Read lango 1 Tekwaro 22 Bible Online

1 Tekwaro 22 - lango bible

1 Tekwaro 22

¹Mannono omio Daudi okobo ni, “Ot me woro Rwot Obaŋa bino bedo gire kan. Keno lam me waŋo mot a jo Icrael daŋ bino bedo kan.”

²Daudi rik te ciko ni myero cok orok ducu ame onwoŋo bedo i lobo me Icrael karacel. En rik te miyogi tic, tic me payo godi, tic me payo kidi abeco me gero ot Obaŋa.

³En dok te kano daŋ nyonyo apipim me tiyo cumal me goyo kika bao me dogcel, kede me tweyo bao, karacel kede mola daŋ adwoŋ ata ame mom oromo pi mo pekere,

⁴Jo Turo kede Cidon te kelli Daudi bao Cedar apipim, ame welgi daŋ mom romo kwane kadi acel pi dworjgi.

⁵Pien Daudi onwoŋo obedo tamo ni, “Woda Culeman pwod tidi, ijeccere daŋ pwod nok, doŋ ot ame en bino gero pi Rwot myero bed me kwogo okato kare, ame pire myero rwo atek i wi lobo luŋ. En omio an myero ayikke jami luŋ me gero ottono.” Mannono omio Daudi oyiko jami me gero ot Obaŋa adwoŋ meicel kun mom ru oto.

⁶En olwoŋo wode Culeman, te cike me gero ot a Rwot Obaŋa me Icrael.

⁷Daudi okobbi wode ni, “Atinna, an onwoŋo abedo lwodo kop i cunya ni kono agero ottoro me woro Rwot Obaŋa.

⁸Ento Rwot obino baŋa te kobba ni, ‘Yin doŋ ityeko onyoo remo a jo apol meicel dok daŋ ibedo lweny kare luŋ; pi mannono yin mom ibino gero ottoro me wora pi remo adwoŋ meicel ame inyoo i nyima i lobo.

⁹Nen ba yin ibino nywalo atin awo bi, abino miyo en bedo i kuc, pien abino miyo okworrere ame tye i ŋete bedo kede kuc kun mom oyele. Nyiŋ wodenono obino lwoŋo ni Culeman, pien i kare me loccere abino miyo kuc baŋ jo Icrael karacel kede weo.

¹⁰En bi no gero ot me wora. En bino bedo woda, an abino bedo pappere, Abino moko kom me loccere bedo iyi Icrael atwal.’

¹¹“Doŋ pi mano ba, atinna, Rwot Obaŋani myero bed kedi, me ityek tic me gero ot a Rwot Obaŋani, kite ame en rik okobo kede baŋa,

¹²Rwot Obaŋani myero mi ryeko kede niaŋ atut me ilo jo mere kun ilubo cikere ame en omi i kare ame en doŋ omi dit me loyo jo Icrael.

¹³Ka ee igwokere ilubo cik ducu ame Rwot rik ociko baŋ Muca pi jo Icrael, ibino limo winyo. Bed atek ame cunyi nwaŋ. Kur ilwor; cunyi daŋ kur poti.

¹⁴Nen an doŋ atyeko yelle atek meicel, ayiko lwak jami-ni me gero ot a Rwot, ayiko jabu ame romo tan tutumia aŋwen kede ryal ame buco romo tan tutumia pyeraŋwen me gero ot a Rwot. Medo i kom mannono ayiko daŋ mola kede nyonyo ame dwoŋ atata, mom twero pimere kadi acel. Ayiko daŋ bao kede kiddi apipim, ento yin myero daŋ dok imed en ocele i komgi.

¹⁵Jo me ticci gire tye apipim. Tye jo me payo kiddi, jo me gedo, opac kede kit odiro apapat ame welgi mom romo kwanne, ame gin luŋ obedo jo ame kwiri meicel i ticgi,

¹⁶kun otio tic i jabu, ryal, mola, kede nyonyo. Cak doŋ tic oko atinna. Rwot myero bed kedi.”

¹⁷Daudi dok te ciko odoŋe me Icrael luŋ me konyo wode Culeman, kun kobbigi ni,

¹⁸“Myero Rwot Obanawu bed kedwu, omiwu kuc i kabedo ducu. En omio aloo jo ame yam bedo i lobo man luŋ, aman doŋ gin tye i te locwa kede i te loc a Rwot.

¹⁹Aman doŋ myero iketo cunywu me tic baŋ Rwot Obanawu i cunywu ducu kede tipowu ducu, Cak wunu gero ot acil me woro Rwot Obaŋa me iket wunu canduk me cikere a Rwot iye kede jami acil luŋ ame iworo wunu i Rwot.”