Read lango 2 Obakki 4 Bible Online

2 Obakki 4 - lango bible

2 Obakki 4

¹I kare-nono dako moro acel ame cware oto, i akina mon odwarpiny obino baŋ Erica te kobbe ni, “Adwoŋ, cwara oto oko! Kite ame yin iŋeo kede, en onwoŋo obedo dano ame lworo Obaŋa, ento aman lo moro ame onwoŋo en tye i banya mere obino te bino tero awobena aryo me wot bed opii mere me culo banya.”

²Erica te kobbe ni, “Kara myero an doŋ atim gin aŋo ba? Ŋo ame yin itye kede i odi?” En ogamo ni, “Mom atye i ginnoro kadi acel, adwoŋ, kono ka tabo me moo keken en ame tye.”

³Erica te kobbe ni, “Wot baŋ owoteni me iwot ikwa gulli i baŋgi ame yigi nono apol acalo itwero.

⁴Eka yin karacel kede awobeni ite donyo wunu i ot, ite cego wunu doggola oko, cak onyo moo iyi gulli ducu. Gulu ame open, kwany icwal teŋe.”

⁵Dako-nono daŋ te wot donyo awobe mere aryo i ot ote cego doggola oko; en te bedo onyo moo iyi gullu kun awobe mere cwaye gulli.

⁶Kare ame en doŋ opiko moo opoŋ gulli ducu, en openyo wode ka ce gulu ocele pwod odoŋ. Wode te gamo ni gulu moro mom doŋ tye. Moo te doŋ cuŋ oko kun mom dok mol.

⁷En te dok baŋ Erica te wot titte, Erica te kobbe ni, myero en wot cat moo oko me ecul kede banya, me en karacel kede awobe mere okonyere kede en ame odoŋ.

⁸I nino moro acel Erica owoto i Cunem, kan ame dako moro ame alonyo onwoŋo bedo iye. Dako-nono rik te cwane me wot cam kede, eka i kare luŋ ame Erica rik beo kuno, en beo cemo iye.

⁹Dako-nono te kobbi cware ni, “An aniaŋ ni dano ame bedo beo kan kare ducu-ni obedo gire dano Obaŋa.

¹⁰Wan myero oger atin icika moro i wi ot malo ote keto iye itanda, meja, kom kede mac tara, me wek ka en olimowa, en twero wot bedo iye.”

¹¹I nino moro acel, Erica owoto kuno, te wot donyo iyi icika weo iye.

¹²En okobbi amiro mere Gekaji me wot lwoŋo dako me paco-nono. Dako-nono obino te bino cuŋ i nyime.

¹³Okobbi amiro mere ni, “Penye gin a myero otim baŋe pi ayela man luŋ ame en oneno pi gwokowa. Onyo en tye i kopporo ame mito ni awot akob baŋ abaka pire onyo baŋ adwoŋ ame loo mony?” Dako te gamo ni, “An gira abedo i akina jowa.”

¹⁴Erica te penyo Gekaji ni, “Atim ŋo pire?” Gekaji te gamo ni, “Nen en mom tye kede wode moro, cware daŋ doŋ oti oko.”

¹⁵Erica te kobbe ni, “Koŋ doŋ ilwoŋe ebin kan.” I kare ame olwoŋe, en obino te bino cuŋ i doggola,

¹⁶Erica te kobbe ni, “I mwaka abino i kodi kare-ni ibino tiŋo wodi i kori.” En te gamo ni, “Pe amannono adwoŋŋa, myero kur ibwola an aŋecani. Nen yin ibedo dano Obaŋa.”

¹⁷Ento kite ame Erica onwoŋo okobo, dako-nono oyac te daŋ bino nywalo wode oko i mwaka anyen i kodi kare ame onwoŋo okobo ikokome.

¹⁸Kare ame atin doŋ odoko adit, nino moro acel en owoto baŋ pappere i poto, baŋ jo ame akac.

¹⁹En te wot kobbi pappere ni, “Wia abara! Wia abara!” Pappere te kobbi omiro mere ni, “Tiŋ atin-nu iter baŋ tottere.”

²⁰Amiro-nono te tiŋo awobi-nono tero baŋ tottere, en te wot bedo i tyen tottere naka dyeceŋ, eka te to gire oko.

²¹Tottere te tiŋe wot pyele i wi tanda Erica te weke kuno, en te cego doggola oko.

²²En te wot lwoŋo cware te kobbe ni, “Cwa amiro acel bin baŋa kan kede kana, pien amito wot baŋ dano Obaŋa oyotoyot, me ate dwogo.”

²³Cware te gamo ni, “Piŋo kara iwot baŋe tin? Dwe gire mom ru opor, cabit daŋ mom ru oromo.” En te gamo ni, “Bino bedo ber.”

