Read lango 1 Tekwaro 16 Bible Online

1 Tekwaro 16 - lango bible

1 Tekwaro 16

¹Gin te cwayo canduk a Rwot i ot, ote ke to kakare iyi kema ame onwoŋo Daudi rik oguro pire, Daudi te yalo Rwot kede mot awaŋa, kede mot me kweyo cuny i nyim Rwot kuno.

²I kare ame Daudi doŋ otyeko yalo Rwot i mot awaŋa kede mot me kweyo cuny, en olamo winyo i kom lwak i nyim Rwot me mony.

³En te poko baŋ ŋat acel acel ogati acel, kede dul riŋo aduno, kede anina olok otwo acel; en opoko baŋ co kede mon me Icrael luŋ.

⁴Daudi rik te keto jo Levi mogo me bedo otel woro a Rwot Obaŋa me Icrael i nyim canduk cikere Obaŋa kun owero wer me pwoye kede pake.

⁵Oketo Acap me bedo adwoŋ ame loogi kun Jekaria lube. Ogo nana kede nana opuk te bedo Jeyel, Cemiramot, Jekiel, Matitia, Eliab, Benaya, Obededom kede Jeyel. Acap te bedo ago tum,

⁶eka olamdog aryo te bedo okut apel kun okuto tere i te re i nyim canduk cikere Obaŋa, Benaya kede Jakajiel.

⁷Man en nino me agege me Daudi ogeo miyo kede tic me wero wer pwoyo Obaŋa baŋ Acap kede owote mere ame obedo jo Levi.

⁸Pwo wunu Rwot, irab wunu nyiŋe; titti wunu rok ducu tic ame en otio!

⁹Wer wunu wer me pako Rwot, itit wunu tic me aura ame en otio!

¹⁰Ket wunu kwogo i kom nyiŋe acil; jo ame woro Rwot myero be i yomcuny!

¹¹Yeny wunu kony i baŋ Rwot, wore wunu nakanaka.

¹²Po wunu i kom tic me aura luŋ ame en otio, i kom tic me tano kede kop ame en onolo.

¹³Wun ikwae Iburaim, ame ibedo wunu omiro mere, wun ikwae a Yakobo, ame en oyerowu,

¹⁴Rwot en Obaŋawa; gin a en ociko tye pi lobo luŋ,

¹⁵Wie mom wil kadi acel i kom cikere mere, i kom kop ame en ociko i kom jo tutumia i tutumia me kare luŋ.

¹⁶I kom cikere mere ame en ocikere kede Ibraim, i kom kop ame en ociko baŋ Icaka.

¹⁷En rik omoko odoko ocik baŋ Yako bo, cikere ame bino ri nakanaka,

¹⁸En okobo ni, “Abino miyo lo bo me Kanaan banwu, obed megwu ame ileo wunu.”

¹⁹I kare ame rik welgi pwod nok, kun gin pwod orok ame bedo lobo Kanaan,

²⁰ame gin pwod oloŋ-piny i lobo apapat, kun oya i loc man okobere i en ocele.

²¹Obaŋa rik mom oye rokkoro owunogi; ogwokogi kun juko obakki ocele ni,

²²“Kur itim wunu ginnoro i kom jona ame ayero, kur igud wunu odwarpinnya.”

²³Wer wunu baŋ Rwot, wun jo me lobo ducu, rab wunu nino ducu ni en olarowu.

²⁴Rab wunu pi kwogo mere baŋ rok ducu, kede tic ame en otio me aura baŋ jo luŋ,

²⁵Rwot dwon meicel, myero pake meicel, myero Iwore akato obane ocele luŋ,

²⁶Pien obaŋe a rok ocele obedo cal apaa keken, ento Rwot oketo polo.

²⁷Kwogo kede twer luŋ tye bane, teko kede lelo tye kan ame en bedo iye.

²⁸Pak wunu Rwot, wun rok ducu ame tye i lobo, pak wunu kwogo mere kede teko mere,

²⁹Pak wunu nyiŋ Rwot ame obedo me kwogo; kel wunu motwu bane i ot me wore. Wor wunu Rwot i bono acil;

³⁰komwu myero myel i nyime, wun jo me lobo ducu, lobo gire oketo ocuŋ atek odoco, mom dok romo yenere kadi acel.

³¹Lel wunu, wun polo kede lobo; titti wunu rok ducu ni Rwot en abaka.

³²Mor ba, yin nam kede jami luŋ ame tye iyi, yin poto daŋ lel ba kede jami luŋ ame tye iyi,

³³Yen ame tye i buŋ luŋ bino wer i yomcuny, i nyim Rwot i kare ame en abino me ŋolo kop i lobo.

³⁴Pwo wunu Rwot, pien en ber; marrere a mom lokere perakino atwal.

³⁵Kobbe wunu ni, “Larwa ba, Ama Obaŋawa ame larowa, cokwa karacel me ilarwa i baŋ orok, me wek omi pwoc baŋi, ote pako nyini acil.

³⁶Pak wunu Rwot Obaŋa me Icrael! pake wunu waŋ i waŋ!” Iwak luŋ te gamo ni, “Amen,” ote pako Rwot.

³⁷Daudi rik te miyo Acap karacel kede owote mere ame gin jo Levi me bedo jo ame tio tic i nyim canduk me cikere a Rwot nino ducu i kabedo ame rik oketo iye canduk cikere a Rwot.

³⁸Obed-edom wot a Jedutun kede owote mere pyeraabicel wie aboro ame gin luŋ obedo jo me doggola mere me bedo jo ame konyogi, kun Obed-edom kede Koca obedo jo ame gwoko doggola.

³⁹Jadok alamdog karacel kede owote mere ame daŋ obedo olamdog te bedo otel woro i kema a Rwot ame onwoŋo tye malo i wi kidi i Gibeon,

⁴⁰gin onwoŋo omio mot awaŋa me yalo Rwot i wi keno lam nino ducu odiko kede otyeno, kun olubo cik ducu ame ocoo i buk me cik a Rwot ame rik ociko baŋ jo Icrael.

⁴¹Jo ocele ame onwoŋo tye kuno daŋ obedo Keman kede Jedutun kede owotegi ame rik oyerogi kun tuco nyingi pi miyo pwoc baŋ Obaŋa; pien marrere a mom lokere perakino nakanaka.

⁴²Keman kede Jedutun onwoŋo daŋ lo tic me kuto apel kede me goyo wer kun goo i mola agoa apapat, i wer acil. Jo me doggola a Jedutun rik obedo jo ame gwoko doggola ke ma.

⁴³Lwak luŋ doŋ te ket dok paco, kun ŋat acel acel dok tune, Daudi daŋ te dok tuŋe me wot la mo winyo i kom jo me ode.