Read lango 2 Obakki 18 Bible Online

2 Obakki 18 - lango bible

2 Obakki 18

¹I mwaka me adek me loc a Kocea wot a Ela abaka me Icrael, en ame Kejekia wot Akaj abaka me Juda ocako loc iye.

²En ocako loc kun mwaka me dittere doŋ romo pyeraryo wie abic, en te bedo loc pi mwakki pyeraryo wie aboŋwen, kun bedo i Jerucalem. Nyiŋ tottere obedo Abi, ame obedo nyaka a Jekaria.

³En te bedo timo gin ame nen atira i nyim Rwot, kun lubo ginnoro luŋ ame rik kwaro mere Daudi obedo timo.

⁴En omumuko ka woro jogi luŋ ame onwoŋo rik tye i wi kiddi malo, ototoŋo daŋ yen luŋ ame ocicibo i ka woro jok a dako ame olwoŋo ni Acera oko, te daŋ ŋido twol mola ame rik Muca otio oko, pien tuno naka i karenono-onwoŋo jo Icrael pwod yalo twollono odok akur. Gin rik olwoŋo twol mola-nono ni Nekucitan.

⁵En obedo keto gennere i kom Rwot Obaŋa me Icrael; man omio mom dok onen aloccoro ocele a cal kede i akina oloc me Juda ame olubo ŋeye, akadi i akina oloc ame ogeo loc i nyime.

⁶En olido Rwot odoco, kun mom weko lubo Rwot, ento obedo lubo cik luŋ ame Rwot rik onwoŋo ociko baŋ Muca,

⁷Rwot obedo bedo kede i kabedo luŋ ame en woto iye kun mie winyo. En obin ojem oko i kom abaka me Acuria, te kwero bedo i te loccere oko.

⁸En oneko jo Piriciti tuno naka i Gaja karacel kede lobo luŋ ame rik tye i ŋete, cakere i gedo mogo ocuŋ iguŋ malo me kuro piny tuno naka i kom boma ame ocecelo atek.

⁹I mwaka me aŋwen me loc a Kejekia, ame obedo mwaka me abiro me loc a Kocea wot a Ela, abaka me Icrael, Calmanecer abaka me Acuria obino me bino lweny i kom Camaria, te daŋ guro oko i monnyere.

¹⁰I ŋe mwaka adek, en doŋ te loyo Camaria oko. I mwaka me abicel me loc a Kejekia, ame obedo mwaka me aboŋwen me loc a Kocea abaka me Icrael, en ame oloo iye boma me Camaria.

¹¹Abaka me Acuria te tero jo Icrael iyi opii i Acuria, te wot miyogi bedo i Kala, kede i ŋet kulo me Kabor, ame obedo kulo ame tye i Gojan, kede i boma a jo Medi;

¹²man otimere pien gin okwero winyo kop a Rwot Obaŋagi, okalo wi cikere mere, anaka ginnoro luŋ ame en rik ociko kede Muca amiro mere; gin mom owinyo, mom daŋ olubo kadi acel.

¹³I mwaka me apar wie adek me loc abaka Kejekia, Cenakerib abaka me Acuria owoto me wot lweny i kom boma luŋ me Juda ame onwoŋo ocecelo atek meicel, eka te daŋ mako boma-nono luŋ.

¹⁴Kejekia abaka me Juda te cwayo kwena baŋ abaka me Acurai i Lakic kun kobo ni, “Atimo bal; dok giri cen, kur ilweny keda, yeccoro luŋ ame yin ibino cibo i wia abino wute kede.” Abaka me Acuria te ŋolli Kejekia abaka me Juda ni myero culle ryal ame pekkere romo talanta mia adek kede jabu ame pekkere romo talanta pyeradek.

¹⁵Kejekia te miye ryal luŋ ame en onwoŋo tye i ot a Rwot kede en ame onwoŋo i ot kano lim rik tye ot abaka.

¹⁶I karenono Kejekia te mumuko daŋ jabu luŋ ame rik en omwono i kom kika me doggola ot a Rwot, kede jabu ame en rik onwoŋo omwono i kom akara me doggola, te miyo luŋ baŋ abaka me Acuria.

¹⁷Abaka me Acuria te cwayo odoŋe magi ame gin otel wi monnyere, kun cwalogi kede twon mony adwoŋ meicel. Ocwao Tartan, Rabcaric kede Rabcake, kun oya i Lakic owoto baŋ Kejekia i Jerucalem. Gin rik te ciro wot naka i Jerucalem. Kare ame gin otuno kuno, gin ocuŋ i ŋet yo pii ame mol tero pii iyi atapara ame tye tuŋ malo, i yo adwoŋ ame woto i poto Alwok-boŋo.

¹⁸Kare ame gin olwoŋo abaka me bino rwatte kedgi, Eliakim wot a Kilkia, ame rik obedo adwoŋ ame loo ot abaka, kede Cebna, ame onwoŋo obedo aran, kede Joa wot Acap ame rik en aco kop i kom ginnoro luŋ ame otimere, en ame te lunyo bino baŋgi.

