Read lango 1 Tekwaro 23 Bible Online

1 Tekwaro 23 - lango bible

1 Tekwaro 23

¹I kare ame Daudi doŋ onwoŋo oti atek meicel, oketo wode Culeman obedo abaka ame loo jo Icrael.

²Daudi te coko odoŋe a jo Icrael luŋ kede olamdog karacel kede jo Olevi.

³En te kwano jo Olevi luŋ ame mwaka me ditogi oromo pyeradek dok kede malo. Welgi luŋ te romo tutumia pyeradek wie aboro.

⁴Abaka Daudi te kobo ni, “Jo tutumia pyeraryo wie aŋwen i akinagi bi no bedo jo ame tio tic i ot a Rwot, eka jo tutumia abicel te bedo jo ame gwoko kop i kom gin ame otimere kede oŋolkop.

⁵Jo tutumia aŋwen bino bedo ogwok doggola, kede jo tutumia aŋwen bino bedo jo ame wero wer me pako Rwot, kun otio jami luŋ ame onwoŋo otio me wer.”

⁶Daudi opokogi i dul adek kun lubo doggola a kwarigi ame obedo awobe a Levi: Gercom, Kokat kede Merari.

⁷Gercom rik onwoŋo tye awobe aryo, Ladan kede Cimei.

⁸Ladan onwoŋo tye awobe adek, Jekiel ame obedo adwoij ame loogi, Jetam kede Joel.

⁹Joni adek-ni en ame rik obedo odoŋe atekere me doggola a Ladan, Cemei rik onwoŋo daŋ tye awo be adek, Celomot, Kajiel, kede Karon.

¹⁰Awobe a Cimei aŋwen te bedo Jakat, Jina, Jeuc kede Beria, Man nyiŋ awobe aŋwen-nono kun lubere i dito me nywalogi.

¹¹Omio Jakat ame obedo adwoŋ ame loogi eka Jija te lube. Ikwae a Jeuc rik mom te bedo apol mano omio rik okwanogi acalo jo me doggola acel.

¹²Kokat rik onwoŋo tye awobe aŋwen, Amuram, Ijar, Kebron kede Ujiel,

¹³wode me kao Amuram rik obed papa Aron kede Muca, Aron kede ikwae rik ote miyo tic me kwero jami acil meicel, gin obedo jo ame tio tic me wano odok a ŋwece kur me woro Rwot atwal, kun otio bane, dok olamo winyo i kom lwak i nyiŋe,

¹⁴Ento awobe a Muca, ame obedo dano Obaŋa, rik daŋ okwanogi i kom jo Levi,

¹⁵En rik onwoŋo tye awobe mere aryo, Gercom kede Eliejer.

¹⁶Awobe a Gercom, adwoŋ ame loogi rik obedo Cebuel.

¹⁷Eliejer rik tye ka awobi acel keken ame nyiŋe Rekabia, ento en Rekabia rik te nywalo awobe apol meicel.

¹⁸Ijar wot a Kokat rik tye i wode ame nyiŋe Celumit, en ame rik obedo adwoŋ ame loo doggolagi,

¹⁹Kebron wot a Kokat me adekkere rik onwoŋo tye awobe aŋwen, ame ŋat a rik loogi nyiŋe Jeria, Amaria te lube, eka Jekajiel kede Jekamean,

²⁰Ujiel wot a Kokat me aŋwennere rik tye awobe aryo Mika gin kede Icaya.

²¹Merari rik onywalo awobe aryo, Makali kede Muci, Makali rik daŋ te nywalo awobe aryo, Eleajar kede Kic,

²²ento Eleajar te to kun mom onywalo atin awobi moro kono ka anyira keken. Ento awobe a Kic rik te nyomo anyira mere-nono.

²³Muci wot a Merari ame obedo awobi me aryo rik te nywalo awobe adek, Makali, Eder, kede Jeremot.

²⁴Magi en ame rik obedo ikwae a Levi kun lubere i doggola me ot a kwarigi, gin aye rik obedo odoŋe atekere me doggola a kwarigi ame ocoo i buk me Tekwaro kun ocoo nyiŋ nat acel acel. Ŋat acel acel i kom ikwae a Levi ame mwaka me dittere oromo pyeraryo dok kede malo onwoŋo doŋ tye kede tic ame en tio i ot me woro Rwot.

²⁵Daudi rik onwoŋo okobo ni, “Rwot Obaŋa me Icrael doŋ omio kuc baŋ jo mere, en i kome doŋ bino bedo i Jerucalem atwal.

²⁶Pi mannono, jo Levi mom dok bi no medde tiŋo kema a Rwot, akadi jami ame otio kedgi iye.”

²⁷Pi kop a Daudi ame eko bo me agikki mere jo Levi rik ocoogi me doko jo ame tio i ot Obaŋa ka mwaka me ditagi doŋ oromo pyeraryo nono.

²⁸Gin rik okonyo olamdog ame obedo ikwae Aron kede ticgi i ot a Rwot, kun ogwoko daŋ dyekal kede icika atitino ame tye i ŋet ot Obaŋa, olonyo jami luŋ bedo acil dok daŋ otio kit tic ocele ame tye i at Obaŋa.

²⁹Dok daŋ okonyo tic me ogati ame oketo i nyim Rwot kede moko kwon ame otio kedgi me mot me yalo Obaŋa, kede capat areppere a tobi mom iye, kede moko kwon ame otedo kede ogati i tako nyonyo me yalo Obaŋa, kede mot me moko kwon ame orubo i moo, dok daŋ gin en ame gwoko gi-pimo jami ame oyalo kede Obaŋa i ot a Rwot.

³⁰Gin rik ocuŋ i nyim Rwot nino ducu odiko kede otyeno kun opake dok daŋ opwoc,

³¹kede i kare ducu ame oyalo Rwot i mot awaŋa i cerj cabit, i kare me por a dwe, kede i nino adoŋo dono ame opo pirgi, gin ocuŋ i nyim Rwot kare ducu kittono. Cik rik onwoŋo tye ame nyuto kit wel jo Levi a myero ti i dul acel i kare me woro Obaŋa.

³²Gin daŋ en a rik ogwoko kema me rwatte kede kabedo acil, dok okonyo daŋ omegogi, ame obedo awobe Aron i ticgi i ot a Rwot.