Read lango 2 Obakki 21 Bible Online

2 Obakki 21 - lango bible

2 Obakki 21

¹Manace ocako loc kun mwaka me dittere romo apar wie aryo, en te bedo loc i Jerucalem pi mwakki pyerabic wie abic. Nyiŋ tottere Kepjiba.

²En obedo timo gin ame nen arac i nyim Rwot, kun bedo timo tim me kwer ame rok luŋ ame Rwot oryemo oko i nyim jo Icrael rik obedo timo.

³En daŋ omio ogero ka woro jogi i wi kiddi malo, ame rik pappere Kejekia omio omumuko oko. Ogero keno lam me a Baal, oguro daŋ yat Acera te dok cako woro kit jami apapat ame tye i polo, kun tio pirgi.

⁴Ocano daŋ keno lam i ot a Rwot, kan ame rik Rwot okobo iye ni, “Abino miyo Jerucalem bedo kabedo me wora.”

⁵En ocano daŋ keno lam apipim me woro jami apapat ame tye i polo, kun canogi i dyekal aryo ame tye i ot a Rwot.

⁶Owaŋo daŋ wode acalo mot me yalo jok, kun daŋ tyeto tyet, ŋio yi dyegi, penyo daŋ okor tipo kede ajoka. En obedo timo tim areco apol apola ame nen arac i nyim Rwot, kun mio akemo mako Rwot.

⁷Dok cal jok apaa, cal Acera ame obedo jok a dako ame en omio opao otero-gu i ot a Rwot ame rik Rwot ikome okobo pire baŋ Daudi kede baŋ Culeman ni, “I ot man, kede i Jerucalem ame rik an ayero i akina atekere luŋ me Icrael, en ame bino bedo kan ame owora iye nakanaka.

⁸Mom dok abino miyo tyen jo Icrael loŋo piny atata kun ya i lobo ame rik an amio baŋ kwarigi, ka ce gin obedo gwokere kun otimo ginnoro luŋ i kite ame rik acikogi kede, dok obedo lubo cik luŋ ame rik amirona Muca ocikogi kede.”

⁹Gin gigi rik mom ote winyo kadi acel, dok Manace rik daŋ te miyogi medo timo tim areco ame kato me a rok luŋ ame rik Rwot orweo i nyim jo Icrael.

¹⁰Rwot te cako kop, kun mio omiro mere ame obedo odwarpiny en akobo koppere baŋ jo Icrael ni,

¹¹“Pien Manace abaka me Juda obedo timo tim magi areco me ipyeda, kun timo gin ame kato en ame jo Amor obedo timo oko, ame gin jo ogeo bedo kuno, dok daŋ omio jo Juda obedo timo bal i cal jogi mere;

¹²mannono omio Rwot Obaŋa me Icrael okobo ni, ‘Nen ba, akelo twon timmoro arac meicel i kom Jerucalem kede i kom Juda, ame ŋat acel acel ame bino winyo pire, yite bino mwoc oko.

¹³Dok abino ryeyo tol i Jerucalem, tol ame rik koŋ apimo i Camaria, abino neno ka ocuŋ atira i birigi ame rik koŋ apimo kede ot Akab; dok abino weyo Jerucalem odoco kite ame dano weo kede cani, te wumo oko piny.

¹⁴Jona ame odoŋŋege abino bolo oko i ciŋ okworgi, gin bino doko acalo leyi me acama okworgi, kun oyakogi,

¹⁵pien gin obedo timo gin ame nen arac i nyima, kun omio akemo obedo maka cakere i kare a kwarigi oya i Miciri tuno kede naka atot tin.’ ”

¹⁶Medo i kom mannono, Manace obedo onyo remo a jo apol ata ame mom i balloro, cakere i Jerucalem tuŋ cel tuno naka tuŋ ocele. En omedo man i kom bal ame en omio jo Juda obedo timo, en miyogi timo gin ame nen arac i nyim Rwot.

¹⁷Kop i kom Manace odoŋŋere luŋ, ginnoro luŋ ame rik en otio, kede kit bal luŋ ame en otimo ame mom ocoo kan, gin luŋ tye ocoo i buk me Tekwaro ame tito kop i kom oloc, ote yiko kome i poto ame tye i ŋet ode, i poto a Uja.

¹⁸Manace oto te weo karacel i kwari mere, ote yiko kome poto ame tye i ŋet ode, i poto Uja. Wode Amon en ame te leyo kakare.

¹⁹Amon ocako loc ame mwaka me dittere doŋ oromo pyeraryo wie aryo, en obedo loc mwakki aryo kun bedo i Jerucalem. Nyiŋ tottere Meculemet, ame obedo nyaka a Karuj, dano me Jotba.

²⁰Amon obedo timo gin ame nen arac i nyim Rwot kite ame pappere Manace obedo timo kede.

²¹En obedo lubo kite a pappere luŋ, dok obedo woro anaka cal jogi ame rik pappere obedo woro kun tio pirgi.

²²En oweko woro Rwot ame obedo Obaŋa a kwari mere, kun mom daŋ timo gin ame Rwot mito.

²³Omiro mere rik te poro kop i kome i muŋ, ote wot neke oko i ode.

²⁴Jo me lobo-nono rik te neko jo luŋ ame oporo kop me neko abaka Amon, gin te keto wode Yocia leyo kakare.

²⁵Kop i kom Amon odoŋŋere ducu, ginnoro luŋ ame rik en otio, ame mom ocoo kan, gin luŋ tye ocoo i buk me Tekwaro ame tito kop i kom oloc me Juda,

²⁶Oyiko kom Amon i lyel ame tye i poto a Uja. Wode Yocia en ame te leyo kakare.