Read lango 1 Tekwaro 15 Bible Online

1 Tekwaro 15 - lango bible

1 Tekwaro 15

¹Daudi ogero udi mere i paco mere. En te gero daŋ ot ocele me keto canduk Obaŋa te cako guro kema kuno pire.

²Daudi dok te kobo ni, “Jo me Levi keken en ame bino tiŋo canduk Obaŋa, pien Rwot en oyerogi pi tino candukkere kede pi tic bane atwal.”

³Daudi te coko jo luŋ i Jerucalem, me kela canduk a Rwot i kabedo mere ame doŋ etyeko yiko,

⁴Daudi te coko daŋ ikwae Aron karacel kede jo Levi,

⁵Eka i kom jo me doggola a Kokat, Uriel te telo jo ame romo mia acel i pyeraryo,

⁶kom jo me doggola a Merari, Acaya te telo jo ame romo mia aryo i pyeraryo.

⁷I kom jo me doggola a Gercom, Joel te telo jo ame romo mia acel i pyeradek.

⁸I kom jo me doggola Elijapan, Cemaya te telo jo ame romo mia aryo,

⁹I kom jo me doggola a Kebron, Eliel te telo jo ame romo mia aboro,

¹⁰I kom jo me doggola a Ujiel, Aminadab te telo telo jo ame romo mia acel apar wie aryo.

¹¹Daudi te lwoŋo Jadok kede Abiatar ame gin olamdog, kede jo magi ame gin obedo jo me Levi: Uriel, Acaya, Joel, Cemaya, Eliel, kede Aminadab.

¹²En te kobbigi ni, “Wun ibedo wunu odoŋe atekere me doggola a kwariwu iyi atekere a jo Levi, Wun myero ilonyere wunu kenwu ibed wunu acil. Wun karacel kede omegowu, me wek ikel wunu canduk me cik a Rwot Obaŋa me Icrael i kabedo ame doŋ atyeko yiko pire.

¹³I kare me agege ca, Rwot Obaŋawa rik obin otugere i komwa, pien wun onwoŋo ipe wunu i akinawa me tiŋo candukkere kite ame onwoŋo an amito.”

¹⁴Mannono te miyo olamdog kede jo Levi lonyere kengi pi kela canduk a Rwot Obaŋa me Icrael.

¹⁵Jo Levi te cako tiŋo canduk Obaŋa, kun odyelo i bollere i wi gwokgi, kite ame rik Rwot ociko kede baŋ Muca.

¹⁶Daudi te ci ko odoŋ atekere me doggola a jo Levi me poko tic me wer apapat baŋ omegogi mogo me wek gin wer werrogo me yomcuny kun ogoo naŋa kede opuk, kede mola agoa.

¹⁷Mannono te miyo jo Levi yero Keman wot a Joel; kede ominnere Acap wot a Berekia; kede omegogi. I kom jo me doggola a Merari ote yero jo magi, Etam wot a Kucaya.

¹⁸Ote dok yero jo magi i akina omegogi me konyogi wek gin obed jo me wer i dul me aryo: Jekaria, Jajiel, Cemiramot, Jekiel, Uni, Eliab, Benaya, Maceya, Matitia, Elipeleku kede Mikineya, karacel kede ogwok doggola, Obed-edom kede Jeyel.

¹⁹Ower magi te bedo jo ame go tum ame otio kede mola, Keman, Acap kede Etan;

²⁰Jekaria, Ajiel, Cemiramot, Jekiel, Uni, Eliab, Maceya kede Benaya; joni rik obedo ogo naŋa kun olubo kite me goc Alamot.

²¹Ento Matitia, Elipeleku, Mikneya, Obed-edom Jeyel kede Ajajia te bedo jo ame telo wer kun ogo nana opuk i kite me goc a Ceminit.

²²Rik ote yero Kenania me bedo atel wer a jo Levi, pien en rik obedo dano me adiro meicel i wer.

²³Berekia kede Elkana rik ote miyo tic me gwoko doggola me canduk Obaŋa.

²⁴Eka olamdog magi ote yero me bedo okut apel i nyim canduk Obaŋa, Cebania, Jocapat, Netanel, Amacai, Jekaria, Benaya kede Eleajar; joni luŋ rik obedo olamdog, Eka Obed-edom kede Jekia te daŋ bedo ogwok doggola me canduk a Rwot.

²⁵Mannono te miyo Daudi kede odoŋe me Icrael kede otel wi mony ame lo jo tutumia te cako wot me wot omo canduk me cikere a Rwot i ot Obed-edom kun cunygi yom atek.

²⁶Gin te yalo Rwot i twoni abiro kede nyogi rommi daŋ abiro, pien Rwot Obaŋa onwoŋo tye ka konyo jo Levi ame onwoŋo tye atino canduk cikere a Rwot.

²⁷Daudi onwoŋo oruko boŋo camanini ame otio aber meicel, kite ame onwoŋo jo Levi ame otiŋo canduk karacel kede ame awer orukere kede, kede atelgi Kennaa, Daudi onwoŋo daŋ otweo pyere kede epod me camanini,

²⁸Mannono en kite ame Daudi karacel kede jo luŋ me Icrael otero kede canduk cikere a Rwot, kun owo i yomcuny okuto tuŋ rommi kede apel, ogoo daŋ mola agoa, dok owero i dwoŋ aloŋo i nana, kede opuk.

²⁹I kare ame canduk a Rwot otuno i paco a Daudi Mikal nyaka a Caulo oroo wane i dirica, te neno Daudi tye kirre i myel i nyim Rwot i yomcuny; en te caye i cunye.