Read lango 1 Tekwaro 18 Bible Online

1 Tekwaro 18 - lango bible

1 Tekwaro 18

¹Ame man doŋ otum oko, Daudi oloo jo Piriciti i lweny, te miyo twergi gik oko i lobo-nono. En te mayo daŋ Gat kede pacci ame tye i ŋele I ciŋ jo Piriciti.

²Daudi dok te loyo jo Moab i lweny, gin doŋ te cako bedo i te loccere kun daŋ oculo ocoro baŋe.

³Daudi dok te loyo abaka me Coba, ame nyiŋe Adadejer, ame tye i yo tutuŋ Kamat, i kare ame en owoto cibo kidi me po pire i ŋet kulo me Eufrate.

⁴Daudi te mayo i bane gadigadi lweny tutumia acel kede wegi aguragura tutumia abiro, kede ocirikale ame woto i tyengi tutumia pyeraryo. Daudi te ŋoŋolo odoŋe aguragura luŋ ame onwoŋo wao gadigadi lweny, cite te weko ame romo waya gadigadi lweny mia acel keken.

⁵I kare ame jo me Curia me Damaciko obino me konyo Adadejer, abaka me Coba, Daudi te neko jogi tutumia pyeraryo wie aryo.

⁶Daudi te keto cel a mony i lobogi i ŋet Damaciko, jo Curia doŋ te bedo i te loc a Daudi kun daŋ omio ocoro bane. Rwot te bedo miyo Daudi loyo lobo luŋ ame en co bo mony i komgi.

⁷Daudi te mayo lwak kwot apipim ame otio kede jabu ame onwoŋo tye baŋ omiro abaka Adadejer, te terogi luŋ i Jerucalem.

⁸Abaka Daudi daŋ omao lwak mola adwoŋ meicel i boma me Tibat kede Kun, ame gin obedo boma ame onwoŋo tye ite loc abaka Adadejer. Magi en mola ame rik Culeman otio i dero pii me mola kede pagi, kede takki mola ame rik otio kedgi i ot Obaŋa.

⁹I kare ame Toi abaka me Kamat owinyo ni Daudi oloo mony Adadejer abaka me Coba luŋ,

¹⁰en ocwao wode Yoram baŋ abaka Daudi, me wot mote, dok daŋ me pwoye pi lweny loyo Adadejer oko, pien Adadejer onwoŋo yam obedo lweny kede Toi tyen apol meicel. Yoram te wot kun tero jarm ame otio i ryal, i jabu kede mola.

¹¹Jami-nono luŋ Daudi te jalo baŋ Rwot, anaka ryal, kede jabu ame oya i baŋ rok ocele luŋ ame en oloo, ame oya Edom, Moab, kede baŋ jo Ammon, jo Piriciti, kede i baŋ jo Amalek.

¹²Abicai wot a Jeruya te dok neko jo Edom tutumia apar wie aboro i luŋ me Kado.

¹³En te keto cel me mony romo lobo Edom luŋ, jo Edom luŋ te bedo i te loc a Daudi. Rwot te miyo Daudi loyo lobo luŋ ame en cobo mony i komgi.

¹⁴Mannono te miyo Daudi te loyo jo Icrael luŋ; obedo ŋolo kop atira kun daŋ neno ni jo luŋ otye ka tic kedgi aber.

¹⁵Yoab wot a Ceruya onwoŋo obedo atel wi monyere; Yekocafati wot Akilud te bedo aco kop i kom ginnoro luŋ ame otimere;

¹⁶Jadok wot Akitud kede Akimeleki wot Abiatar te bedo olamdog; Cabica te bedo arannere;

¹⁷Benaya wot a Yekoyadi te bedo adwoŋ ame loo jo Keret kede jo Pelet; eka awobe a Daudi te bedo odoŋe ame loo ticcere en abaka.