Read lango 2 Obakki 23 Bible Online

2 Obakki 23 - lango bible

2 Obakki 23

¹Abaka te cwayo kwena baŋ odoŋe luŋ me Juda kede me Jerucalem, gin luŋ ote cokere baŋe.

²Abaka te wot malo i ot a Rwot, kun woto i jo luŋ me Juda, kede jo luŋ ame bedo i Jerucalem, olamdog kede odwarpiny, jo luŋ adoŋo kede en atino, en te kwano kop luŋ ame tye i buk cik ame onwoŋo i ot a Rwot. En okwano kun lwak luŋ awinyo,

³Abaka te wot cuŋ i ŋet pagi te cikere i nyim Rwot ni ebino lubo Rwot, ebino mako cikere luŋ, kede kop me caden luŋ, kede icwillere daŋ luŋ. En ocikere ni ebino lubo magi luŋ i cunye ducu kede tipo mere luŋ, kun etimo jami ducu ame ocoo i buk cik. Jo luŋ te cikere karacel kede.

⁴Abaka te ciko Kilkia alamdog adwoŋ, kede olamdog ame tye i dul me aryo, kede okur doggola, me kelo jami tic luŋ ame tye i ot a Rwot ame rik otio pi Baal kede pi Acera, kede pi jami apapat ame tye i polo. En te wano jami-nono luŋ i ŋe Jerucalem, i luŋ ame tye i ŋet kulo me Kidron, te coko buru mere luŋ tero naka i Betel.

⁵En te cako ryemo olamdog ame oloc me Juda rik oketo me waŋo odok akur baŋ jogi i ka woro jogi ame tye i kiddi malo i ŋet pacci adoŋo luŋ me Juda, kede en ame omano Jerucalem ducu, karacel kede jo luŋ ame rik waŋo doko akur baŋ Baal, owor cen kede dwe, kede owor jami apapat ame tye i polo.

⁶En te kwanyo daŋ Acera oko i ot a Rwot, te tero oko i ŋe Jerucalem, naka i luŋ me Kidron, te wot waŋo oko kuno, te didino oko apwot calo kwoyo, te onyo kan ame oyiko iye kom jo ata.

⁷Dok te mumuko daŋ udi a jo ame timo tim me alaya pi woro jogi ame onwoŋo rik tye okubere i kom ot a Rwot, kan ame onwoŋo mon cweo iye boŋo pi Acera.

⁸En dok te kwanyo olamdog i boma ocele luŋ me Juda, te babalo daŋ ka waŋo odok akur baŋ jogi luŋ, cakere i Geba, tuno naka i Beerceba. En omumuko ka woro jogi me tim ame onwoŋo rik tye i dogcel me paco a Yocwa, ame rik en adwoŋ ame loo boma me Jerucalem, ame rik onwoŋo tye i dogcel me boma tuŋ cam.

⁹Ento olamdog luŋ ame onwoŋo yalo jogi i wi kiddi malo mom obino i nyim keno lam a Rwot ame onwoŋo tye i Jerucalem, ento gin obedo camo ogati ame mom orubo tobi i akina owotegi.

¹⁰En dok obabalo daŋ Topet ame rik tye i luŋ awobe a Kinnom, me ŋattoro kur dok med waŋo iye wode onyo nyare me yalo jok Molek.

¹¹Abaka te daŋ mumuko cal aguragura luŋ ame yam obakki me Juda ojalo me woro ceŋ, ame onwoŋo rik tye i doggola me donyo i ot a Rwot, i ŋet icika a Natan-melek, lo moro ame rik tio i ot abaka, ame tye i dyekal a Rwot; owaŋo daŋ gadigadi luŋ ame obedo mea ceŋ.

¹²Keno lam luŋ ame rik tye i wi icika mogo ame tye malo i wi ot Akaj, ame rik obakki me Juda otio, kede keno lam ame rik Manace ocacano i dyekal aryo me ot a Rwot, en omumukogi luŋ, orereto piny, te ŋiŋinyo oko atino, te jobo kwoyo mere wot onyo i luŋ me Kidron.

¹³Abaka te babalo daŋ ka woro jogi luŋ ame rik tye tuŋ kide me Jerucalem, i tutuŋ to me kidi me bal ame rik Culeman abaka me Icrael ogero pi Aciterot, jok ipyeda a jo Cidon, kede pi Kemoc, jok ipyeda a jo Moab, kede pi Milkom, jok ipyeda a jo Ammon.

¹⁴En dok te puputo pagi luŋ me woro jogi kun ŋiŋido atino meicel, te toŋo yen ame ocibo i ka woro jok a dako ame olwoŋo ni Acera, te lunyo kelo cogo kom dano yido kakargi.

¹⁵En omuko daŋ keno lam ame rik onwoŋo tye i Betel, i ka woro jok ame rik Jeroboam wot a Nebat ogero ame rik mio jo Icrael opoto ibal. Yocia te didino kiddi ame rik onwoŋo ocano i keno lammaca oŋinyo apwot calo buru, te waŋo daŋ Acera iye oko.

¹⁶I kare ame Yocia olokere, oneno lyel apipim i wi kidi malo, te miyo wot kwanyo cogo kom jo luŋ ame i lyellaca luŋ, te bino waŋogi oko i wi keno lam babalo oko, kun cobo gin ame dano Obaŋa onwoŋo okobo, ame rik en okobo pire con.

