Read lango 1 Tekwaro 17 Bible Online

1 Tekwaro 17 - lango bible

1 Tekwaro 17

¹I kare ame onwoŋo Daudi doŋ bedo i ode, en okobo baŋ adwarpiny Natan ni, “Nen ba, an at ye abedo i ot ame ogero i bao cedar, cite canduk a Rwot tye bedo i kema.”

²Natan te kobbi Daudi ni, “Wot iti giri ginnoro luŋ ame tye i cunyi, pien Rwot gire tye kedi.”

³Cite dyeworrono ikokome, kop a Rwot te bino baŋ Natan kun kobbe ni,

⁴“Wot ikobbi amirona Daudi ni, ‘Rwot okobo ni, Mom yin en ibino gero ot me bedona.

⁵Cakere i kare ame akwanyo jo me Icrael i lobo Miciri tuno naka tin, an mom ru abedo gira i ottoro; abedo kobbere gira akola kun abedo i kema,

⁶I kabedo luŋ ame abedo wot iye i jona Icrael, mom gira apeny atelloro ame onwoŋo aketo me telogi ni kono ogera ot me bao cedar.’

⁷“Aman doŋ yin myero ikoba amirona Daudi ni, Rwot me mony okobo ni, ‘Rik an akwanyi i elet kun yin akwa rommi, me idok aloc a jona Icrael.

⁸Abedo bedo kedi ikabedo luŋ ame ibedo wowota iye, atyeko okworri-gu luŋ i nyimi; dok daŋ abino miyo nyini rwo meicel, ame rom aroma i nyiŋ jo adito me lobo.

⁹Abino yero kabedo a jona Icrael, ate miyogi bedo kuno kun mom dok oyelogi; jo moro areco daŋ mom dok bi no bedo wunogi bala kite a yam con.

¹⁰Cakere i kare ame aketo oŋolkop me loyo jona Icrael, jo a kitegi reco obedo wunogi nakanaka, cite man mom dok bino timere i komgi; abino miyogi doŋ owe oko i kom okworgi luŋ. Medo i mannono, Rwot dok okobo ni ebino miyo ikwai bedo adwoŋ meicel.

¹¹Ka kare me bedo ni i lobo doŋ otum, yin ibino nywako kabedo karacel kede kwarini, an dok abino miyo wodi moro ame yin inywalo ya, te lubi, an abino moko loccere.

¹²En wodi-nono bino gero ot pi nyina, abino moko loccere bedo atwal.

¹³An abino bedo pappere kun en bedo woda, Cite mom abino kwanyo mara a mom lokere i kome, kite ame rik akwanyo kede i kom Caulo, ame ami ileo kakare.

¹⁴Odi kede locci bino cuŋ atek i nyima i kare luŋ; locci bino moko atwal.’ ”

¹⁵Natan te kobo kop magi luŋ baŋ Daudi kede ginnoro luŋ ame onyuto bane.

¹⁶Daudi doŋ te wot bedo i nyim Rwot, te kobo ni, “An kara abedo ŋa ba, Ama Rwot Obaŋa, jo me oda obedo ŋo, ame omio yin itiŋa malo kit man-ni?

¹⁷Aco kadi bed amannono, man kom pwod ginnoro atitidi moro bani, Ama Rwot Obaŋa; nen yin doŋ ityeko ko bo kop i kom jo me ot amironi, jo me kare a pwod lac ata ame tye i nyim, inyuta-gu lwagi jona ame tye i nyim, Ama Rwot Obaŋa.

¹⁸Kara ŋo ame dok atwero kobo bani ba! Pien yin giri ineo amironi, Ama Rwot Obaŋa!

¹⁹Pien pi gin ame yin giri ici ko, ame lubere kede gin ame oya i cunyi keni, omio yin itimo twoni jami magi adoŋo doŋo, me amironi ŋe.

²⁰Pi mannono ba, yin giri idwon meicel. Ama Rwot Obaŋa; pien mom dok tye ŋattoro ocele a cal kedi, dok mom daŋ tye Obaŋa moro ocele kono yin daŋ keken, ka oporo kede gin ame wan owinyo kede yitwa.

²¹Kara rokkene ame dok tye i wi lobo ame calo joni Icrael, ame yin Obaŋa iwoto bangi me wot lakorogi, me gin bed joni? Yin giri imio nyirji orwo atek, itio twoni jami mogo adono dono dok ame iyiliyili meicel pirgi, kun iryemo rok ocele oko i nyim joni ame rik i lakaro i Miciri.

²²Yin giri pi mitti keni Ama Rwot, imoko joni Icrael me bedo joni atwal; eka yin ite doko Obaŋagi.

²³“Doŋ ba, Ama Rwot Obaŋa, aman doŋ yin myero imok atwal kop ame ikobo i kom omironi kede i kom jo me ode, eka ite timo kite ame ikobo-nono.

²⁴Jo gire bino mede dworo nyini nakanaka kun okobo ni, ‘Rwot me mony en Obaŋa me Icrael.’ Ot amironi Daudi bino moko gire i nyimi pi kare luŋ.

²⁵Dok daŋ yin giri doŋ inyutta an amironi kop man oko, kun ikobo ni, ‘Abino gero ot piri’; omio an amironi anwoŋo tek cuny me keto kwac man i nyimi.

²⁶Doŋ aman ba, Ama Rwot, yin giri ibedo Obaŋa dok daŋ kop ame ikobo bedo ateni, yin doŋ iciko pi gin aber-ri baŋ amironi.

²⁷Aman doŋ tim ber, Ama Rwot, imi gum i ot amironi Daudi me medde bedo atwal i nyimi. Pien yin giri doŋ ikobo oko, gum ame yin imio, bino miyo gum bedo i ot amironi Daudi nakanaka.”