Read lango 2 Obakki 8 Bible Online

2 Obakki 8 - lango bible

2 Obakki 8

¹I kare-nono Erica onwoŋo okobo baŋ dako ame rik ecero wode ni myero en ya oko i paco karacel kede jo me ode wot bed kan ocele, pien Rwot bi no miyo kec poto i lobo-nono, ame te ri pi mwakki abiro twal.

²Dako-nono te winyo kop ame Erica dano Obaŋa onwoŋo okobbe, te ya karacel i jo me ode wot bedo i lobo a jo Piriciti pi mwakki abiro.

³Kare ame mwaka abiro doŋ otum oko, dako-nono te dwogo cen i lobo a jo Icrael, en te wot atir naka baŋ abaka me wot kwaye ni myero mie ode karacel kede lobo mere.

⁴En otuno onwoŋo abaka tye akop gin kede Gekaji ame obedo amiro Erica dano Obaŋa, kun abaka penye ni, “Koŋ ititta taŋo adoŋodoŋo luŋ ame Erica doŋ otyeko timo.”

⁵I kare ame Gekaji tye akobbi abaka kite ame Erica rik ocero kede dano oto, dako-nu te tuno oko i nyim abaka, kun nyuto koko mere pi ode kede lobo mere. Gekaji te kobbi abaka ni, “Adwoŋŋa, man en dako karacel kede wode ame Erica rik ocero.”

⁶Kare ame abaka openyo dako-nono, en omoko gin ame Gekaji obedo titte, omio abaka te lwoŋo dano acel i akina odoŋe mere, te kobbe ni, “Wot idwok jami a dako-nu luŋ baŋe, kun icule pi cam ame obedo cek i poto mere luŋ karacel kede cam ame aman tye ame oya i potti mere, cakere i kare ame en oya kede i lobo mere tuno naka tin.”

⁷Erica rik te wot i Damaciko kare ame Ben-adad, abaka me Curia onwoŋo two. Kare ame okobbi abaka ni Erica dano Obaŋa onwoŋo tye kuno,

⁸abaka te kobbi Kajael ni, “Kwany mottoro iwot kede, me iwot ijol kede Erica dano Obaŋa, ikwae me en peny Rwot ka ce abino caŋ i two man.”

⁹Mannono te miyo Kajael cako wottere me wot jolo Erica, en otero kit mot apapat kede jami ocele abeco ame maro nen i Damaciko, kun inaga pyeraŋwen en ame oyeo yeccono. I kare ame Kajael orwatte gin Erica, okobo ni, “Amironi Ben-adad ame obedo abaka me Curia ocwala baŋi ni myero abin apenyi ka ce ebino caŋ i two mere.”

¹⁰Erica te gamo ni, “Rwot otyeko nyutta ni en gire bino to oko, ento yin myero iwot ikobbe ni ebino caŋ.”

¹¹Erica te neno Kajael atek meicel, tuno waŋ ame lewic omako Kajael oko. Oyotoyot Erica dano Obaŋa te cako kok oko.

¹²Kajael te penyo ni, “Adwoŋŋa kara dok ikok piŋo?” Erica te gamo ni, “Pien aŋeo kite ame ibino wuno kede jo Icrael; ibino waŋo celgi ame ogero atek oko kede mac, ibino neko awobe atino oko luŋ i pala me romo, kun irweo itino luŋ ame okere, dok daŋ ibino ryeko yi mongi ame yac oko.”

¹³Kajael te gamo ni, “An amironi ame arom aroma i gwok ata-ni, atwero timo tim adwoŋ rom mannono i yore aŋo?” Erica te gamo ni, “Rwot otyeko nyutta ni yin en ame ibino bedo abaka me Curia.”

¹⁴En te ya oko ibaŋ Erica te dok cen baŋ abaka Ben-adad, abaka te penye ni, “Erica okobbi kop aŋo?” En te gamo ni, “En okobba ni yin ibino caŋ gire.”

¹⁵Orwo mere ocele Kajael te kwanyo olangit, te luto i pii te buro wi abaka tuno ka oto. En te leyo kakare acalo abaka me Curia.

¹⁶I mwaka me abic me loc a Joram wot Akab acalo abaka me Icrael, en ame Jekoram wot a Yekocafati abaka me Juda ocako iye loc,

¹⁷kun mwaka me dittere doŋ oromo pyeradek wie aryo; en te bedo loc i Jerucalem pi mwakki aboro.

¹⁸Dako mere rik obedo nyaka Akab, mannono omio en te bedo timo giname nen arac i nyim Rwot kite ame obakki me Icrael obedo timo, kun lubo gin ame jo me ot Akab obedo timo.

¹⁹Ento Rwot mom te mito tyeko jo Juda ducu, pi cikere ame en rik ocikere kede baŋ amiro mere Daudi ni ebino miyo ikwae en ame bedo i kom me loc nakanaka.

²⁰I kare me loc a Jekoram en ame jo Edom ojem kede i kom loc me Juda, eka ote keto abakagi kengi.

²¹Mannono rik te miyo Jekoram ya wot i Jair, kun woto karacel kede gadigadi lwennyere luŋ, eka mony a jo Edom te wot gure iye dyere. Dyewor, en karacel kede odoŋe ame onwoŋo loo gadigadi me lwennyere te lweny i kom jo Edom ote nwoŋo gigi yo me put riŋo oko, ento dano acel te riŋo dok i paco mere.

²²Cakere i kare-nono tuno kede tin jo Edom doŋ te bedo loye kengi kun ojem ajema i loc i Juda. I kare acellono, en ame boma me Libna daŋ ojem kede iye.

²³Kop ocele luŋ ame odoŋŋere i kom Jekoram kede gin ame en otio a mom ocoo kan, otyeko coyo luŋ i buk me Tekwaro ame tito kop i kom oloc me Juda.

²⁴Jekoram oto te wot weo karacel i kwari mere, ote yiko kome karacel i kwari mere i paco a Daudi. Wode Akajia en ame te leyo kakare acalo abaka.

²⁵I mwaka me apar wie aryo me loc a Joram wot Akab, abaka me Icrael, en ame Akajia wot a Jekoram odoko kede abaka me Juda,

²⁶kun mwaka me dittere doŋ oromo pyeraryo wie aryo; en te bedo loc i Jerucalem pi mwaka acel. Nyiŋ tottere rik onwoŋo Atalia, ame rik obedo akwar Omri abaka me Icrael.

²⁷Kit acalo wat rik onwoŋo tye i akina Akajia kede abaka Akab, omio en daŋ obalo baŋ Rwot kun lubo kite a jo me ot Akab.

²⁸Abaka Akajia rik te wot gin kede Joram abaka me Icrael me wot lweny i kom Kajael abaka me Curia. Monygi rik te rwatte i Ramot-gilead, kan ame jo Curia te waŋo iye Joram.

²⁹Joram te dwogo cen i boma me Jejreel me wot twoye kuno, Akajia wot a Jekoram abaka me Juda rik te wot limo Joram wot Akab i Jejreel.