¹⁹Rabcake te kobbigi ni, “Kobbi wunu Kejekia, ‘Abaka adwoŋ ame en abaka me Acuria okobo ni, “Gen ame itye kede-ni ocuŋ kara i kom aŋa ba?” ’ ”

²⁰Itamo ni kop me dog keken rom aroma i ryeko kede teko me lweny bo? Aman ame yin ijem i koma-ni yin igeno ŋa?

²¹Nen yin itye ka geno Miciri ame rom aroma imako ogada ame turo yot akaka mako abiro; ogada ame tur cobo ciŋ ŋattoro keken ame ojenere i kome. Parao ame obedo abaka me Miciri daŋ tye kittono baŋ jo luŋ ame keto gengi i kome.

²²Ento ka ikobba ni, “Wan ogeno Rwot Obaŋawa, ‘kara mom en Obaŋa-nono en ame Kejekia rik omuko kabedo mere me abila ame tye malo kede keno lam, kun ciko Juda kede Jerucalem ni myero gin wor Obaŋa i nyim keno man?’ ”

²³Aman doŋ tim ber ijeŋ ginnoro wun adwoŋŋa, abaka me Acuria: An abino miyi aguragura tutumia aryo ka ce yin itwero nwoŋo jo ame twero ŋwec kedgi.

²⁴Kara yin itwero ryemo adwoŋŋoro i akina otic adwoŋŋa i yore mene akadi en agoro mere ka ce yin pwod igeno Miciri pi gadigadi mere kede jo ame ŋweco aguragura?

²⁵Medo i kom mannono, yin itamo ni an abino jwero lobo man aboŋo Rwot? Rwot en okobba ni, “Wot ilweny i kom lobo man me ijwer jo iye luŋ!”

²⁶Eka Eliakim wot a Kilkia kede Cebna, kede Joa te kwayo Rabcake ni, “Tim ber ikob kedwa wan omironi i leb Aram pien wan oniaŋ iye. Kur ikob kedwa i leb jo me Juda ame jo leb Aram pien wan oniaŋ iye. Kur ikob kedwa i leb jo me Juda ame jo ame tye i wi apama me cel twero winyo.”

²⁷Rabcake te gamo kopgi ni, “Itamo ni adwoŋŋa oora me bino kobo kop man baŋ adwoŋwu kede baŋwu keken, kun mom akobo baŋ jo ame tye i wi apama cel malo ca? Aco kono, wun karacel kede gin jo-ni luŋ doŋ ibedo wunu jo ame bino camo cetewu kede mato lacwu?”

²⁸Rabcake te putte malo, te redo ni, “Koŋ iwiny wunu kop abaka adwoŋ me Acuria!”

²⁹En okwenyorowu ni myero kur imi wunu Kejekia bwolwu, pien en gire mom bino larowu.

³⁰Kur imi wunu Kejekia wir tamwu me jeŋere i kom Rwot kun kobbiwu ni Rwot gire mom bino miyo boma man i ciŋ abaka me Acuria.

³¹Kur iwiny wunu kop a Kejekia. Abaka me Acuria okobo ni ŋat acel acel myero katto oko i boma me bin yik kop me kuc kede. En ebino miyo dano acel acel camo nyig olokkere en ikome, kede nyig oduro mere, kun daŋ mato pii mere ame en i kome ojolo;

³²ituno ka abino terowu i lobo ocele ame rom aroma i lobowu, lobo ame ceko cam, koŋo olok dwoŋ iye, lobo ame ogati kede olok tye iye. Lobo ame moo jeituni kede moo kic dwon iye, me ibed wunu ame komwu yot, kun mom ibedo wunu to kare ducu. Gwokere wunu kur iye wunu Kejekia bwolwu ni Rwot bino larowu.

³³Yam koŋ tye Obaŋa arokkoro ame olaro lobo mere i ciŋ abaka me Acuria?

³⁴Kara gin obaŋe-nogo aman otye kwene? Obaŋa a boma me Kamat kede me Arapad kede obaŋa me Ceparvaim, onyo me Kena kede me Iva? Gin obaŋe-nogo rik olaro Camaria i ciŋa?

³⁵I kom obaŋe magi luŋ, mene ame yam koŋ olaro lobogi i ciŋa? Kara ŋo ame omio wun itye ka tamo wunu ni Rwot twero laro Jerucalem i ciŋa?

³⁶Jo te liŋ aliŋa, kite ame onwoŋo abaka ocikogi kede ni myero kur ogam kopporo.

³⁷Icennere Eliakim wot a Kilkia, ame onwoŋo obedo adwoŋ ame loo ot abaka, kede Cebna ame obedo aran, kede Jo awot Acap, ame onwoŋo obedo aco kop luŋ i kom ginnoro luŋ ame otimere, ote wot baŋ abaka Kejekia kun oyeyeco boŋŋigi oko, ote titte kop ame Rabcake okobbigi.