Read lango 2 Obakki 3 Bible Online

2 Obakki 3 - lango bible

2 Obakki 3

¹I mwaka me apar wie aboro me loc a Yekocafati, abaka me Juda, en ame Joram wot Akab ocako loyo kede jo Icrael i Camaria, en te bedo aloc pi mwakki apar wie aryo.

²En obedo timo bal ame nen arac i nyim Rwot, kadi bed ballere mom obedo a rom i me a pappere kede me a tottere, en omuko kidi ame pappere rik ocibo me woro Baal.

³Cite en daŋ obedo timo bal ame rom aroma i me a Jeroboam wot a Nebat ame onwoŋo obedo aloc i nyime, ame omio jo Icrael otimo bal.

⁴I kare-nono onwoŋo Meca abaka me Moab opito lwak rommi apipim; mwaka i mwaka en rik onwoŋo mio itino rommi tutumia mia acel baŋ abaka me Icrael kede yer rommi ame omworo i kom nyogi rommi tutumia mia acel.

⁵Cite i kare ame abaka Akab me Icrael oto, Meca abaka me Moab te cako jem oko i kom abaka me Icrael.

⁶Man te miyo abaka Joram ya oko i Camaria oyotoyot, te coko jo Icrael luŋ me lweny.

⁷En te cwayo kwena baŋ Yekocafati abaka me Juda kun kobbe ni, “Abaka me Moab otyeko jem oko i koma; yin daŋ itwero wot kedwa me wot lweny i kom jo Moab?” Yekocafati te gamo ni, “Abino wot. Jamina luŋ obedo megi, an a megi kede jona kede aguragurana daŋ.”

⁸En dok te penyo Joram ni, “Obino lubo yo mene me wot lweny?” Joram te gamo ni, “Obino lubo yo ame beo i tim me Edom.”

⁹Mannono te miyo abaka me Icrael kede abaka me Juda kede me Edom te cako wotgi. I kare ame gin doŋ otyeko woto wot me nino abiro kun ogono piny agona, mom onwoŋo pii moro me amata a mony kede me amata a leyigi ame onwoŋo tye aciro alubo yorgi kun oyeo yec,

¹⁰Abaka me Icrael te kobo ni, “Ama doi! Rwot doŋ okelo wan obakki adek-ki me bino miyowa i ciŋ abaka me Moab.”

¹¹Yekocafati te kobo ni, “Adwarpiny a Rwot mom tye kan, me koŋ openy kop a Rwot i baŋe?” Dano moro acel i akina omiro abaka me Icrael te gamo ni, “Erica wot a Capat en ame tye kan, en ŋat ame onwoŋo rik konyo Elia.”

¹²Yekocafati te kobo ni, “En obedo adwarpiny ateteni ame twero kobo kop a Rwot.” Man te miyo abaka me Icrael kede Yekocafati kede abaka me Edom wot baŋ Erica.

¹³Erica te kobbi abaka me Icrael ni, “An kara atwero notte kedi i yore aŋo? Yin wot giri baŋ odwarpiny ame rik pappi kede totti penyo kop i baŋgi.” Cite abaka me Icrael te gamo ni, “Mom gire amannono, pien Rwot en ame olwoŋo obakki adek-ki me bino miyogi i ciŋ jo Moab.”

¹⁴Erica te gamo ni, “Kite acalo Rwot me mony tye kwo-ni, Rwot ame an atito pire-ni, onwoŋo mom atwero timo ginnoro piri, kadi tiŋo waŋa neni, kono mom onwoŋo aparo pi Yekocafati abaka me Juda.

¹⁵Koŋ doŋ ikella wunu lo moro ame adiro i goyo naŋa.” I kare ame ago naŋa ocako goyo naŋa, teko a Rwot te bino i kom Erica,

¹⁶omio en te kobo ni, “Man en kop ame Rwot okobo, ‘Abino miyo pii poŋ i kulo otwo-ni luŋ.’

¹⁷Pien Rwot okobo ni, ‘Wun mom ibino neno wunu yamo, akadi kot, cuny kulo en ame pii bino poŋ iye, eka wun karacel kede dokwu kede leyiwu luŋ ibino mato wunu pii-nono.’

¹⁸Man gin ayot meicel baŋ Rwot; en bino miyo jo Moab i ciŋwu.

¹⁹Ibino mayo wunu bomagi abeco wok-ku luŋ ame gin ocecelo i cel atek meicel; ibino totoŋo wunu yengi luŋ ame nyak, ibino toro wunu daŋ waŋ piigi luŋ, ite babalo wunu pottigi abeco ame ceko cam oko, kun icoro wunu gweŋe i pottigi-nono ducu.”

²⁰Orwo mere odiko, i kare ame omio iye mot me yalo Rwot, pii te cako bino kun mollo i tutuŋ Edom, eka te poŋ i kabedo ducu.

²¹I kare ame jo Moab doŋ owinyo ni obakki adek-ki obino me lweny i komgi, gin te lwoŋo jo luŋ ame onwoŋo romo ruko ruk me lweny, cakere i kom awobe a pwod tino tuno kede naka i kom jo adoŋo, ote terogi wot ryeye i waŋ lobo.

²²I kare ame gin oya malo odiko, ceŋ onwoŋo tye aryeny i kom pii, kun mio pii nen arema calo remo.

²³Gin te kobo ni, “Man gire remo, nen calo obakki adek-ki obedo lweny kengi kengi ote nekere oko, Wun jo me Moab owot doŋ oyak wunu jamigi!”

²⁴Ento i kare ame gin otuno i gony a jo Icrael, jo Icrael te twarre malo cako lweny i komgi, gin te mukere oko i nyimgi i ŋwec; jo Icrael te medde ryemo yorgi kun nekogi meicel.

²⁵Jo Icrael te mumuko bomagi oko luŋ. Gin te bedo babao gweŋe i pottigi luŋ ame gin obebea iye, tuno wan ame gweŋ doŋ oyiyida atata i potti abeco luŋ; ote daŋ bedo toro waŋ pii ducu, kun daŋ ototoŋo yen abeco ame nyak. Iyi agikki mere doŋ jo Icrael ame lwenyo atiŋdio te guro boma me Kir-karecet, ame en keken onwoŋo doŋ odoŋ, ote cako lweny iye tuno ka doŋ oloo.

²⁶Kare ame abaka me Moab oneno ni mony doŋ odie atek meicel, en okwanyo jo ame lwenyo i pala ame romo mia abiro, te temo yeco kede yo mere kun beo i akina okwor me enwoŋ yo me riŋo oko baŋ abaka me Curia, cite naka mom otwerre.

²⁷En te mako wode adwoŋŋere, ame onwoŋo myero bin lee kakare acalo abaka, te yalo obaŋa me Moab acalo mot awaŋa, i cel ame ocelo i boma. Akemo te mako jo Icrael meicel omio gin te ya dok oko i lobogi.