Read lango 2 Obakki 25 Bible Online

2 Obakki 25 - lango bible

2 Obakki 25

¹Abaka Jedekia rik te cako jem oko i kom abaka me Babulon. I mwaka me aboŋwen me loccere, i dwe me apar, i nino dwe apar, en ame Nebukadnejar abaka me Babulon obino iye ikom Jerucalem, kun bino karacel i monnyere luŋ, te bino guro Jerucalem oko; ote daŋ toro lobo guro oko irit.

²Boma te bedo ame oguro kittono naka i mwaka me apar wie acel me loc abaka Jedekia.

³I nino dwe aboŋwen me dwe me aŋwen onwoŋo kec doŋ orido jo atek meicel ame cam mom doŋ romo nen pi jo ame tye i boma.

⁴Jo te muko apama cel me boma oko, eka abaka kede monnyere te lwi ciro oko dyewor, kun obeo i dogcel ame tye i akina cel aryo me boma, ame tye i ŋet poto abaka, kadi bed rik jo Kaldaya onwoŋo oguro boma oko. Gin te wot lubo yo ame dok tutuŋ Araba.

⁵Cite mony a jo Kaldaya rik te ryemo yo abaka, ote bino make i bar me Jeriko twal, monnyere te ket weke kene.

⁶Mony me Kaldaya te make kele naka baŋ abaka me Babulon i Ribla, kan ame ote ŋolle iye kop.

⁷Gin te cako neko awobe mere i nyime kun en aneno kede waŋe, ote lokere i kome woto waŋe oko, ote tweye kede jegere tere i Babulon.

⁸I dwe me abic me nino dwe abiro, ame obedo mwaka me apar wie aboŋwen me loc a Nebukadnejar, abaka me Babulon, i nino-nono Nabujaradan, adwoŋ ame loo jo ame gwoko abaka me Babulon, owoto i Jerucalem.

⁹En te waŋo ot a Rwot oko karacel kede ot abaka, kede udi luŋ ame onwoŋo tye i Jerucalem; en owaŋo udi adoŋo luŋ kede mac.

¹⁰Mony a jo Kaldaya luŋ ame rik onwoŋo tye baŋ adwoŋ a jo ame gwoko abaka, gin omuko apama cel me Jerucalem oko.

¹¹Nebujaradan, adwoŋ ame loo jo ame gwoko abaka te tero jo luŋ ame onwoŋo rik oweko i Jerucalem, medo kede jo ame rik okwero abaka me Babulon, karacel kede lwak ocele luŋ, gin luŋ oterogi oko acalo opii.

¹²Cite en rik te weko jo mogo ame ocan doŋ kuno, me gin bed jo ame gwoko poto olok kede opur i kweri dyan.

¹³Jo Kaldaya rik te tuturo pagi aryo luŋ me mola ame rik onwoŋo tye i ot a Rwot, kede gadigadi atitino, kede dero pii me mola ame rik tye i ot a Rwot, gin oturo ote ŋinyo atino, ote tero i Babulon.

¹⁴Gin otero tako jobo buru apol, atok buru, makac, tako me waŋo odok akur, karacel kede jami luŋ ame onwoŋo otio i mola ame rik otio kedgi i ot a Rwot,

¹⁵kede weer me lodi mac, kede becen. En otero jami luŋ me jabu acalo jabu, kede jami luŋ me ryal en otero acalo ryal.

¹⁶Aco kop a mako pagi aryo, kede nam acel, kede gadigadi atitino ame rik Culeman otio me ot a Rwot, mola ame odonyo i komgi dwoŋ meicel ame pekkere mom romo pimmere.

¹⁷Pagi acel acel borrere tye futi pyeraryo wie abiro. I wie malo onwoŋo oketo iye tok me mola ame borrere romo futi anwen kede nucu. I kom tok ote dok keto iye boo kede cal okwer pomegranat, kun gin luŋ otio i mola oguro tok dyere. Pagi me aryo daŋ onwoŋo rom aroma kede awottere, tye daŋ i tokkere kede bwo mere me mola.

¹⁸Adwoŋ ame loo jo ame gwoko abaka otero daŋ Ceraya, ame onwoŋo obedo alamdog, kede alube Jepania, kede okur doggola me ot a Rwot adek.

¹⁹Dok te tero daŋ adwoŋ ame onwoŋo loo mony i dye boma karacel kede jo abic ame obedo omemba me cokere abaka ame rik onwoŋo tye i boma; kede aran adwoŋ me mony ame rik obedo ŋat ame coko jo pi lweny; kede jo pyerabicel ame obedo jo me lobonono ame gin onwoŋo tye i boma.

²⁰Nebujaradan, adwoŋ ame loo jo ame gwoko abaka, omakogi te terogi naka i Ribla baŋ abaka me Babulon.

²¹Abaka me Babulon te nekogi oko luŋ i Ribla i lobo me Kamat. Mannono en kite ame rik okwanyo kede jo Juda i lobogi ote terogi iyi opii.

²²Nebukadnejar, abaka me Babulon rik te keto Gedalia wot Akikam, ame obedo wot a Capan me loyo jo odoŋ i lobo me Juda, jo ame rik en oweko kuno.

²³Kare ame otel wi mony ame tye i kabedo apapat i lobo me Juda luŋ owinyo ni abaka me Babulon otyeko keto Gedalia me bedo aloc, gin obino baŋ Gedalia karacel i jo megi magi i Mijipa: Icimael, wot a Netania, Yokanan wot a Karea, Ceraya wot a Tankumet, dano me Netopa, kede Jaajania wot a Maaka.

²⁴Gedalia te kwoŋ i nyimgi kede i nyim jogi, kun kobo ni, “Kur ibed wunu kede lworo pi odoŋe ame loo tic ame obedo jo Kaldaya; wun myero ibed wunu i lobo man kun itio wunu pi abaka me Babulon, ibino bedo giwu aber aboŋo peko moro.”

²⁵Cite i dwe me abiro, Icimael wot a Netania, ame obedo wot a Elicama ame en dano acel me doggola aloc obino i jo, apar te bino cako lweny i kom Gedalia, ote daŋ neko oko, kun oneko Ojudaya kede jo Kaldaya ame onwoŋo rik tye baŋe i Mijipa.

²⁶Jo luŋ doŋ te ya wot oko i Miciri pi lworo jo me Kaldaya; jo atino kede en adoŋo luŋ owoto oko anaka odoŋe ame telo wi mony.

²⁷I mwaka me pyeradek wie abiro me bedo a Yekoyakin, abaka me Juda iyi opii i Babulon, i dwe me apar wie aryo, nino dwe pyeraryo wie abiro, en ame Evil-merodak, abaka me Babulon otimo iye kica baŋ Yekoyakin abaka me Juda, te gonyo oko i buc, i mwaka ame en: Evil-merodak ogeo iye loc.

²⁸En te bedo kop i kica meicel baŋ Yekoyakin, omie twon kommoro adwoŋ meicel ame loo kom obakki luŋ ame rik onwoŋo tye baŋe i Babulon.

²⁹En omio Yekoyakin ogonyo boŋo me buc oko i kome. En rik te bedo cam nisno i nino karacel abaka pi kare me kwo mere luŋ.

³⁰Kop a mako ginnoro me konyere mere, abaka rik te bedo miye gi-konyere mere ducu naka ka kwo mere otum.