Read lango 2 Obakki 15 Bible Online

2 Obakki 15 - lango bible

2 Obakki 15

¹I mwaka me pyeraryo wie abiro me loc a Jeroboam abaka me Icrael en ame Ajaria wot Amajia, abaka me Juda ocako loc iye.

²En ocako loc kun mwaka me dittere romo apar wie abicel, en te bedo loc pi mwakki pyerabic wie aryo kun bedo i Jerucalem. Nyiŋ tottere Yekolia me Jerucalem.

³En obedo tiyo gin ame nen atira i nyim Rwot, kun lubo gin ame pappere Amajia obedo tiyo.

⁴Kadi bed amannono, ka woro jogi ame onwoŋo tye i wi kiddi malo mom omumuko; lwak pwod obedo medde yalo jogi kuno, kun daŋ owaŋo odok a ŋwece kur iye.

⁵Rwot te cako pwodo abaka, omio en te doko adobo tuno naka i kare me to mere, kun bedo i ode kene. Wode Yocam en ame rik te bedo loyo ode kun loo daŋ jo me lobo-nono.

⁶Kop i kom Ajaria ame odoŋŋere ame mom ocoo kan, kede ginnoro luŋ ame en otio, gin luŋ tye ocooo i buk me Tekwaro ame tito kop i kom oloc me Juda.

⁷Ajaria oto te wot weo karacel i kwari mere, oyiko kome karacel i kwari mere i pa co a Daudi. Wode Yocam en ame te leyo kakare.

⁸I mwaka me pyeradek wie aboro me loc Ajaria abaka me Juda en ame Jekaria wot a Jeroboam ocako loyo iye jo Icrael, en te bedo loc pi dwete abicel kun bedo i Camaria.

⁹En obedo tiyo gin ame nen arac i nyim Rwot, kite ame kwaro mere obedo tiyo. En mom oweko lubo kit bal a Jeroboam wot a Nebat obedo timo, ame omio jo Icrael obedo timo bal.

¹⁰Calum wot a Jabec te cako poro kop i kome i muŋ, eka te cobo i Ibleam, neko oko, en te doŋ leyo kakare.

¹¹Kop i kom Jekaria odoŋŋere luŋ, gin luŋ tye ocoo i buk me Tekwaro ame tito kop i kom oloc me Icrael.

¹²Man en kop ame rik Rwot ociko baŋ Yeko, kun kobo ni, “Ikwai bino bedo i wi kom me loc Icrael tuno naka i lwagi me aŋwennere;” te daŋ timere amannono.

¹³Calum wot a Jabec ocako loc i mwaka me pyeradek wie aboŋwen me loc a Ujjia abaka me Juda, te loc pi dwe acel kun bedo i Camaria.

¹⁴Menakem wot a Gad te bino i Camaria kun oya i Tirja, te bino cobo Calum wot a Jabec neko oko, en te leyo kakare.

¹⁵Kop i kom Calum odoŋŋere luŋ, kede kop ame en oporo i muŋ, gin luŋ tye ocoo i buk me Tekwaro, ame tito kop i kom oloc me Icrael.

¹⁶I kare-nono Menakem te jwero boma me Tapauk, kede jo luŋ ame bedo iye, kede lobo luŋ ame tye i ŋete, tuno naka i Tirja; pien gin onwoŋo okwero yabbe doggola oko, mannono en omio en te jwerogi oko kun ryeko yi mon a yac ame onwoŋo tye kuno.

¹⁷I mwaka me pyeradek wie aboŋwen me loc Ajaria abaka me Juda en ame Menakem wot a Gad ocako loyo jo Icrael iye; en obedo loc pi mwakki apar kun bedo i Camaria,

¹⁸En obedo timo gin a nen arac i nyim Rwot, pi kare me kwo mere luŋ; en obedo lubo kit bal ame Jeroboam wot a Nebat obedo timo, ame omio jo Icrael otimo bal.

¹⁹Pul abaka me Acuria rik te bino cobo mony i kom lobo mere; Menakem te miyo Pul ryal ame romo talanta tutumia acel, me wek konye enwoŋ teko me moko loccere bedo atek.

