Read lango 1 Tekwaro 10 Bible Online

1 Tekwaro 10 - lango bible

1 Tekwaro 10

¹I kare-nono jo Piriciti te lweny i kom jo Icrael; jo Icrael rik te mukere i ŋwec oko i nyim jo Piriciti, kun kom jo ame oneko oradde atata i kidi me Gilboa.

²Jo Piriciti te ryemo yo Caulo kede awobe mere, ote neko Yonacan kede Abinadab, kede Malkicua, ame gin obedo awo be a Caulo.

³Lweny anwoŋo odio Caulo atek meicel, wegi atero mogo rik te nwoŋe, gin te cele wawano en atek meicel kede atero.

⁴Caulo te kobbi atin jami lwennyere ni, “Wot pala romoni ituca kede pelo, me jo a mom oliro-ni kur bin coba, ote loka doko gi-anywaragi.” Cite atin jami lwenyere mom te ye, pien onwoŋo tye kede lworo. Mannono te miyo Caulo kwanyo pala lwennyere, te rette iye en kene.

⁵Kare ame atin jami lwennyere oneno ni Caulo doŋ oto oko, en daŋ te rette i kom pala lwennyere, te to oko karacel kede.

⁶Mannono en kite ame Caulo oto kede karacel kede awobe mere adek, jo me ode oto karacel.

⁷I kare ame jo Icrael a rik tye i luŋ tuŋ ca oneno ni monygi orino oko, dok Caulo kede awobe mere daŋ oto oko, gin oya i bomagi luŋ ote riŋo oko, Jo Piriciti te bino bedo iye.

⁸Orwo mere ocele, i kare ame jo Piriciti obino me gonyo ruk a jo ame oneko, gin onwoŋo Caulo kede awobe mere adek oto i kidi me Gilboa.

⁹Gin te toŋo wi Caulo oko, ote gonyo daŋ jami lwenyere oko ote cwayo okwena rabo koppere baŋ jogi luŋ karacel kede baŋ jo luŋ ame tye i lobo me Piriciti.

¹⁰Gin te keto jami lwennyere i ot jok Aciterot, gin te guro wi Caulo i ot woro jokgi ame olwoŋo ni Dagon.

¹¹Ento i kare ame jo me Jabec-Gilead owinyo gin ame jo Piriciti otimo i kom Caulo,

¹²jo luŋ ame tek i lweny, oya ote wot dyeworrono benebene, ate kwanyo kom Caulo kede kom awobe mere oko ote tero i Jabec. Gin te yiko cogo komgi i te yat i Jabec, eka ote kanyo kec pi nino abiro.

¹³Caulo oto pien okwero bedo nat ame genne en onwoŋo mom geno Rwot, dok en otemo wot baŋ okor tipo a jo oto me wot penyo tamgi,

¹⁴kun mom geno Rwot me tele, Mannono omio Rwot oneke oko te miyo loccere i cin Daudi wot a Yece.