Read lango 2 Obakki 5 Bible Online

2 Obakki 5 - lango bible

2 Obakki 5

¹Naaman adwoŋ mony me Curia, rik onwoŋo obedo twon dano adwoŋ meicel i nyim abaka me Curia dok daŋ oworo atek, pien Rwot obedo miyo jo Curia loyo lweny pi Naaman. En rik obedo twon loo moro atek meicel i lweny, ento dobo rik onwoŋo tye i kome.

²I kare moro ame jo Curia oyako jo Icrael, gin okelo atin nyako moro i lobo a jo Icrael ame te doko aŋeca a dako a Naaman.

³I nino-moro en te kobbi imattere ni, “Kono adwoŋŋa-ni onwoŋo rik ceggi kede adwarpiny ame tye i Camaria ca, kono ocaŋo two dobo oko i kome.”

⁴I kare ame Naaman owinyo kop man, en owoto baŋ abaka te wot kobbi abaka kop ame aŋeca-nono okobo.

⁵Abaka me Curia te gamo ni, “Woti, abino coyo waraga iwot kede baŋ abaka me Icrael.” Naaman te cako wot kuno, kun tero ryal ame romo cekel tutumia pyeradek kede jabu ame romo cekel tutumia abicel kede boŋŋi ame oruko i nino adoŋo gin apar.

⁶Waraga ame omie rik ocoo kit man; “Waraga man ocoo baŋi me nyuto amirona Naaman baŋi. Tim ber icaŋ two dobo i kome oko.”

⁷I kare ame en okelo waraga-nono baŋ abaka me Icrael, te kwano, abaka oyeco boŋo mere i kome oko kun kobo ni, “An adoko Obaŋa bo, ame neko dano dok te cero oko-ni, en ame omio dano-ni ocwalo kop baŋa ni myero acaŋ two me dobo i kom lo-ni oko-nie? Man gire nen kannaler ni en tye aroko kolo baŋa.”

⁸Kare ame Erica dano Obaŋa owinyo ni abaka me Icrael oyeco boŋo i kome oko, en ocwao kop baŋ abaka kun kobo ni, “Piŋo kara ibedo kede cwercuny ame omio iyeco boŋo oko i komi? Cwal dano-nono baŋa, me an abin amie eŋe ni adwarpiny kara tye iyi Icrael!”

⁹Mannono te miyo Naaman wot baŋ Erica kun woto aguragura mere luŋ kede gadigadi, en te wot cuŋ i doggola me ot Erica.

¹⁰Erica te cwayo kop baŋe kun kobo ni, “Wot ilwokere i Jordan tyen abiro, komi bino roc dok kakare ite caŋ oko i itwo-ni.”

¹¹Naaman te cako ya i kannono ame akemo ociro oko, te kobo ni, “An onwoŋo atamo ni en bino bino baŋa te kwayo Rwot Obaŋa mere, te weweo ciŋe i koma kan alit, te caŋa oko.

¹²Kulo Abana kede kulo Parpar ame tye i Damaciko mom beco atek ame kato pie luŋ ame tye iyi Icrael? Onwoŋo mom atwero lwokere gira kuno eka ate caŋ?” En te ya oko i kuno kun akemo ociro meicel.

¹³Ento amiro mere te wot baŋe kuno, te kobbe ni, “Adwoŋŋa, kono rik adwarpiny okobbi ni iwot itim ginnoro atek meicel, kono mom itimo? Kara ŋo ame aman moni wot lwokere me icaŋ giri oko?”

¹⁴Naaman te doŋ wot i kulo Jordan, te wot lutte iye tyen abiro kite ame Erica dano Obaŋa, onwoŋo okobbe, kome daŋ te caŋ gire oko. Del kome te roc doko aber calo me atin okere.

¹⁵En odok cen baŋ Erica karacel i jo mere luŋ te wot kobbe ni, “Aman an doŋ aŋeo ni mom tye obaŋa moro ocele i lobo, kono ka Obaŋa a jo Icrael keken; doŋ yim myero itim ber igam motta, an amironi.”

¹⁶Erica te gamo ni, “Kite acalo Rwot tye kwo-ni, Rwot ame an atio pire-ni, mom gira abino gamo ginnoro i baŋi.” Naaman te bedo diye ni myero en gam, ento Erica te kwero gire oko.

¹⁷Naaman dok te kobbe ni, “Ka ce doŋ ikwero gamo motta oko, tim ber, imia an amironi lobo ame kana romo yeyo, pien cakere tin, an mom dok abino yalo obaŋa moro ocele i mot aŋola onyo i mot awaŋa, kono ka Rwot keken.

¹⁸Pi mannono atamo ni Rwot bino timo an amironi kica ka ce abino wot didik adwoŋŋa, i ot a Rimmon ame obedo obaŋa a jo Curia, me wot wore kuno, kun ojeŋere i bada, dok an daŋ akulo wia piny i ot a Rimmon, Rwot myero tima kica pi kop man.”

¹⁹En te kobbe ni, “Wot giri kede kuc.” Kare ame en mom ru owoto abor wok,

²⁰Gekaji ame obedo amiro Erica, dano Obaŋa ca, te kobo ni, “Koŋ inen, adwoŋŋa oweko Naaman dano me Curia owoto aboŋo culo ginnoro kadi acel! Piŋo okwero gamo mot ame okelle? Kite acalo Rwot tye kwo-ni, an abino ryemo yore me wek agam ginnoro i baŋe.”

²¹Gekaji te cako ryemo yo Naaman. Kare ame Naaman oneno dano tye aryemo yore, en te yito oko piny i wi gadigadi mere me wot mote kun penye ni, “Kopporo tye?”

²²En ogamo ni, “Kopporo gire pe. Adwoŋŋa en ame ocwala me kobbi ni jo aryo i akina odwarpiny ame bedo i lobo kidikidi me Epraim obino amanni, tim ber imigi ryal ame romo cekel tutumia adek kede boŋŋi aryo ame oruko i nino adoŋo.”

²³Naaman te gamo ni, “Gam, tutumia abicel ene.” Naaman dok te medde diye, ote miye ryal ame en te tweyo i cao mere kede boŋŋi aryo ame oruko i nino adoŋo, te miyo omiro mere aryo tero kun otelo nyim Gekaji.

²⁴I kare ame gin otuno i wi kidi malo, Gekaji te kwanyo jami-nono oko i baŋgi te cwalo i ot. En te cwayo omiro a Naaman dok cen baŋ adwoŋgi.

²⁵En odonyo i ot adwoŋŋere, Erica te penye ni, “Yin iya ikwene?” En te gamo ni, “Amironi gire mom owoto kannoro kadi acel.”

²⁶Ento Erica te kobbe ni, “An onwoŋo atye kedi kuno i cuny i kare ame loca ya i wi gadigadi mere me bino rwatte kedi. Man gire mom obedo kare aber me gamo lim onyo boŋŋi me aruka, poto jeituni kede poto olok, rommi onyo dok, opii onyo aŋeca.

²⁷Mannono omio dobo a Naaman bino kobo i komi kede i kom ikwai nakanaka!” Kare ame Gekaji ya i nyime, kun onwoŋo doŋ dobo orwatte oko i kome, kun del kome tar calo pee.