, daŋ otyeko yikere me timo ginnoro luŋ ame yin ibino kobo. Cite wan mom obino keto abaka moro, yin gire myero itim gin ame ineno ni ber baŋi.”

⁶Yeko rik dok te coyo waraga ocele, kun kobo ni, “Ka ce wun itye wunu tutuŋ baŋa, dok daŋ iyikere wunu me tiyo gin ame abino kobo, myero diki i kodi caa-ni ikel wunu awobe adwoŋwu i Jejreel baŋa kan.” Awobe abaka ame romo pyerabiro rik onwoŋo bedo baŋ jo mogo me boma-nono, kun gin en ame gwokogi.

⁷Kare ame waraga a Yeko otuno baŋgi, odoŋe me Camaria te mako awobe abaka neko oko luŋ, gin luŋ jo pyerabiro, ote coko wigi keto i dita, ote tero naka i Jejreel baŋ Yeko.

⁸Kare ame otitti Yeko ni doŋ otyeko kelo wi awobe abaka luŋ, en okobo ni myero wot can wigi i yore aryo i dog cel me boma ame jo donyo kede i boma, ote weko bedo kuno tuno naka odiko.

⁹I kare ame en owoto kuno odiko, en okobo baŋ jo ame onwoŋo rik tye kuno ni, “Wun gire mom itye wunu i balloro i kom to abaka. An en ame ayiko kop me neko abaka, daŋ doŋ atyeko neke oko. Cite ŋa ame oneko jo man luŋ?

¹⁰Myero iŋe wunu ateteni ni kop ame Rwot oko bo mom ke nono. Kop luŋ ame rik Rwot okobo i kom jo me ot abaka Akab bino cobere luŋ; pien Rwot otyeko tiyo gin ame rik amiro mere Elia okobo.”

¹¹Yeko dok te medde neko jo me ot Akab luŋ ame odoŋ ame onwoŋo bedo i Jejreel karacel kede omiro mere adito kede owote mere kede olamdoggere; onekogi luŋ ame moro acel i akinagi mom odoŋ.

¹²Yeko te ya i Jejerel wot i Camaria. I kare ame onwoŋo en tye iyo, i kabedo moro ame okwat cokere iye i Beteked,

¹³en te rwatte kede jo mogo ame obedo jo me doggola Akajia, abaka me Juda; en te penyogi ni, “Wun ibedo wunu jo mene?” Gin te gamo ni, “Wan obedo jo me doggola Akajia, owot i Jejreel me wot moto itino a Jejebel kede itino abaka ocele mege.”

¹⁴Yeko te kobbi jo mere ni, “Mak wunugi akwo.” Gin te makogi, ote nekogi i ŋet burroro ame onwoŋo tye kuno, i Bet-eked. Gin luŋ onwoŋo romo jo pyeraŋwen wie aryo, onekogi luŋ aboŋo weko moro i akinagi bwot.

¹⁵Yeko te ya i kuno te wot rwatte i Yekonadab wot a Rekab ame onwoŋo tye abino me bino rwatte kede. Yeko omote, te penye ni, “Tammi rom aroma i mega? Ibino ye konya?” Yekonadab te gamo ni, “Abino timo amannono.” Yeko te gamo ni, “Ka ce ibino timo amannono cwa ciŋi baŋa.” Yekonadab te cwayo ciŋe, Yeko te tiŋe i wi gadigadi mere,

¹⁶kun kobo ni, “Bye owot karacel, me inen i waŋi kite ame akemo maka kede pi Rwot.” Gin te wot karacel naka i Camaria.

¹⁷Kare ame gin otuno kuno. Yeko te neko wati Akab luŋ, ame rik odoŋ, kun mom weko moro i akinagi bwot, kite ame rik Rwot okobo baŋ Elia.

¹⁸Yeko rik te lwoŋo jo me Camaria luŋ karacel, te kobbigi ni, “Abaka Akab rik onwoŋo woro Baal wok, an abino woro meicel ame kate oko.

