Read lango 1 Tekwaro 13 Bible Online

1 Tekwaro 13 - lango bible

1 Tekwaro 13

¹Daudi te yiko kop kede odoŋe ame telo wi mony, odoŋe ame loo jo tutumia kede odoŋe ame loo jomia.

²En te kobbi lwak jo Icrael ducu ni, “Ka ce wun iye wunu, dok daŋ Rwot Obaŋawa oye, myero wan ocwal kwena baŋ omegowa ame tye i lo bo me Icrael luŋ, karacel kede baŋ olamdog kede jo Levi ame bedo i boma a rik omiogi kede bargi me kwat me gin obin ocokere banwa kan,

³me wek owot okel canduk Obaŋa ame rik obin oweko oko tene i kare ame Caulo tye i loc.”

⁴Jo luŋ te ye tammere-nono pien onwoŋo ber.

⁵Daudi rik te coko jo Icrael ducu karacel cakere i wan apoki me Miciri i Cikor tuno kede naka i yo ame woto i Kamat. En ocoko joni ducu karacel pi wot kelo canduk Obaŋawa, i Kiriat-jearim.

⁶Daudi karacel kede jo Icrael luŋ te wot i boma me Baala, ame daŋ olwoŋo ni Kiriat-jearim, ame tye i Juda me wot omo canduk Obaŋa ame olwoŋo i nyiŋ Rwot ame bedo malo i wi okerubi.

⁷Gin te cibo canduk Obaŋa i gadigadi anyen, kun okwanyo i ot Abinadab, ame onwoŋo tye i wi tur malo, Uja kede Akuc te bedo kolo twoni ame awayo,

⁸Daudi karacel kede jo Icrael te bedo tuko atek meicel i nyim Rwot, kun owero, ogoo opuk, naŋa, ajaa, mola me agoa kede apel.

⁹Kare ame gin otuno i ŋet laro a Kidon, Uja oryeo ciŋe i kom canduk Obaŋa, eka te kwako kede ciŋe, pien twoni onwoŋo ogate.

¹⁰Akemo te mako Rwot i kom Uja te neke oko kuno, pien oryeo ciŋe i kom canduk Obaŋa; en te to oko i ŋet canduk Obaŋa.

¹¹Cuny Daudi te wan, pien Rwot oneko Uja akemo; mannono te miyo lwoŋo nyiŋ kabedo-nono ni Perec-uja, tuno naka atot tin.

¹²I nino-nono lworo omako Daudi atek i kom Rwot. Omio en te kobo ni, “Kara canduk a Rwot bino bedo baŋa i yore ano ba?”

¹³Omio Daudi obedo kede lworo me tero canduk a Rwot i paco mere; eka te lunyo tero tene i ot Obededom me Gat.

¹⁴Canduk Obaŋa te ri i ot Obed-edom pi dwete adek; Rwot te miyo winyo i kom Obed-edom karacel kede jo luŋ me ode.