Read lango 2 Obakki 6 Bible Online

2 Obakki 6 - lango bible

2 Obakki 6

¹I kare-nono odwarpiny ame rik Erica loo te cako miyo kokogi baŋ Erica ni, “Nen ba, kan ame wan obedo iye-ni diŋ meicel, mom gire romowa.

²Wan omito ni kono owoto i kulo Jordan owoto otoŋo yen kuno, me oger kede kan ame otwero bedo iye.” Erica te gamo ni, “Ber gire.”

³Ŋat acel i akinagi te diyo Erica ni myero wot kedgi; Erica daŋ te ye.

⁴Erica te cako wot kedgi; kare ame gin otuno i Jordan, gin te cako ticgi me toŋo yen.

⁵Cite i kare ame onwoŋo dano moro acel i akinagi atoŋo yat, lee mere te poto lwiny oko i te pii. En te redo kun kobo ni, “Oi doi, adwoŋ Erica, atim aŋo ba? Onwoŋo akwao lee-nono akwaa ibaŋ ŋat ocele.”

⁶Erica te penye ni, “Opoto ka kwene?” En te nyutte kakare, Erica te toŋo yattoro bolo i pii kuno, lee te dwogo oko i wi pii malo.

⁷Te kobbe ni, “Kwany leeni.” En te cwayo ciŋe kwanyo lee mere oko.

⁸I kare moro abaka me Curia onwoŋo tye alweny i jo Icrael. En obedo penyo omiro mere, eka te moko kan a myero egur iye gonygi.

⁹Ento Erica dano Obaŋa te cwalo kop baŋ abaka me Icrael, kun kwenyoro en ni kur ewot i kabedo-nono pien jo Curia awot coko mony i komgi kuno.

¹⁰Abaka me Icrael te cwayo jo mere me wot kan ame dano Obaŋa otite-nono. Erica rik obedo konye kittono kun mie elaro kwo mere tyen apopol.

¹¹Cuny abaka me Curia te bedo waŋ atek pi koppono, omio en te lwoŋo omiro mere baŋe, te penyogi ni, “Ŋa i akinawa ame tye ka cwalo kop i kom yikwa baŋ abaka me Icrael?”

¹²Ŋat acel i akina omiro mere te gamo ni, “Ŋattoro gire pe i akinawa, adwoŋ, ento Erica adwarpiny ame tye iyi Icrael-li, en ame tito kop ducu, anaka kop ame yin ikobo iyi icika me butoni baŋ abaka me Icrael.”

¹³Abaka te gamo ni, “Wot ipeny wunu kan ame en bedo iye, me acwal dano wot make oko.” Gin te kobbe ni en bedo i Docan.

¹⁴En te cwayo lwak jo apol ata, kun owoto aguragura kede gadigadi me lweny. Gin otuno i boma-naca dyewor, ote guro oko.

¹⁵Orwo mere ibai, amiro Erica te ya malo, te donyo oko, en te neno mony a jo Curia, kun tye aguraguragi kede gadigadi lweny ame oguro boma luŋ irit. En odok cen i ot te wot kobbi Erica ni, “Oto oko adwoŋ! Gin aŋo a myero otim?”

¹⁶Erica te gamo ni, “Kur ilwor, pien jo ame tye tuŋ banwa pol katogi oko.”

¹⁷Erica te cako kwayo Rwot, kun kobo ni, “Tim ber, Ama Rwot, iyab waŋe me enen!” Rwot te gamo kwaccere, te yabo waŋ awobi Erica, en te neno lwak aguragura apipim opoŋ i wi kidi karacel kede gadigadi lweny me mac, kun oguro Erica dyere.

¹⁸Kare ame jo Curia obino me lweny i kome, Erica okwao Rwot kun kobo ni, “Tim ber imi waŋ joni coroko.” Rwot daŋ te miyo wan jo-nono coro oko kit ame Erica okwao kede.

¹⁹Erica te kobbigi ni, “Irwenyo wunu oko, man pe boma ame iyenyo wunu. Luba wunu me aterwu baŋ ŋat ame iyenyo wunu.” En te terogi naka i Camaria.

²⁰I kare ame gin otuno i Camaria, Erica te kwayo Obaŋa oyotoyot, kun kobo ni, “Ama Rwot, tim ber iyab doŋ wan jo man, me gin doŋ nen piny.” Rwot te yabo waŋgi, gin te neno piny, gin te nwoŋo ni otye doŋ i Camaria.

²¹Kare ame abaka me Icrael onenogi, en openyo Erica ni, “Adwoŋ, anekgi oko? Anekgi oko?”

²²Erica te gamo ni, “Yin kur inekgi. Itwero neko jo ame doŋ iyako oko i lweny? Yin migi ginnoro ocam, imigi daŋ ginnoro me amata, me gin dok baŋ abakagi.”

²³Mannono te miyo abaka me Icrael teddigi twon arama adwoŋ meicel; kare ame gin doŋ otyeko cam dok daŋ omatte, en ocwaogi odok cen baŋ abaka me Curia. Cakere i karenono, jo Curia te weko cobo mony i kom jo me Icrael atwal.

²⁴Ame doŋ otyeko kare alalac, Ben-adad abaka me Curia te coko monyere luŋ, te wot kedgi wot guro boma me Camaria.

²⁵Guro boma ame gin oguro-nono omio kec orido jo Camaria meicel, ame te miyo wel jami wot malo atek, kun wi kana acel kaken otwero cato cekel me ryal pyeraboro kede toke i gwata atok otwero cato cekel abic twal.

²⁶I kare ame abaka me Icrael onwoŋo tye awot, kun abeo i wi cel malo, dako moro te redo baŋe, kun kobbe ni, “Ama abaka, konya ba!”

²⁷Abaka te gamo ni, “Ka Rwot mom romo konyi, an abino nwoŋo gin a myero akonyi kede kwene? Inena atye i kal onyo koŋo olok bo?”

²⁸Abaka te dok penye ni, “Peko aŋo ame it ye k ede?” Dako-nono te gamo ni, “Dako wadwani okobba ni myero ocam atinna oko, eka ote camo mere odiko ocele.

²⁹Mannono omio an atedo woda ote camo oko, cite i kare ame akobbi dako wadwa ni miwa wode ocam, en gire te kano wode oko.”

³⁰Kare ame abaka doŋ otyeko winyo kop a dako-nono, en oyeyeco boŋŋi mere i kome kun en tye i wi cel malo, ame jo luŋ tye anene. Jo te neno boŋo me kwero cola ame onwoŋo oruko i te boŋo mere.

³¹En te redo ni, “Myero Obaŋa neka gira oko, ka ce tin piny oyuto ame mom ru oŋolo ŋut Erica wot a Capat.”

³²En te cwayo kwena me wot kelo Erica. I kare-nono onwoŋo Erica tye obedo i ode, kun odoŋe mogo ame olime daŋ tye kuno. I kare ame okwena abaka ocwalo mom ru otuno baŋgi, Erica okobbi odoŋe ni, “Anek jo ca ocwalo dano me bino neka. Ka en otuno kan, ceg wunu doggola oko atek, kur iye wunu en donyo i ot. Abaka daŋ te bino i ŋeye.”

³³I kare ame en pwod tye akop, abaka te tuno oko baŋgi, te penye ni, “Ayela man oya i baŋ Rwot! Piŋo pwod omedde kuro Rwot nakanaka?”