Read lango 2 Obakki 24 Bible Online

2 Obakki 24 - lango bible

2 Obakki 24

¹I kare mere en Yekoyakim en ame rik Nebukadnejar, abaka me Babulon, obino kede i kom Juda, eka Yekoyakim te doko amiro mere pi mwakki adek; i ŋe mannono Yekoyakim te jem oko i kome.

²Rwot te cwayo lwak mony a jo Kaldaya me bino lweny i kom Juda, kede mony a jo Curia, kede mony a jo Moab, kede mony a jo Ammon; Rwot ocwao mony magi luŋ i komgi me bino jwerogi oko luŋ kite ame rik en omio omiro mere odwarpiny okobo.

³Ateni mony man obino i kom Juda pi cik a Rwot, me miyo waŋgi rwenyo oko i nyime pi bal a Manace, kun lubo kite bal luŋ ame Manace rik obedo timo,

⁴dok daŋ pi remo a jo a mom i bal ame en obedo onyo nono; pien en omio remo a jo a mom i bal oony atek meicel i Jerucalem luŋ ame Rwot onwoŋo mom twero timo kica iye.

⁵Kop i kom Yekoyakim odoŋŋere ducu, kede ginnoro luŋ ame en rik otimo ame mom ocoo kan, gin luŋ tye ocoo i buk me Tekwaro ame tito kop i kom oloc me Juda.

⁶Yekoyakim oto te wot weo karacel i kwari mere. Wode Yekoyakin en ame te leyo kakare.

⁷Abaka me Miciri mom dok omedo ya i lobo mere, pien abaka me Babulon onwoŋo doŋ otyeko mayo lobo luŋ ame rik onwoŋo tye i ciŋe, cakere i luŋ me Miciri tuno naka i kulo Eufrate.

⁸Yekoyakin ocako loc kun mwaka me dittere oromo apar wie aboro, en te bedo loc i Jerucalem pi dwete adek keken. Nyiŋ tottere Nekocita ame obedo nyaka Elnatan me Jerucalem.

⁹En obedo timo gin ame nen arac i nyim Rwot, kun lubo kite tim luŋ ame pappere onwoŋo obedo timo.

¹⁰I kare-nono omiro a Nebukadnejar, abaka me Babulon, obino iye i Jerucalem, eka monnyere te guro boma me Jerucalem oko.

¹¹Abaka Nebukadnejar me Babulon owoto i Jerucalem i kare ame omiro mere ogure oko,

¹²Yekoyakin te ye miye gire kene i ciŋ abaka me Babulon; en kede tottere, kede omiro mere, rwode mere, kede odoŋe ame loo paco mere. Abaka me Babulon te tere oko acalo opii i mwaka me aboro me loccere,

¹³te tero daŋ lim luŋ ame onwoŋo tye i ot a Rwot, kede en ame onwoŋo tye i ot kanolim abaka, eka te totoŋo jami ame onwoŋo rik otio i jabu a rik tye i ot a Rwot, oŋido luŋ atino, jami luŋ ame rik Culeman, abaka me Icrael otimo kite ame rik Rwot okobo kede.

¹⁴Otero daŋ luŋ i Jerucalem iyi opii, anaka rwode luŋ, twoni jo atek i lweny ducu; en oyako jo ame romo tutumia apar, kun yako anaka odoŋe me tic apapat, anaka otet-gu ducu. Dano moro mom odoŋ kadi acel, kono ka jo ame can doŋ onwoŋo orido okato kare en ame odoŋ i lobo-nono.

¹⁵En te tero jo magi oko i opii i Babulon: abaka Yekoyakin, tottere, mon abaka, odoŋe abaka ame onwoŋo loo tic apapat, kede rwode ame rik jo me lobo mere; okwanyogi luŋ i Jerucalem te terogi i Babulon.

¹⁶Lwak opii apol ata ame abaka me Babulon otero tye iye twoni jo atek meicel i lweny ame romo tutumia abiro, kede acel, kun gin luŋ obedo jo ame doŋ oteggo ame romo lweny.

¹⁷Abaka me Babulon te dok keto Matania omina a Yekoyakin me bedo abaka, eka te daŋ loko nyiŋe oko ni Jedekia.

¹⁸Jedekia ocako loc ame mwaka me dittere oromo pyeraryo wie acel, en te bedo loc i Jerucalem pi mwakki apar wie acel. Nyiŋ tottere Kamutal, nyaka Jeremia me Libna.

¹⁹En obedo timo gin ame nen arac i nyim Rwot, kun lubo ginnoro luŋ ame Yekoyakin obedo timo.

²⁰Pien akemo omako Rwot omio otuno kan ame en doŋ mom romo kanyo, Rwot te bolo Jerucalem kede Juda oko tene, kun kwanyogi oko i nyime.