Read lango 2 Obakki 14 Bible Online

2 Obakki 14 - lango bible

2 Obakki 14

¹I mwaka me aryo me loc a Yowaci wot a Yekoyakaji, abaka me Icrael en ame Amajia wot a Yowaci ocako bedo kede abaka me Juda,

²kun onwoŋo mwaka me dittere tye pyeraryo wie kany; en te bedo loc pi mwakki pyeraryo wie aboŋwen, kun bedo i Jerucalem. Tottere rik nyiŋe Yekoadin, ame turgi tye i Jerucalem.

³En obedo tiyo gin ame tye atira i nyim Rwot, cite mom obedo a rom aroma i kwaro mere Daudi; ento en obedo tiyo ginnoro luŋ ame pappere Yowaci rik oti mo.

⁴En mom omumuko ka woro jogi ame tye i wi kidi, lwak omedde yalo jogi, kun owaŋo odok akur i wi kiddi kan ame oworo iye jogi.

⁵I kare ame loccere doŋ omoko, en oneko omiro mere oko ame rik oneko pappere.

⁶Cite mom oneko itino a jo a rik oneko pappere, kite ame ocoo kede i buk a Muca, kan ame Rwot rik ociko iye ni, “Papa atin mom obino neko pi bal a wode, atin daŋ mom obino neko pi bal a pappere; ento ŋat acel acel obino neko pi ballere en ikome.”

⁷Amajia rik oneko ocirikale a mony a jo Edom ame romo tutumia apar i luŋ me Kado; en te mako boma me Cela i lwennyono, te cako nyiŋ bomanono ni Jokteel, ame pwod olwoŋo kede naka atot tin.

⁸Amajia dok te cwayo kwena baŋ Yowaci wot a Yekoyakaji ame obedo wot a Yeko, abaka me Icrael, kun kobbe ni, “Biye, me obino orwatte i lek, me otemere koŋ.”

⁹Cite abaka Yowaci te dwoko kop baŋ abaka Amajia, abaka me Juda ni, “Okuto moro ame onwoŋo tye i buŋ me Lebanon rik ocwalo kwena baŋ yat cedar me Lebanon, kun kobbe ni, ‘Mia nyari me anyommi woda.’ Lee moro me Lebanon te beo kuno nyono okuto oko piny.

¹⁰Aman omio yin Amajia, pien ityeko loyo jo Edom, yin doŋ iwakere meicel. Koŋ doŋ ibed i kwogoni-nono ba. Mannono mom doŋ rommi bedo kede paco? Piŋo kara itye ka roko jo nononono me kela can i komi kede i kom joni?”

¹¹Cite Amajia te kwero winyo koppere-nono oko. Man omio Yowaci abaka me Icrael te ya karacel i jo mere, te wot rwatte gin Amajia i bar lweny me Bet-cemec ame tye i Juda.

¹²Ote loyo mony Amajia oko, ŋat acel acel te riŋo oko i paco mere.

¹³Yowaci abaka me Icrael te mako Amajia abaka me Juda wot a Yowaci, ame obedo wot a Akajia, i Bet-cemec, en te ya i kannono kato naka i Jerucalem, te wot muko cel me Jerucalem oko, ame borrere romo yadi mia aryo twal, cakere i dogcel me Epraim naka i dogcel ame olwoŋo ni Gul.

¹⁴En te yako jabu kede ryal luŋ ame en onwoŋo i ot a Rwot, karacel kede jami luŋ me ottace, kede en ame onwoŋo tye i ot kano lim i ot abaka, te tero luŋ i Camaria. En omako daŋ jo adoŋo mogo ame otwero lakoro, te tero oko.

¹⁵Kop ocele luŋ i kom Yowaci ame mom ocoo kan, ginnoro luŋ ame en otio, teko mere, kede kite ame en rik olwenyo kede i kom Amajia, abaka me Juda, gin luŋ tye ocoo i buk me Tekwaro ame tito kop i kom oloc me Icrael.

¹⁶Yowaci oto te wot weo karacel i kwari mere, ote yiko kome karacel oloc me Icrael i Camaria. Wode Jeroboam te leyo kakare.

¹⁷Kare ame Yowaci abaka me Icrael doŋ oto oko, Amajia abaka me Juda pwod omedde kwo pi mwakki ame romo apar wie abic twal.

¹⁸Kop i kom Amajia ame odoŋŋere a mom ocoo kan, gin luŋ tye ocoo i buk me Tekwaro ame tito kop i kom oloc me Juda.

¹⁹Jo mogo rik te cako poro kop i muŋ i kom Amajia, kun mito neke oko i Jerucalem, en te lwi, riŋo oko i boma me Lakic, cite okworrere te cwayo dano lubo yore kuno, ame te wot neke oko,

²⁰Gin te tiŋo kome aguragura kelo bino yiko i Jerucalem karacel i kwari mere, i paco a Daudi.

²¹Jo me Juda luŋ te kwero wode Ajaria me bedo abaka kakare, kun mwaka me dittere onwoŋo romo apar wie abicel.

²²I ŋe to a pappere, Ajaria ogero Elat, te dwoko i te loc a jo Juda.

²³I mwaka me apar wie abic me loc Amajia wot a Yowaci abaka me Juda, en ame Jeroboam wot a Yowaci, abaka me Icrael, ocako loc iye, kun bedo i Camaria. En obedo loc pi mwakki a romo pyeraŋwen wie acel,

²⁴kun bedo tiyo gin ame nen arac i nyim Rwot; en obedo lubo kit bal ame Jeroboam wot a Nebat obedo timo, ame omio jo Icrael otimo bal.

²⁵En omao boma luŋ ame onwoŋo rik obedo me a jo Icrael con, omio waŋ lobo a jo Icrael te dok kite a rik tye kede con, kun cakere i Kamat naka i nam me Araba, kite ame rik Rwot Obaŋa me Icrael onwoŋo okobo, kun mio amiro mere Yona wot a Amittai en akobo, adwarpiny ame paco mere rik tye i Gat-keper.

²⁶Rwot onwoŋo oneno twon can apek ame jo Icrael onwoŋo tye kede; pien mom tye ŋattoro kadi acel ame odoŋ kuno ame twero konyogi, opii onyo dano me anywalli,

²⁷Ento Rwot gire onwoŋo mom oyiko me jwero jo Icrael odoco i te polo piny, en omio te larogi kun tio i Jeroboam wot a Yowaci.

²⁸Kop i kom Jeroboam odoŋŋere a mom ocoo kan, gin luŋ ame en otio kede teko mere, kite ame rik en olwenyo kede, kede kite ame odwoko kede Damaciko kede Kamat i lobo Icrael ame onwoŋo rik doŋ tye i ciŋ jo Juda, gin luŋ tye ocoo i buk me Tekwaro ame tito kop i kom oloc me Icrael.

²⁹Jeroboam oto, te wot weo karacel i kwari mere. Wode Jekaria te leyo kakare.