²⁴En te tweyo kom me bedo i ŋe kana, te kobbi amiro mere ni, “Wek kana riŋ nakanaka kur cuŋ tuno ka an akobbi.”

²⁵En te ya wot baŋ dano Obaŋa i wi kidi me Karmel. I kare ame Erica onene kun abino, okobbi amiro mere Gekaji ni, “Neno dako me Cunem ca abino ca. Riŋ iwot irwatte kede, ipenye ka ce en tye aber, dok cware kede wode daŋ tye aber.”

²⁶En te kobbi Gekaji ni etye aber.

²⁷Ento i kare ame en obino baŋ Erica en oryebere piny owore te mako tyen Erica. Gekaji te mito ni kono ecore teŋe, cite Erica te kobbe ni, “Weke gire, pien tye i twon can adwoŋ meicel i cunye; cite Rwot mom okobba kopporo iye.”

²⁸Dako te kobbe ni, “Adwoŋŋa, an rik akwai pi atin awobi? Rik mom akobbi ni kur ibwola?”

²⁹Erica te lokere baŋ Gekaji te kobbe ni, “Ru ya malo me itwe pyeri oyotoyot, ikwany abironi imak i ciŋi me iwoti. Kur icuŋ imot ŋattoro i yo akadi ŋattoro omoti, kur daŋ igam doge. Wot atir naka i ot ite wot pyelo abirona i waŋ atin.”

³⁰Totta atin dok te kobo ni, “Kite ame Rwot tye kede kwo-ni, dok yin daŋ itye kwo-ni, mom abino pokere kedi.” Gin aryo luŋ ote ya cako wotgi karacel.

³¹Gekaji owoto oyotoyot i nyimgi, te wot keto abiro Erica i waŋ atin, cite ginnoro mom te timere kadi acel, kun dwonnoro daŋ mom winyere ame nyuto ni atin kwo. Mannono omio en odok cen me wot rwatte kedgi, eka te kobbigi ni, “Atin gire mom ru ocoo.”

³²Kare ame Erica otuno, en odonyo kene i cika mere, te neno atin obuto i wi tanda mere kun oto oko,

³³Ocego doggola te kwayo Rwot.

³⁴En te ya malo wot buto i kom atin kun keto doge i dog atin, waŋe i waŋ atin, opyelo daŋ bade i bad atin. I kare ame tye obuto oryeye aryea i kom atin, kom atin te cako doko alyet oko.

³⁵Erica oya malo i kom atin, te wowota i dye ot kun wirre tuŋŋi i, tuŋŋi te dok wot buto i kom atin. Atin te jiro tyen abiro, te yabo waŋe.

³⁶Erica te lwoŋo Gekaji te titte ni myero en lwoŋ totta atin. Kare ame tota atin obino, Erica te kobbe ni, “Gam wodi ene.”

³⁷Dakonono te bino rumo piny i nyime te tiŋo atinnere wot kede.

³⁸I kare-nono ame kec onwoŋo opoto i lobo, Erica owoto i Gilgal. Kare ame en onwoŋo rik tye apwonyo odwarpiny, en okobbi omiro mere ni myero cib twon gulu moro adwoŋ i keno, me ted cam ame romogi luŋ.

³⁹Ŋat acel i akinagi te wot i poto me wot ŋwedo dek. En te nwoŋo agaba me tim, te pwono nyige adwoŋ meicel te tero paco. En oŋweŋwero te keto i gulu, kun mom ŋeo kit dekkono.

⁴⁰I kare ame otoko dek me jo cam, kare ame gin obilo, gin ocako doŋo korgi kun okobbi Erica ni, “Yin dano Obaŋa, yat gire ennono!” Camo dekkono te loyogi oko.

⁴¹Erica te kobo ni, “Kel wunu moko kwon.” Ote kelo onyo i gulu kun en kobo ni, “Tokk i jo-nu dek me gin cam.” Gin doŋ mom te nwoŋo balloro i kom dek.

⁴²I kare moro ocele, lo moro obino kun oya i Baal-calica kun okelo moko kwon me wi mwaka baŋ Erica, ogati me cayiri ame ogeo kayo i mwaka-nono, ame romo pyeraryo nono, kede wit kal ame pwod okao akaa. Erica te kobbi amiro mere ni myero mi odwarpiny cam.

⁴³Ento amiro mere te gamo ni, “Itamo ni man twero romo jo mia acel twal?” Erica dok te kobo ni, “Yin migi ocam, pien Rwot okobo ni gin obino camo te daŋ dok loyogi oko.”

⁴⁴Amiro mere te keto cammono i nyingi, gin ocamo te loyogi oko kite ame Rwot onwoŋo okobo.