¹⁷Yocia te dok penyo jo ni, “Kidi ame aneno ocuŋ igun malo i nyima ca rik ogero kara me po pi ŋa ba?” Jo me kannono te gamo ni, “Macinaca obedo lyel a dano Obaŋa ame rik obino kan kun oya i Juda te bino rabo pi gin ame yin tin imio ocobere-ni i kom keno lam me Betel.”

¹⁸Yocia te kobo ni, “Wek mannono bedi, ŋattoro kur kwany cogo kome.” Jo daŋ te weko cogo mere bedo, ŋattoro mom te gudo kadi acel, karacel kede cogo kom adwarpiny ame rik oya i Camaria.

¹⁹Yocia te kwanyo daŋ ka woro jogi luŋ ame tye i Camaria, i kabedo ame tye i wi kidi malo, kun oroko kede Rwot omio akemo make,

²⁰En te neneko daŋ olamdog luŋ me ka woro jogi ame rik onwoŋo tye kuno i wi keno lam me woro jogi, eka te waŋo cogo kom jo i komgi. Abaka Yocia te doŋ dok cen i Jerucalem.

²¹Abaka te ciko lwak luŋ kun kobbigi ni, “Kwer wunu ecuban me Kato a Rwot Obaŋawu, kite ame ocoo kede i buk man me cikere.”

²²Pien onwoŋo mom dok rik okwero kodi ecubannono kadi acel cakere i kare oŋolkop ame obedo ŋolli jo Icrael kop, akadi naka i kare obakki me Icrael, kede me obakki me Juda;

²³Cite i mwaka me apar wie aboro me loc a Yocia en ame dok ote kwero iye ecuban me Kato a Rwot i Jerucalem.

²⁴Medo i kom mannono, Yocia oryemo daŋ okor tipo oko, kede emuroko, terapim, cal jogi ame opao apaa, karacel kede timmoro luŋ me ipyeda ame onwoŋo timere i Juda kede i Jerucalem; mannono en otimo me wek kop ame ocoo i buk ame Kilkia alamdog onwoŋo i ot a Rwot mok kite ame ocoo kede i bukkaca.

²⁵Mom tye abaka moro ame oporo kede i akina obakki luŋ ame otelo nyime. Mom tye moro i akinagi ame olokere baŋ Rwot i cunye ducu, kede tipo mere ducu, kede teko mere ducu kun lubo cik a Muca luŋ calo en; dok poro kede.

²⁶Kadi bed amannono, twon akemo a Rwot ame onwoŋo doŋ olyeto agwa meicel-li mom gire odok cen kadi acel, akemo mere ame onwoŋo olyeto i kom jo Juda pien Manace onwoŋo rik obedo roke meicel.

²⁷Rwot te kobo ni, “Abino miyo Juda daŋ rwenyo oko i waŋa kite ame akwanyo kede Icrael, abino daŋ boloboma man me Jerucalem oko ame rik ayero, karacel kede ot ame rik akobo pire ni bino bedo me wora.”

²⁸Kop i kom Yocia odoŋŋere ducu, ginnoro luŋ ame yam en otio ame mom ocoo kan, gin luŋ tye ocoo i buk me Tekwaro ame tito kop i kom oloc me Juda,

²⁹I kare mere en ame Parao Neko, abaka me Miciri, owoto kede baŋ abaka me Acuria naka i dog kulo me Efurate, Abaka Yocia rik te wot me wot rwatte kede; cite i kare ame Parao Neko onene, oneke oko i Megido.

³⁰Omiro mere te tiŋo kome i Megido, kun otino i gadigadi ote tero i Jerucalem, ote wot yiko kome i lyellere en ikome. Lwak te yero Yekoakaj ame obedo wode en Yocia ote wirre kede moo me bedo abakagi. En doŋ te leyo kaka pappere.

³¹Yekoakaj ocako loc kun mwaka me dittere doŋ oromo pyeraryo wie adek, eka te bedo loc i Jerucalem pi dwete adek keken. Nyiŋ tottere Kamutal, ame obedo nyaka a Jeremia me Libna.

³²Yekoakaj obedo timo gin ame nen arac i nyim Rwot, kun lubo kite tim luŋ ame yam kwari mere obedo timo.

³³Parao Neko rik te tweye kede jegere i Ribla i lobo me Kamat, me en kur dok bed loc i Jerucalem en te ŋolo cul me ryal ame pekkere romo ratili tutumia abiro, mia abic kede me jabu ame pekkere romo ratili pyerabiro wie abic.

³⁴Parao Neko te keto Eliakim wot a Yocia bedo abaka kun leo kaka pappere Yocia, eka te loko nyiŋe oko ni Yekoyakim. Ento Yekoakaj en te tero oko naka i Miciri, te daŋ wot to kuno,

³⁵Yekoyakim te miyo ryal kede jabu ame oŋolo baŋ Parao, kun onwoŋo orao i baŋ jo me lobo mere kite ame Parao ociko. En orao ryal kede jabu i baŋ jo ame bedo i lobonono, kun ŋat acel acel culo wel ame oŋolle me amia baŋ Neko.

³⁶Yekoyakim ocako loc ame mwaka me dittere oromo pyeraryo wie abic, en te bedo loc i Jerucalem pi mwakki apar wie acel. Nyiŋ tottere Jebida, ame obedo nyaka a Pedaya me Ruma.

³⁷En obedo timo gin ame nen arac i nyim Rwot, kun lubo kite tim luŋ ame kwari mere obedo timo.