Read lango 2 Obakki 20 Bible Online

2 Obakki 20 - lango bible

2 Obakki 20

¹I kare-nono two onwoŋo omako abaka Kejekia, ame onwoŋo en doŋ ceggi to. Adwarpiny Icaya wot Amoj rik te wot limme, te kobbe ni, “Rwot okobo ni yin doŋ myero icik jo ame bedo baŋi oko i kop me odi, pien mom ibino caŋ, ento ibino to.”

²Kejekia te loko nyime neno apama, te kwayo Rwot,

³kun kobo ni, “Tim ber, Ama Rwot, ipo kit ame abedo tic kede baŋi kun ageni icunya ducu, dok atimo gin ame tye atira i nyimi.” En te mwoco koko oko kun cunye cwer meicel.

⁴A kun Icaya mom ru oya i dyekal abaka, Rwot dok te medde kobbi Icaya ni,

⁵“Wot ikobbi Kejekia ame en abaka ame loo lwakka ni, ‘Rwot Obaŋa a kwarowu Daudi okobo ni, etyeko doŋ winyo kwacci, dok daŋ eneno pig waŋi; nen ba, abino cano twoni oko; i nino me adekkere ibino wot i ot a Rwot.

⁶Dok ebino miyo ibedo i lobo pi mwakki apar wie abic. Ebino larri karacel kede boma man i ciŋ abaka me Acuria, dok ebino medde gwoko boma man, pi kelo kwogo i kome kede i kom amiro mere Daudi.’ ”

⁷Icaya te kobo ni, “Kella anina oduro otwo, me wot mwon i waŋ odeke abaka me caŋ oko.”

⁸Kejekia te penyo Icaya ni, “Kara gin aŋo ame bino nyuto ni Rwot bino caŋa dok daŋ abino wot i ot a Rwot i nino me adekkere?”

⁹Icaya te gamo ni, “Man en anen ame bino nyuto ni Rwot bino cobo gin ame eciko: tipo cen myero wot anyim tyen apar onyo dok cen tyen apar i ya i kom gi-poro ceŋ Akab?”

¹⁰Kejekia te dok gamo ni, “Bedo yot ka bor atipo omedde anyim tyen apar;”

¹¹pe amannono gire, myero odok cen tyen apar iya i kom gi-poro cen Akaj.

¹²I kare-nono abaka me Babulon, Merudak-baladan wot a Baladan, owinyo ni abaka Kejekia rik kome lit, en te cwayo okwena me tero waraga baŋe karacel kede mot.

¹³Kejekia rik te jolo okwena mere naca kede yomcuny, te nyuttigi lonyo mere kun daŋ miogi oneno ot me limmere, gin oneno jabu, ryal, gigi mogo ame nwecgi kur, moo mogo me wel, ot me kano jami lwennyere luŋ, kede ginnoro luŋ ame onwoŋo tye i ot me kano jami mere. Mom tye ginnoro a en mom onyuto baŋgi ame onwoŋo tye i ode kede i lobo luŋ ame onwoŋo tye i te loccere,

¹⁴Cite adwarpiny Icaya rik te bino baŋ abaka Kejekia, te penye ni, “Jo-ni kara oya i kwene? Dok kop aŋo ame gin okobo?” Kejekia te gamo ni, “Gin oya i lobo abor meicel, oya i Babulon twal.”

¹⁵Icaya dok te penye ni, “Gin aŋo ame gin oneno i odi?” Kejekia te gamo ni, “Gin oneno jami ducu ame tye i oda; mom tye ginnoro ame tye i udi me kano lim ame mom anyuttigi.”

¹⁶Icaya te kobbi abaka Kejekia ni, “Koŋ doŋ iwiny kop ame Rwot okobo.

¹⁷Nen ba, kare tye abino, ame jami ducu ame tye i odi, jami luŋ ame kwarowu yam obedo kano tuno naka tin, obino terogi luŋ i Babulon. Mom tye ginnoro ame bino doŋ kadi acel.

¹⁸Dok itinoni mogo obino tero iyi opii, ote royogi oko, ote wot tic i paco abaka me Babulon.”

¹⁹Abaka Kejekia te niaŋ ni kuc bino bedo i kare mere aboŋo alokaloka moro, omio en te kobbi Icaya ni, “Kop a Rwot ame ekobo-nono gire ber.”

²⁰Kop i kom Kejekia ame odoŋŋere luŋ, teko mere, kite ame en rik okunyo kede akon kede yo pii, te tero pii i boma, ginnoro luŋ ame mom ocoo kan, gin luŋ tye ocoo i buk me Tekwaro ame tito kop i kom oloc me Juda.

²¹Kejekia oto te wot weo karacel i kwari mere. Wode Manace te leyo kakare.