Read lango 2 Obakki 22 Bible Online

2 Obakki 22 - lango bible

2 Obakki 22

¹Yocia ocako bedo aloc kun mwaka me dittere oromo aboro, en te bedo loc pi mwakki pyeradek wie acel kun bedo i Jerucalem. Nyiŋ tottere Yedida, ame obedo nyaka Adaya dano me Bojkat,

²Yocia obedo timo gin ame nen atira i nyim Rwot; en obedo lubo kite a kwaro mere Daudi luŋ kun mom wiwira atata.

³I mwaka me apar wie aboro me loc abaka Yocia, en ocwao Capan wot Ajalia, ame obedo wot a Meculam, ame arannere i ot a Rwot, kun kobbe ni,

⁴“Wot naka baŋ Kilkia ame en alamdog adwoŋ, me en kwan wel jami luŋ ame jo okelo i ot a Rwot, ame okur doggola orao i baŋ jo,

⁵me mi limmono luŋ baŋ jo ame loo tic me ot a Rwot, me yiko kan ame oballe,

⁶ame gin jonnono obedo opac, kede jo ame gedo i kidi, me gin ti kede me wilo bao, kede wilo kiddi ame opao me yiko ot oballe.

⁷Ento myero kur bed penyogi kop i kom lim ame omio jo-naca pien gin jo ame genne i tic i lim ame omiogi.”

⁸Kilkia ame obedo alamdog adwoŋ te kobbi Capan aran abaka ni, “Atyeko nwoŋo buk cik i ot a Rwot.” En te miyo bukkono baŋ Capan, eka Capan te kwano.

⁹Capan, aran abaka te tero bukkono baŋ abaka, te kobbi abaka ni, “Omironi doŋ okwanyo lim luŋ ame onwoŋo tye i ot a Rwot, ote miyo daŋ oko baŋ jo ame loo tic me ot a Rwot.”

¹⁰En dok te kobbi abaka ni, “Kilkia alamdog adwoŋ omia bukkoro.” Capan te cako kwano bukkono kun abaka a winyo.

¹¹Kare ame abaka owinyo kop ame okwano i buk me cik, en oyeyeco boŋŋi mere oko.

¹²Abaka te ciko Kilkia, alamdog adwoŋ, kede Akikam wot a Capan, kede Akobor wot a Mikaya, Capan aran kede Acaya amiro abaka, kun kobo ni,

¹³“Wot ipeny wunu Rwot pira, pi lwak kede pi lobo me Juda luŋ, pi kop i buk man ame onwoŋo-ni; pien akemo a Rwot kara doŋ olyeto meicel i komwa, pien kwariwa mom obedo lubo gin ame tye i buk man, kun otimo kite ame ocoo kede kop i komwa i buk man.”

¹⁴Mannono te miyo Kilkia alamdog adwoŋ, Akikam kede Akobor, Capan, Akaya wot baŋ adwarpiny a dako a nyine Kulda, dako a Calum wot a Tikiva, ame obedo wot a Karkac, agwok boŋŋi abaka, onwoŋo i kare-nono bedo i Jerucalem i kabedo moro i Jerucalem kuno tuŋ ocele. Gin owoto kuno ote wot kop i dako nono,

¹⁵en te kobbigi ni, “Rwot Obaŋa me Icrael okobo ni ikobbi wunu ŋat ame oorowu baŋa ni,

¹⁶Rwot okobo ni ebino keto can i kom kabedo man kede i kom jo luŋ ame bedo iye, pi cobo kop luŋ ame ocoo i buk cik ame abaka me Juda doŋ otyeko kwano.

¹⁷Pien gin doŋ okwera oko, ote bedo waŋo odok akur baŋ cal jogi, kun oroka kede me akemo maka i kom gin ame gin obedo tiyo i ciŋgi; mannono omio akemona doŋ bino lyeto agwa meicel i kom kabedo man ame mom dok romo kwe kadi acel.

¹⁸Aco baŋ abaka me Juda ame oorowu me bino penyo Rwot, wun ibino kobbe wunu ni, Rwot Obaŋa me Icrael okobo ni kop i kom kop ame iwinyo,

¹⁹pien i kare ame yin iwinyo kop ame rik akobo i kom kabedo man kede i kom jo luŋ ame bedo iye, ni bino doŋ nono acalo gin oceno, yin iru ŋut oko i cuny, ite mwolle-gu i nyim Rwot, dok ite yeyeco daŋ boŋŋi i komi oko; mannono omio Rwot daŋ owinyo kwacci, man kop a Rwot ikokome.

²⁰Nen ba, an abino dwoki iwoto weo karacel i kwarini, ibino to ote yiki daŋ i kuc, waŋi mom bino neno twon tim arac ame abino kelo i kom kabedo man.” Gin doŋ te dwoko kop baŋ abaka.