Read lango 2 Obakki 19 Bible Online

2 Obakki 19 - lango bible

2 Obakki 19

¹I kare ame abaka Kejekia owinyo, oyeyeco boŋŋi mere, te ruko boŋo cola, te wot i ot a Rwot.

²En te cwayo Eliakim, adwoŋ ame onwoŋo loo ot abaka, kede Cebna, aran karacel kede olamdog adoŋo mere baŋ Icaya wot Amoj, kun gin luŋ oruko boŋo cola.

³Gin te wot kobbi Icaya ni, “Man en kop ame Kejekia okobo ni okobbi, ‘Tin en nino me can, me keto can i komwa, dok me cwercuny okato kare. Aman wan orom aroma i dako ame nino me nywallere oromo, cite teko me colo atin mom tye.

⁴Gwok onyo Rwot Obaŋani owinyo kop a Rabcake, ame adwoŋŋere abaka me Acuria ocwae kede me bino nalo Obaŋa akwo. Rwot Obaŋani myero ket can i kom jo man ame okobo kop ame en otyeko winyo. Pi mannono ba, yin myero ikwa Rwot pi jo ame odoŋ.’ ”

⁵Kare ame omiro abaka Kejekia otuno baŋ kaya,

⁶en okobbigi ni, “Wot ikob wunu baŋ adwoŋwu ni, Rwot okobo ni, ‘Myero kur ibed kede lworo moro pi kop ame iwinyo, ame omiro abaka me Acuria oyeta kede.

⁷Nen ba, an abino miyo en keto cunye i winyo koppogo me anike, ame bino miyo en dok cen i lobo mere. An abino miyo oneke kede pala romo i lobo mere.’ ”

⁸Rabcake te dok oko cen, te wot nwoŋo abaka me Acuria tye ka lweny i kom Libna; pien en onwoŋo doŋ owinyo oko ni abaka otyeko ya oko i Lakic.

⁹Abaka rik te winyo kop i kom Tiraka, abaka me Eciopia, ni en onwoŋo tye ka bino me bino lweny i komgi. En rik te cwayo kwena baŋ Kejekia kun kobbe ni,

¹⁰“Wot ikobbi wunu Kejekia abaka me Juda ni, ‘Kur imi Obaŋani ame igeno bwoli ni mom ebino miyo Jerucalem i ciŋ abaka me Acuria.

¹¹Nen ba, yin doŋ ityeko winyo gin ame abaka me Acuria otyeko timo i kom lobo luŋ, iwinyo kite ame en orweogi kede odoco, kara yin doŋ ibino bwot i yore aŋo ba?

¹²Kwarina rik obin orweo boma me Gojan, Karan, Recep, te daŋ neko jo me Eden ame rik onwoŋo bedo i Telaccar, ento obanagi moro mom olarogi.

¹³Kara obakki me boma-nogo aman tye kwene? Abaka me Kamat, kede Arpad, kede me Ceparvaim, kede me Ena, karacel kede me Ivva, gin luŋ aman tye kwene?’ ”

¹⁴Kejekia ogamo waraga i ciŋ okwena te kwano. En te wot kede i ot a Rwot, te yaro waraga-nono i nyim Rwot,

¹⁵Eka te cako kwayo Rwot kun kobo ni,

¹⁶“Ama Rwot Obaŋa me Icrael, ame ibedo i wi kommi me kwogo a tye malo i wi okerubi; yin keni gire en ame ibedo Obaŋa, ame iloo kit lobo apapat luŋ me wi podo. Yin en iketo polo kede lobo.

¹⁷Tim ber icik yiti iwinywa, ama Rwot, yab waŋi inenwa, dok daŋ iwiny kop luŋ ame Cenakarib ocwao me ŋalo Obaŋa akwo.

¹⁸Iyi ateni, Ama Rwot, wan oŋeo ni abaka me Acuria ojwero lwak rok apol kun mio lobogi doŋ nono, dok daŋ owawaŋo obaŋegi oko i mac; pien gin mom onwoŋo obedo obaŋa i kome, ento cal apaa me yen kede gweŋe ame jo en atio, mannono en omio orweogi oko,

¹⁹Aman doŋ ba, Ama Rwot Obaŋawa, larwa iciŋ jo Acuria me rok luŋ i wi podo ŋe ni yin giri Rwot ibedo Obaŋa keni.”

