Read lango 1 Tekwaro 14 Bible Online

1 Tekwaro 14 - lango bible

1 Tekwaro 14

¹I Kiram abaka me Turo te cwayo kwena baŋ Daudi, kun miogi otero bao yat cedar kede opac kede opaa kidi me gedo, gin te geri Daudi ot.

²Daudi te niaŋ ni Rwot doŋ otyeko moke me bedo abaka me Icrael, dok daŋ ni doŋ omio loccere obedo malo meicel pi jo mere Icrael.

³Daudi rik dok te medde nyomo mon ocele i Jerucalem; te daŋ mede nywalo awobe kede anyira,

⁴Nyiŋ itino ame en onywalo i Jerucalem ene: Cammua, Cobab, Nacan, Culeman,

⁵Ibkar, Elicua, Elipelet,

⁶Noga, Nepeg, Japia,

⁷Elicama, Beliada, kede Elipelet.

⁸I kare ame jo Piriciti owinyo ni otyeko wiro Daudi kede moo me bedo abaka me Icrael, gin luŋ te ciro wot malo kuno me wot yenyo Daudi; cite Daudi rik te winyo oko, te wot me wot lweny i komgi.

⁹Onwoŋo jo Piriciti obino omao luŋ me Repaim oko,

¹⁰Daudi te penyo Rwot ni, “Awot alweny i kom jo Piriciti? Ibino miyogi i ciŋi.” Rwot te kobbi Daudi ni, “Woti; pien an abino miyo gire jo Piriciti i cini.”

¹¹Daudi te wot i Baal-perajim, te daŋ wot loyogi oko kuno, Daudi te kobo ni, “Rwot doŋ oemo dye okworra i nyima, kite ame pii mol yeco kede yore.” Omio ote cako nyiŋ nyiŋ kabedo-nono ni Baal-perajim.

¹²Jo Piriciti rik te weko cal jogigi kuno, Daudi te ciko ni myero warjgi oko.

¹³Jo Piriciti dok te dwogo tyen me aryo mere, ote dok bino mayo luŋ me Repaim oko,

¹⁴Kare ame Daudi doŋ openyo Rwot, Rwot okobbe ni, “Kur iwot malo kuno, yin man amana, iwot i negi, me ilokere wunu i komgi awulo kan ame abata pol iye.

¹⁵Ka ibino winyo tyen jo awot am or awinyere malo i wi abata, myero iyutte wunu, pien Rwot nwoŋo doŋ otelo nyimi oko me wot neneko mony a jo Piriciti oko,”

¹⁶Daudi te timo kite ame Rwot ocike kede, te neko jo Piriciti, cakere i Gibeon tuno kede naka i Gejer,

¹⁷Nyiŋ Daudi te rwo romo lobo ducu, Rwot te miyo lworo ma ko rok luŋ i kom Daudi.