Read lango 1 Tekwaro 21 Bible Online

1 Tekwaro 21 - lango bible

1 Tekwaro 21

¹Catan rik te mito ke lo can i kom jo Icrael omio te cupo Daudi me kwano wei jo Icrael.

²Mannono te miyo Daudi kobbi Yoab kede odoŋe luŋ ame onwoŋo telo wi monnyere ni, “Wot i atekere luŋ me Icrael, me iwot ikwan wunu wei jo, cakere i Beer-ceba tuno kede naka i Dan. Amito ŋeyo wei jo ducu.”

³Cite Yoab te gamo ni, “Adwoŋ, Rwot Obaŋani myero med wei joni ame tye-ni-tyen mia acel ocele, kun yin pwod ikwo ame pwod itwero neno kede waŋi, kite ame gin doŋ dwon wok-ki! Aman gin lwakki luŋ mom megi, mom gin luŋ obedo omironi, Kara piŋo yin abaka imito kwano wei jo doki? Piŋo imito kela bai i kom jo Icrael?”

⁴Cite abaka te diyo Yoab me winyo koppere; en te ya oko i nyim abaka, te wot kwano wei jo Icrael kun mano lobo me Icrael ducu, te dwoogo kede cen naka i Jerucalem.

⁵Yoab te titti abaka wei jo ame okwano Wei jo ame romo lweny iyi Icrael onwoŋo romo million acel kede tutumia mia acel, eka me Juda te bedo tutumia aŋwen kede pyerabiro.

⁶Ento Yoab rik mom okwano wei jo Levi kede jo Benjamin, pien cunye onwoŋo mom yom i kom cik abaka-nono.

⁷Ento cuny Obaŋa mom rik te bedo ayom i kom gin ame onwoŋo otimo-nono, omio en te ke to can i kom jo Icrael.

⁸Daudi te cako bako doge baŋ Obaŋa kun ko bo ni, “Ati mo twon bai a mom kobere i gin ame atimo. Tim doŋ ber, Ama Rwot ikwany balla oko, an amironi; pien ati mo tim me mino meicel.”

⁹Rwot te kobbi adwarpiny Gad, ame onwoŋo obedo araŋ-piny a Daudi ni,

¹⁰“Wot ikobbi Daudi ni, ‘Amie tam adek ame en myero eyer acel i akinagi, en atim.’ ”

¹¹Gad te wot baŋ Daudi, te titte gin ame Rwot okobo; openye ni,

¹²“Imito ni kec en a myero pot i loboni te ri pi mwakki adek? Onyo yin en i bed ŋwec arjweca pi dwete adek kun irino okworri? Onyo imito ni too edeke ame obedo pala lweny a Rwot poti i loboni pi nino adek, kun amalaika a Rwot jwero jo i lobo a jo Icrael. Aco yin doŋ itam ite timo gin ame myero adwok baŋ Rwot.”

¹³Daudi te kobbi Gad ni, “At ye i twon cannono adwoŋ meicel; cite mom aye ni dano en amyero ket can i koma. Rwot gire en myero ket can i komwa, pien en obedo akica meicel.”

¹⁴Rwot te cwayo too edeke i kom jo Icrael geye odiko tuno kede naka i kare ame rik ociko. Lwak jo ame romo tutumia pyerabiro twal te to,

¹⁵Obaŋa rik te cwalo amalaika me balo Jerucalem oko ento i ka re ame en doŋ onwoŋo mito balo oko, Rwot te loko tammere oko me keto can i kom jo, omio te kobbi amalaika ame onwoŋo oneko jo ni, “Wek doŋ bedi! Oromo doŋ.” Amalaika onwoŋo tye i ŋet laro dino kai Aruna, dano me Jebuc.

¹⁶Daudi te neno amalaika ame onwoŋo aneko jo tye ocun i akina lobo kede polo, kun omako pala me romo i ciŋe me neko kede jo me Jerucalem. Daudi karacel kede odoŋe me Icrael, ame gin luŋ onwoŋo oruko bono cola, gin luŋ ote ony piny aryeba cuny.

¹⁷Daudi okobbi Obaŋa ni, “Kom an a rik amio cik ni myero kwan wei jo? An gire en ame atimo bai, atimo gin arac. Kara jo man do tye aneno can nono. Tim ber, Ama Rwot Obaŋana, iluny goya an keken karacel kede jo me oda, ento iwek jo man bedi.”

¹⁸I nino-nono ikome amalaika a Rwot te kobbi Gad me wot kobbi Daudi ni, “Wot malo kuca, me iwot ican keno lam me yalo Rwot i laro me dino kai Aruna dano me Jebuc.”

¹⁹Daudi te winyo gin ame Rwot omio Gad okobbe, en te wot kuno.

²⁰En onwoŋo Aruna kede awobe mere aŋwen tye adino nano. I kare ame Aruna obolo waŋe, oneno amala ika a Rwot, awobe me re aŋwen te riŋo wot pono oko.

²¹Kare ame Aruna oneno abaka Daudi tye abino en owoto bane te wot ryebere piny i nyime wore.

²²Daudi te kobbe ni, “Mia laro dino kaili awili, me acan keno lam me yalo Rwot, me too edeke ya oko i kom jo. An abino culli wei ame iŋolo luŋ pire.”

²³Aruna te gamo dog abaka ni, “Yin giri kwany gin ame imito, Ama adwoŋŋa; nen twoni aŋwen me yalo Rwot i mot awaŋa ene, kede apwod me dino kai itwero tic kedgi akaka yen, kede dok nano me mot me moko kwon. An amiogi bani luŋ nono.”

²⁴Cite abaka Daudi te gamo ni, “Mom amannono gire, an myero acul lim pirgi, Mom abino gamo giri moro me yalo Rwot, an mom abino yalo Rwot Obaŋana kede mot a mom aculo ginnoro pire.”

²⁵Daudi te wilo laro dino kai kede twoni i baŋ Aruna; kun mie cekel me jabu mia abicel ame opimo.

²⁶En te cano keno lam me yalo Rwot kuno, eka te wano iye mot awaŋa kede me kweyo cuny. Rwot te gamo kwaccere ame en okwao, kun cwao mac i polo i kom mot awaŋa ame tye i wi keno lam.

²⁷Rwot te kobbi amala ika me dwoko pala mere i yi akuro.

²⁸I kare ame Daudi oneno ni Rwot otyeko gamo kwaccere i laro me dino kai Aruna, dano me Jebuc, en te medde yalo Rwot i mottere ducu kuno,

²⁹Pien kema a Rwot ame rik Muca otio i tim, kede keno lam me mot awaŋa onwoŋo rik pwod tye kabedo me woro Obaŋa malo i wi kidi ame tye i Gibeon;

³⁰Cite Daudi onwoŋo rik mom romo wot kuno me wot woro Obaŋa iye, pien onwoŋo rik tye ka Iworo pala romo ame amalaika a Rwot onwoŋo amako i ciŋe.