¹⁹Pi mannono myero ilwoŋ wunu odwarpiny a Baal luŋ, kede jo ame woro Baal luŋ karacel kede olamdoggere ducu, ikel wunugi baŋa kan; gin luŋ myero obed tye, ŋattoro i akinagi kur rweny, pien an atye i mot a pire tek meicel ame amito yalo i Baal. Dano ame bino bedo pe i akinagi, mom bino kwo.” Man onwoŋo ryeko ame Yeko otio kede me wek enek jo ame woro Baal ducu,

²⁰Yeko dok te kobo ni, “Lwoŋ wunu jo pi kwero nino adit me woro Baal.” Rik daŋ ote lwoŋo cokerenono,

²¹Yeko rik ocwao kwena oromo yi Icrael luŋ, jo ame woro Baal luŋ te bino ame ŋattoro mom odoŋ kadi acel. Jo doŋ te cako donyo i ot me woro Baal, ame ot me woro Baal te poŋ ibim.

²²Yeko te kobbi odoŋe ame onwoŋo loo boŋŋi me woro ni myero ter boŋŋi wot mi baŋ jo. Ote daŋ kelligi boŋŋi me aruka,

²³Yeko te donyo i ot me woro Baal gin kede Yekonadab wot a Rekab, eka te kobbi jo ame woro Baal ni, “Koŋ iŋi i akinawu, me inen wunu ka ŋattoro ame woro Rwot mom tye i akinawu kono ka jo ame woro Baal keken.”

²⁴En doŋ te donyo me wot yalo Baal i mot aŋola kede mot awaŋa. En onwoŋo okano jo ame romo pyeraboro oko i ŋe ot me woro Baal kun ocikogi ni, “ŋat ame bino weko dano moro acel i akina jo ame woro Baal bwot, kwo mere en ame bino leyo kaka me a dano-nono.”

²⁵I kare ame Yeko doŋ otyeko yalo Baal oko i mot awaŋa, en okobbi jo ame gwoke kede odoŋe a loogi ni, “Dony wunu i ot me inekgi wunu oko ducu; ŋattoro i akinagi myero kur bwot.” Gin te donyo i ot ote woto palegi me romo ote nekogi kede oko ducu; ote wayo komgi cwalo oko. Gin dok te kato i cika i tyelo,

²⁶ote wot kelo kiddi me woro Baal ame onwoŋo tye iye kuno, ote waŋo oko i mac.

²⁷Ote mumuko kidi me woro Baal kede ot a Baal, ote loko kannono doko ot coron, ame tye kittono naka atot tin.

²⁸Yeko rik te jwayo woro Baal i lobo a jo Icrael kittono.

²⁹Ento Yeko mom te weko lubo kit a Jeroboam wot a Nebat, ame rik omio jo Icrael otimo bal, ame en bal me woro otino twoni ame otio i jabu ame rik tye i Betel kede i Dan.

³⁰Rwot te kobbi Yeko ni, “Pien yin ityeko timo gin a tye atira nyima kun itimo jo me ot Akab i ginnoroluŋ ame onwoŋo an amito, mannono omio ikwai bino bedo i wi kom me loc iyi Icrael naka i kom lwagi me aŋwennere.”

³¹Cite Yeko rik mom te bedo gwokere i lubo cik a Rwot Obaŋa me Icrael i cunye ducu; en mom oweko lubo bal a Jeroboam, ame omio jo Icrael otimo bal.

³²I kare-nono Rwot te cako kwanyo lobo mogo oko i kom lobo me Icrael. Abaka Kajael me Curia olwenyo i jo Icrael te loyo lobo me Icrael luŋ,

³³ame rik onwoŋo tye tutuŋ kide me Jordan kun mao iye lobo me Gilead ducu kede lobo a jo Gad, kede me a jo Reuben karacel kede me a jo Manace, cakere i Aroer ame tye i ŋet kulo Amon, omao lobo Gilead kede Bacan luŋ.

³⁴Kop ocele luŋ i kom Yeko ame mom ocoo kan, ginnoro ducu ame en otio kede teko mere ducu, gin luŋ tye ocoo i buk me Tekwaro, ame tito kop i kom oloc me Icrael.

³⁵Yeko rik doŋ te to te wot weo karacel i kwari mere, ote yiko kome i Camaria. Wode Yekoyakaji en ame te leyo kakare.

³⁶Yeko oloo jo Icrael i Camaria mwakki pyeraryo wie aboro.