²⁰Lim ame en omio Pul-nono en orao i baŋ olonyo me Icrael luŋ, kun ŋat acel acel i akinagi mio cekel me ryal pyerabic me amia baŋ abaka me Acuria. Man te miyo abaka me Acuria dok oko cen, mom dok te bedo i lobo mere.

²¹Kop i kom Menakem odoŋŋere luŋ a mom ocoo kan, ginnoro luŋ ame en otimo, gin luŋ tye ocoo i buk me Tekwaro ame tito kop i komoloc me Icrael.

²²Menakem oto te wot weo karacel i kwari mere. Wode Pekakia en ame te leyo kakare.

²³I mwaka me pyerabic me loc Ajaria abaka me Juda en ame Pekakia wot a Menakem ocako loyo jo Icrael iye, en te bedo loyo jo Icrael pi mwakki aryo.

²⁴En obedo timo gin ame nen arac i nyim Rwot, en mom oweko lubo kit bal a Jeroboam wot a Nebat obedo timo, ame omio jo Icrael obedo timo bal.

²⁵Peka wot a Remalia ame onwoŋo obedo adwoŋ ame loo ocirikale mere te cako poro kop i muŋ i kome, karacel i jo pyerabic me Gilead, eka te neke oko i Camaria, kun onwoŋo en tye iyi icika atek me pono i ot abaka, en te leyo kakare.

²⁶Kop i kom Pekakia odoŋŋere luŋ, kede gin ame en obedo timo ducu, gin luŋ tye ocoo i buk me Tekwaro ame tito kop i kom oloc me Icrael.

²⁷I mwaka me pyerabic wie aryo me loc Ajaria abaka me Juda en ame Peka wot a Remalia ocako loyo jo Icrael iye; en te bedo loc pi mwakki pyeraryo nono.

²⁸En obedo timo gin a nen arac i nyim Rwot, en mom oweko lubo kit bal ame Jeroboam wot a Nebat obedo timo, ame omio jo Icrael obedo timo bal.

²⁹I kare me loc a Peka abaka me Icrael en ame Tiglak-pilecer abaka me Acuria obino iye te bino mako Ijon, Abel-bet-Maaka, Janoa, Kedec, Kajor, Gilead kede Galilaya ame gin luŋ obedo lobo a jo Naputali; en te yako jo iye terogi oko i opii Acuria.

³⁰Kocea wot a Ela te poro kop i muŋ i kom Peka wot a Remalia, te bino cobo neko oko, en te leyo kakare i mwaka me pyeraryo me loc a Yocam wot a Ujia.

³¹Kop i kom Peka odoŋŋere luŋ, gin ame en otio, ame mom ocoo kan gin luŋ tye ocoo i buk me Tekwaro ame tito kop i kom oloc me Icrael.

³²I mwaka me aryo me loc a Peka wot a Remalia en ame Yocam wot a Ujjia abaka me Juda ocako loc iye.

³³En ocako bedo aloc kun mwaka me dittere tye pyeraryo wie abic, en te bedo loc i Jerucalem pi mwakki apar wie abicel. Nyiŋ tottere Yeruca ame obedo nyaka a Jadok.

³⁴En obedo tiyo gin ame tye atira i nyim Rwot, kun timo ginnoro luŋ ame pappere Ujia rik obedo timo.

³⁵Kadi bed amannono en mom omumuko ka woro jogi ame onwoŋo tye i wi kiddi malo; lwak pwod obedo medde yalo jogi i wi kiddi malo kuno, kun daŋ owaŋo odok a ŋwece kur iye. En ogero doggola i malo me ot a Rwot.

³⁶Kop i kom Yocam odoŋŋere luŋ, ginnoro luŋ ame en otio ame mom ocoo kan, gin luŋ tye ocoo i buk me Tekwaro ame tito kop i kom oloc me Juda.

³⁷I kare-nono Rwot te cako cwalo Rejin karacel kede Peka wot a Remalia me bino cobo mony i kom Juda.

³⁸Yocam oto te wot weo karacel i kwari mere, oyiko kome karacel i kwari mere i paco a kwaro mere Daudi. Wode Akaj en ame te leyo kakare.