Read lango 2 Obakki 11 Bible Online

2 Obakki 11 - lango bible

2 Obakki 11

¹I kare ame Atalia tota abaka Akajia oŋeo ni wode doŋ oto oko, en te neko jo luŋ me ot abaka.

²Ento wot Akajia ame olwoŋo ni Yowaci keken en ame te bwot. Rik onwoŋo myero neke oko, ento Yekoceba nyaka abaka Joram ame obedo amin Akajia, te kwale oko i akina awobe abaka ame rik onwoŋo otye aneko, te wot kane oko karacel kede apidi mere iyi icika moro me buto. Yekoceba okane kittono, omio Atalia mom onwoŋe, en te bwot a mom oneke.

³Yekoceba te bedo gwoko Yowaci pi mwakki kanyape kun kano i ot a Rwot, ento i kare-nono Atalia en ame onwoŋo tye acalo abaka a dako.

⁴Cite i mwaka me abiro mere Yekoyadi alamdog, te cwayo kwena baŋ odoŋe ame onwoŋo loo mony, ame rik telo jo mia mia me a jo Kari kede okur piny, te miyo terogi i ot a Rwot kan ame en te cikere iye kedgi, kun miogi okwoŋo akwoŋa i ot a Rwot kun, i kare ame en onyuttigi wot abaka.

⁵En ocikogi ni, “Gin ame ibino timo wunu ene: Ka kare me ticwu oromo i nino me cabit, acel me adek i komwu bino kuro dog ot abaka;

⁶acel me adek i komwu bino kuro doggola me Cur, eka acel me adek i komwu ame odoŋ bino kuro dogcel karacel okur piny ocele.

⁷Dul aryo ame bino i dog ticgi i nino me cabit, gin bino kuro ot a Rwot, kun gwoko abaka.

⁸Gin bino guro abaka Yowaci dyere kun ŋat acel acel omako jami me lwennyere i ciŋe. Ka ce dano moro obino baŋgi te temo beo i akinagi, dano-nono myero nek oko. Gin bino bedo baŋ abaka i kabedo ducu ame en bino wot iye.”

⁹Odoŋe ame telo mony te bino lubo ginnoro luŋ ame Yekoyadi alamdog ocikogi iye; adwoŋ me mony acel acel okelo jo mere baŋe, jo ame bino giko ticgi i ceŋ cabit, kede jo ame bino cako ticgi i nino me cabit. Gin luŋ okelogi baŋ Yekoyadi alamdog.

¹⁰Alamdog te miyo odoŋe ame loo mony toŋi, kede kwode ame rik onwoŋo obedo me abaka Daudi kun ogwoko i ot a Rwot.

¹¹En te keto okurpiny, omiogi ocuŋ kun ŋat acel acel omako jami lwennyere i ciŋe, kun oguro ot dyere cakere ituŋ anyarolum tuno kede naka tuŋ anyarodi, ame oguro keno me lam kede ot daŋ.

¹²Yekoyadi doŋ te cako kelo Yowaci wot abaka, te keto tok me kwogo i wie, ote miye daŋ buk me cik ame mako kop i kom loc acalo abaka. Rik doŋ ote oonyo moo i wie me kwere bedo abaka, ote tuco doŋ kannaler ni en obedo abaka. Jo te redo kun obapo ciŋgi kun okobo ni, “Kom abaka bed ayot nakanaka!”

¹³Kare ame Atalia owinyo okur piny karacel kede lwak tye ka wo, en owoto baŋgi kuno i ot a Rwot.

¹⁴Kare ame en obolo waŋe kuno, oneno abaka tye ocuŋ i ŋet pagi, kite ame abaka kare luŋ cuŋ kede, kun odoŋe ame telo mony, kede okut apel oguro abaka. Lwak luŋ onwoŋo tye awo i yomcuny kun okuto apel. Atalia te cako yeco boŋo oko i kome, te mwoco daŋ koko oko kun kobo ni, “Tim me erupe! Tim me erupe!”

¹⁵Yekoyadi alamdog te kobbi odoŋe ame telo mony ni, “Ter wunu dako-nu oko, be wunu kede i akina cirikale, me iwot ineke wunu oko; nek wunu jo ame mito laro kwo mere.” Pien olamdog onwoŋo mom mito ni neke i ot a Rwot.

¹⁶Jo te cako mako dako-nono, ote tere oko kun obeo kede i doggola ame aguragura donyo iye, ote tuno kede naka i ot abaka ote wot neke oko kuno.

¹⁷Yekoyadi te miyo abaka karacel kede lwak cikere i Rwot, kun omoko ni gin obino bedo lwak a Rwot. En omio lwak ocikere daŋ abaka.

¹⁸Lwak luŋ te ya oko i kannono ote ciro wot i ot a Baal, ote wot mumuko, reto oko piny; ote ŋiŋido daŋ keno lam luŋ karacel kede cal jogi ame onwoŋo tye kuno, oŋiŋido luŋ atitino, ote neko daŋ Matan ame rik obedo alamdog a Baal; oneke i nyim keno lam. Yekoyadi te doŋ keto jo me gwoko ot a Rwot.

¹⁹En karacel kede odoŋe ame loo mony, kede jo ame gwoko abaka karacel kede okurpiny; gin luŋ te cako lwoko abaka me tero i paco mere; ya i ot a Rwot kun odorre obeo i doggola okurpiny, ote wot naka i ot abaka. Abaka te wot bedo piny i wi kommere me loc,

²⁰Mannono omio jo me lobonono luŋ bedo i yomcuny, boma daŋ te kwe mot kare ame doŋ oneko Atalia oko i pala lweny i ot abaka.

²¹Yowaci odoko abaka kun mwaka me dittere oromo abiro.