Read lango 2 Obakki 12 Bible Online

2 Obakki 12 - lango bible

2 Obakki 12

¹I mwaka me abiro me loc a Yeko abaka me Icrael, en ame Yowaci ocako bedo iye abaka me Juda, eka te bedo i loc i Jerucalem pi mwakki pyeraŋwen. Nyiŋ tottere rik onwoŋo Jibia, ame turgi tye Beerceba.

²I kare me kwo mere luŋ en obedo tiyo gin ame yomoro cuny Rwot, pien Yekoyadi alamdog obedo pwonye.

³Kadi bed amannono ka woro jogi ame onwoŋo tye i wi kidi onwoŋo mom omumuko, lwak daŋ rik pwod medde yalo jogi kuno daŋ owaŋo odok akur baŋ jogi.

⁴Abaka Yowaci te lwoŋo olamdog te kobbigi ni, “Lim luŋ acil ame okelo i ot a Rwot, ame en lim ame ŋat acel acel mio ame onwoŋo oŋolle, lim ame gin okelo kite ame oŋolligi-nono, medo kede lim ame ŋat acel acel mio baŋ Rwot kite ame en mito,

⁵alamdog acel acel bino gwoko lim ame en egamo i baŋ jo i kare me ticcere, limmono bino bedo me yiko ot a Rwot, kite ame omito kede.”

⁶Cite mwaka me pyeraryo wie adek me loc abaka Yowaci onwoŋo olamdog mom ru oyiko ot a Rwot.

⁷Mannono omio abaka olwoŋo Yekoyadi karacel kede olamdog ocele, te penyogi ni, “Piŋo kara pe itye wunu ka yiko ot a Rwot? Cakere aman, wun mom dok ibino gamo wunu lim i baŋ jo i kare me ticwu, lim ame aman tye baŋwu myero imi wunu me cako yiko ot a Rwot.”

⁸Olamdog daŋ doŋ te ye ni mom dok obino medde gamo lim i baŋ lwak, dok daŋ mom obino yiko ot a Rwot.

⁹Yekoyadi alamdog te kwanyo canduk, te tuco wie me bolo cente, eka te wot keto i ŋet keno lam i tuŋ kide i ŋet doggola me donyo; olamdog te bolo iye lim luŋ ame jo onwoŋo okelo i ot a Rwot.

¹⁰Ka ce lim doŋ odoko adwoŋ meicel i canduk, aran abaka kede alamdog bino te kwano lim ame tye iye, ote tweyo oko i yi cao.

¹¹Kare ame gin doŋ otyeko ŋeyo wel limmono ducu, gin omio baŋ otic ame loo tic me ot a Rwot; gin doŋ te miyo baŋ opaa bao, kede ogedo ame tio tic i kom ot a Rwot,

¹²kede baŋ jo ame gedo i kidi kede baŋ opaa kidi, kun en ocele owilo i bao kede kiddi ame otio kede me yiko ot a Rwot kan oballe, kede culo pi jami okene ducu ame mitte.

¹³Limmono rik mom otio kede me tiyo ikopo me ryal, onyo me tiyo makac, becen, apel onyo kit jami ocele ame otio i ryal kede jabu, ame otio kedgi i ot a Rwot.

¹⁴Lim ame okelo i ot a Rwot tono luŋ rik otio kedgi me culo otic ame yiko ot a Rwot.

¹⁵Jo ame loo tic rik obedo jo ame genne i tic i lim ame rik omiogi, mannono omio mom rik dok obedo penyogi i kom lim.

¹⁶Lim ame oya i kom mot me walakino i roc kede me kwanyo bal, rik mom otero i ot a Rwot; mannono rik obedo lim ame omio baŋ olamdog.

¹⁷I kare-nono Kajael, abaka me Curia owoto olwenyo i kom boma me Gat, te daŋ loyo oko. En dok te moko tammere me wot lweny i Jerucalem.

¹⁸Yowaci abaka me Juda rik te kwanyo mot luŋ ame onwoŋo ojalo baŋ Rwot, mot ame kwari mere Yekocafati kede Jekoram kede Akajia rik onwoŋo ojalo baŋ Rwot, kun medo iye mege daŋ a rik ojalo baŋ Rwot, kede jabu adwoŋ ata ame en onwoŋo i ot kano lim ame rik tye i ot a Rwot kede i ot abaka te cwalogi luŋ baŋ Kajael, abaka me Curia. Mannono te miyo Kajael kwanyo monnyere oko, mom ote bino lweny i kom Jerucalem.

¹⁹Kop ocele luŋ i kom Yowaci ame mom ocoo kan, ginnoro luŋ ame en otio, gin luŋ tye ocoo i buk me Tekwaro ame tito kop i kom oloc me Juda.

²⁰Omiro a Yowaci rik te jem i kome; gin oporo kop i muŋ, ote neke oko i ot ame rik tye i Milo, i ŋet yo ame woto i Cilla.

²¹Omiro mere ame oneke-nono obedo Jojakar wot a Cimeat kede Jekojabad wot a Comer. Rik ote yiko kome karacel i kwari mere i paco a Daudi Wode Amajia te leyo kakare.