²⁰Icaya wot Amoj te cwayo kwena baŋ abaka Kejekia kun kobbe ni, “Rwot Obaŋa me Icrael okobo ni, ‘An doŋ atyeko winyo kwacci i kom Cenakerib, abaka me Acuria.’

²¹Man en kop ame Rwot otyeko kobo i kome: “Jo me Cion ocai calo nyako ame obwoni; Jo Jerucalem ocai, calo nyako oyeyeno wie i ŋei.

²²“Yin kara iŋalo ŋa, ŋa ame iyeto? Iwoto dwoni i kom ŋa ba, kun iŋao waŋi malo? Mom i kom Ŋat Acil me Icrael!

²³Imio okwenani oŋalo Rwot, dok ikobo ni yin iyito malo i wi kiddi, kun iyito i gadigadi me lweny, ituno naka i wi Lebanon twal; kun iwakere daŋ ni itoŋo yen cedar aboco i kuno oko, kede yen cipre abeco mege oko; dok daŋ ni ituno iyi buŋ kannabor, kan ame yen oculle iye acula.

²⁴Iwakere-gu ni ikunyo akoŋ, imato daŋ pii orok, dok tyeni omio pii i kulli luŋ me Miciri odwono oko.

²⁵“Mom onwoŋo iŋeo ni rik ayiko man con? Aman doŋ atye ka cobo acoba, gin ame rik ayiko pire con, ni ibino reto boma luŋ ame ocecelo atek, me imi dok wi obur.

²⁶Man omio jo ame bedo kuno mom doŋ tye kede teko, cunygi doŋ bedo poto apota, lewic daŋ doŋ ocirogi oko. Orom aroma i lum ame tye i poto, ocalo lum alyabu, onyo orom aroma i doo ame otu i wii ot, ame yamo alyet me oro onero.

²⁷“Cite an aŋeo kop ducu i komi, aŋeo ginnoro luŋ ame yin itio, kede kabedo luŋ ame yin iwoto iye, karacel kede daani i koma.

²⁸Atyeko doŋ winyo kop i kom akemoni, awinyo daŋ kop i kom wakereni oko; pi mannono abino rwako golona i umi, abino keto daŋ tol i dogi, abino dwoki cen i yori, kun ibeo i yo ame rik ibino kede.”

²⁹Icaya te kobbi abaka Kejekia ni, “Man en gin ame bino nyuto gin ame bino timere. I mwaka ni kede i mwaka ame bino lubo man, ibino camo wunu cam ame otu kene, ento i mwaka me adekkere ibino coyo wunu koti, ite daŋ kayo wunu, ibino pito wunu olok, ite daŋ camowunu nyige.

³⁰Jo ame bino bwot te doŋ i ot a Juda, bino bedo acalo yat ame oguro lwite piny, te nyako nyige.

³¹Pien jo bino doŋ i Jerucalem kede i wi kidi me Cion. Man bino timere pien Rwot tye i mit adwoŋ iye.

³²“Man en kop ame Rwot okobo i kom abaka me Acuria: En mom bino donyo i boma man kadi acel, mom daŋ bino bayo atero moro iye. Mom tye ocirikale moro ame omako kwot, ame bino tuno i ŋet boma, mom daŋ obino toro lobo moro me guro.

³³En bino dok cen i ŋee, kun lubo yo ame rik ebino kede, en gire mom bino donyo i boma man. Man en kop a Rwot ikokome.

³⁴An abino lweny pi boma man ate gwoko me kelo kwogo i koma kede i kom amirona Daudi.”

³⁵Amalaika a Rwot rik te wot i gony a jo Acuria i dyeworrono, te wot neko ocirikale tutumia mia acel kede pyeraboro wie abic. Orwo mere odiko con, kom jo oto onwoŋo doŋ oradde atata.

³⁶Cenakarib, abaka me Acuria te dok paco, wot bedo i Nineve.

³⁷I nino moro ame en rik onwoŋo tye akwac i ot obaŋa mere Nicrok, awobe mere Adramelek kede Carecer te neke oko i pala me romo, gin te Iwi gigi oko i lobo Ararat. Wode Ecar-kaddon te leyo kakare.