Read lango 2 Obakki 2 Bible Online

2 Obakki 2 - lango bible

2 Obakki 2

¹I kare ame Rwot doŋ mito tero Elia oko i polo i yamo ajuru, onwoŋo Elia kede Erica ocako wotgi me wot i Gilgal.

²Elia te kobbi Erica ni, “Tim ber koŋ ibed kan; pien Rwot okobo ni myero an koŋ awot i Betel.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gire mom abino pokkere kedi.” Gin luŋ doŋ ote wot naka i Betel.

³Odwarpinnyogo ame onwoŋo rik bedo i Betel kuno, te wot baŋ Erica te penye ni, “Yin iŋeo ni Rwot tin bino kwanyo adwoŋŋi oko i baŋi te tero oko?” En te gamo ni, “Ee, an aŋeo; ento wek wunu kobo koppere bedi.”

⁴Elia dok te kobbi Erica ni, “Tim ber koŋ ibed kan; pien Rwot okobo ni an koŋ awot i Jeriko.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gira mom abino pokere kedi.” Gin luŋ doŋ ote wot naka i Jeriko.

⁵Odwarpinnyogo ame onwoŋo rik bedo i Jeriko kuno, te wot baŋ Erica te penye ni, “Yin iŋeo ni Rwot tin bino kwanyo adwoŋŋi oko i baŋi, te tero oko?” En te gamo ni, “Ee an aŋeo; ento wek wunu kobo koppere bedi.”

⁶Elia dok te kobbi Erica ni, “Tim ber koŋ ibed kan; pien Rwot okobo ni myero an koŋ awot i kulo Jordan.” Ento Erica te gamo ni, “Kite acalo Rwot tye kwo-ni, dok yin daŋ itye kwo-ni, an gira mom abino pokere kedi.” Gin luŋ te wot karacel,

⁷kun odwarpiny pyerabic lubo yorgi naka i Jordan. Elia kede Erica te wot cuŋ i dog kulo Jordan, kun odwarpiny pyerabic ca ocuŋ kannabor.

⁸Elia te gonyo boŋo i kome oko te dolo goyo kede pii; pii te pokere oko i yie aryo, kun cuŋ tuŋŋi kede tuŋŋi, tuno waŋ ame gin aryo luŋ okato loka tun ca, kun obeo kan otwo.

⁹Kare ame gin doŋ otyeko kato loka tuŋ ca, Elia te penyo Erica ni, “Kwa gin ame imito ni myero atim piri, kun mom ru okwanya oko i baŋi.” Erica te gamo ni, “Tim ber imia abed i kodi cuny ame yin itye kede-ni tyen aryo, ame twero miya abedo ŋat ame leo kakari.”

¹⁰Elia te gamo ni, “Ikwao gin atek meicel, cite ka ce ibedo neno yora i kare ame atiŋŋa malo i baŋi, gin ame ikwao-nono bino timere i komi kittono; cite ka mom ibedo neno yora, mom gire bino timere.”

¹¹I kare ame gin tye awot kun okop, gadigadi moro me mac kede aguragura te poko akinagi oko. Elia te cako wot malo i twon yamo ajuru ame onwoŋo obino adwoŋ wokkono.

¹²Erica oneno te cako koko oko ni, “Pappa doi! Pappa doi! Gadigadi lweny a jo Icrael kede wegi aguraguragi!” En mom dok te medo neno atwal. Erica te mako boŋo mere, te yeco yie oko poko aryo.

¹³En te kwanyo boŋo Elia ame onwoŋo opoto piny i kome, te dok kede cen, te wot cuŋ i dog kulo Jordan.

¹⁴Okwanyo boŋo Elia ame onwoŋo opoto i kome ca, eka te goyo kede pii kun kobo ni, “Rwot kara tye kwene ba, ame obedo Obaŋa Elia?” En dok te medde goyo pii tyen me aryo, eka pii te pokere oko i yie aryo kun cuŋ tuŋŋi i tuŋŋi. Erica te kato tuŋ ca, kun beo i dyere.

¹⁵Odwarpiny pyerabic ame onwoŋo rik bedo i Jeriko onene ka en bino, eka gin te kobo ni, “Cuny Obaŋa ame yam tye i kom Elia doŋ okobo oko i kom Erica.” Gin te wot me wot rwatte kede, eka gin te ryebere piny i nyime.

¹⁶Gin te kobbe ni, “Nen wan omironi ame otye kan wan jo pyerabic, ame wan luŋ obedo jo ame tek meicel. Tim ber icwalwa owot oyeny adwoŋŋi; onyo ca cuny a Rwot otere oko teŋe te weke oko i wi kidi moro, onyo ca oweke i luŋŋoro.” Erica te gamo ni, “Pe gire abino cwalowu.”

¹⁷Cite gin te bedo diye atek tuno waŋ a lewic omake, en te kobo ni, “Wot wunu.” Odwarpiny pyerabiccono rik te wot; gin te bedo yenye pi nino a romo adek, cite naka mom onwoŋe.

¹⁸Gin te dwogo baŋ Erica, kun onwoŋo en pwod tye i Jeriko. Erica te kobbigi ni, “An mom rik akobbiwu ni kur iwot wunu?”

¹⁹Jo mogo me Jeriko rik te wot baŋ Erica ote kobbe ni, “Kite ame yin ineno kede, yin adwoŋwa, bomawa-ni ogero kan aber meicel, ento pii mere en ame rac, mio yi mon i lobo-ni ony oko.”

²⁰En te gamo ni, “Onywunu kado i tako kwon anyen ite kelo baŋa.” Gin daŋ te kelo kite ame ocikogi kede.

²¹En te wot naka i dog pii me bomanono, te wot onyo iye kado-nono kun kobo ni, “Man en kop ame Rwot okobo: An doŋ atyeko yiko pii man odoko doŋ aber; mom dok bino miyo ŋattoro to, akadi onyo yi dako moro.”

²²Mannono te miyo pii-nono doŋ doko aber tuno naka tin, kite ame rik Erica okobo kede.

²³Erica te ya oko i Jeriko wot i Betel; i kare ame en tye iyo, awobe mogo te bino i boma te cako nywanywaro en kun okobo ni, “Wot oko, lo-ni a wie otal! Wot oko lo-ni a wie otal!”

²⁴Erica te lokere nenogi, te cenogi oko i nyiŋ Rwot. Megi ŋuu aryo te donyo i buŋ, te mako awobe pyeraŋwen wie aryo i akinagi, kikilo oko.

²⁵Erica te ya i kuno te wot naka i kidi me Karmel eka te dok cen i Camaria.