Read lango 2 Obakki 7 Bible Online

2 Obakki 7 - lango bible

2 Obakki 7

¹Erica te gamo ni, “Koŋ doŋ iwiny kop a Rwot, ame en okobo ni, ‘Diki i kodi caa-ni, doggola cuk me Camaria obino cato iye moko kwon apwottere cekel acel i dita acel, kede cayiri dita aryo pi cekel acel.’ ”

²Adwoŋ ame loo cirikale ame onwoŋo awot karacel abaka, te kobbi Erica ni, “Mannono gire mom romo timere, kadi bed Rwot ikome yab dirica me polo te miyo cam corre i malo bala kot.” Erica te gamo ni, “Yin ibino neno ka timere, cite mom ibino bilo en cammono.”

³I kare-nono onwoŋo jo aŋwen ame two too me dobo tye obedo i doggola me boma oko; gin te bedo penyere kengi kengi ni, “Piŋo kara wan omedde bedo kan tuno naka waŋ ame wan oto?

⁴Pien kadi kono okob ni odonyo i boma, kec daŋ tye kuno, obino daŋ to oko; ka omedde bedo kan daŋ oto oko. Doŋ pi mannono, wan myero owot wunu i gony a jo Curia; ka gin mom bino nekowa, wan obino kwo, aco ka gin onekowa, kopporo pe.”

⁵Gin te cako ya me wot i gony a jo Curia otyeno ka aŋa abeo-nu, cite i kare ame gin otuno kuno, mom ote nwoŋo ŋattoro.

⁶Pien Rwot onwoŋo omio jo Curia owinyo dwon ginnoro ame ŋur calo gadigadi me lweny apipim, kede me aguragura daŋ apipim, kede dok me a lwak mony adwoŋ atata, omio gin te bedo kop kengi kengi ni, “Abaka me Icrael doŋ owilo mony a jo Kitti kede me a jo Miciri me bino lweny i komwa.”

⁷Mannono omio jo Curia otwarre i ŋwec otyeno ka ŋa abeo-nu, pi laro kwogi, kun oweko kemagi, aguraguragi kede kanegi, dok oweko gonygi ata.

⁸Kare ame odobo aŋwennono otuno i ŋet gony, gin odonyo i kema acel, ote camo cem iye, ote daŋ matte eka te jobo ryal kede jabu kede boŋŋi mogo, ote wot kano oko teŋe; ote dok dwogo donyo i kema okene, ote daŋ tino jami a tye iye wot kano oko.

⁹Kare ame gin openyere kengi kengi, gin okobo ni, “Gin ame otimo-ni mom ber, wan doŋ otyeko roto amut aber, pe ber wan me liŋ i kop man tuno naka odiko kun mom ru otito koppere, ka man otimere, obino keto can i komwa. Myero wan oya aman owoto oko, owot otit kop man baŋ jo ame tye i paco abaka.”

¹⁰Gin te ya oko i gony a jo Curia, ote wot i bomagi ote wot lwoŋo odoŋe ame kuro dogcel, ote kobbigi ni, “Wan owoto i gony a jo Curia, mom oneno ŋattoro kuno, mom daŋ owinyo dwon dano moro; onwoŋo aguragura kede kane tye apipim ame otweo oko, kema daŋ oweko ata kun mom okwanyo ginnoro iye.”

¹¹Ogwok dogcel te redo atek kun okobo koppono, omio ote tito koppere baŋ jo ame tye i paco abaka.

¹²Abaka te ya malo oko dyeworrono, te kobbi omiro mere ni, “Wek akobbiwu kite ame jo Curia oyikere me lweny kede i komwa. Gin ŋeo aber ni kec oridowa meicel, man omio gin oweko gonygi, ote wot pono gigi teŋe i dye bar. Gin tye atamo ni wan oya oko i boma, gin ote bino makowa akwo, ote mayo bomawa oko.”

¹³Amiro moro acel te kobbe ni, “Koŋ icwal jo mogo kede aguragura abic ame odoŋ me wek gin wot nen gin ame otimere-nono; pien jowa ame tye kan-ni doŋ otye ame calli jo ame oto oko, orom aroma i lwak jo Icrael apol atata ame doŋ oto; doŋ pi mannono jowa koŋ wot nen.”

¹⁴Gin te yero jo mogo, abaka te cwalogi wot kun owoto i gadigadi aryo, ame ocikogi me wot neno gin ame otimere i gony a jo Curia.

¹⁵Jo-nono te wot naka i Jordan, ento gin onwoŋo lwak jami apipim ame jo Curia obobolo i yo, pi laro kwogi; gin oboloboŋŋi karacel kede jami ote riŋo gigi oko. Gin odwogo baŋ abaka ote bino titte.

¹⁶Jo te ciro wot i gony a jo Curia, ote wot yako jami iye. Kite ame en Rwot rik onwoŋo okobo kede, moko kwon apwottere poŋ dita acel ote cako cato pi cekel acel kede cayiri poŋ dita aryo ote daŋ cako cato pi cekel acel.

¹⁷I kare-nono onwoŋo abaka me Icrael oketo adwoŋ ame loo ocirikale ame woto karacel kede me gwoko dogcel me boma. Jo rik te nyonyono en i tyengi i dogcel, naka en oto, kite ame Erica dano Obaŋa rik okobo kede baŋ abaka.

¹⁸Pien Erica dano Obaŋa rik okobo baŋ abaka ni, “Dita aryo me cayiri obino wilo cekel acel kede dita acel me moko kwon apwottere obino wilo daŋ cekel acel, diki i kodi caa-ni i dogcel a jo Camaria”,

¹⁹adwoŋ cirikale rik te gamo dog Erica dano Obaŋa ni, “Mannono gire mom romo timere kadi bed Rwot ikome yab waŋ dirica me polo te miyo cam corre i malo bala kot.” Ento Erica rik te gamo ni, “Yin ibino neno anena, cite mom ibino bilo cammono.”

²⁰Mannono en gin ame otimere ikokome, jo onyonyono en i tyengi i dogcel, en te to oko.