Read lango 1 Tekwaro 26 Bible Online

1 Tekwaro 26 - lango bible

1 Tekwaro 26

¹Man en kite ame rik opoko kede tic a jo ame gwoko doggola ot Obaŋa. I kom jo me doggola a Kora rik oyero iye Mecelemia wot a Kore, ame obedo dano ame oya i kom ikwae Acap.

²Mecelemia rik onwoŋo tye kede awobe abiro: Jekaria, Jediael, Jebadia, Jatniel,

³Elam, Jekokanan, kede Elieko-enai.

⁴Rik daŋ onwoŋo tye lo ame olwoŋo ni Obed-edom ame rik Obaŋa omio gum te nywalo awo be abiro: Cemaya, Jekojaba, Joa, Cakar, Netanel,

⁵Ammiel, Icakar, kede Peulletai.

⁶Wot Obed-edom me kao, Cemaya, rik onwoŋo tye kede awobe mere ame gin luŋ obedo jo a pirgi tek i doggolagi, pien gin luŋ rik onwoŋo obedo jo ame kwirri atek.

⁷Nyiŋgi ene: Otini, Repael, Obed, Eljabad, Eliku, kede Cemacia. Awobe aryo ame nyingi ogiko rik onwoŋo dok tye i mot amala me diro ame kato me omegogi luŋ.

⁸Jo ame oya i ot Obed-edom rik onwoŋo romo pyerabicel wie aryo, kun gin luŋ obedo jo ame opwonyo aber meicel pi tic man.

⁹Aco jo me ot a Mecelemia rik onwoŋo romo apar wie aboro ame opwonyo pi tic man.

¹⁰I kom jo me doggola a Merari, rik oyero Koca ame onwoŋo tye awo be mere aŋwen: Cimri en ame rik papagi oketo me bedo atelgi, kadi bed en rik mom onwoŋo obedo atin kao,

¹¹Kilika, Tebalia, kede Jekaria. Koca kede awobe mere kede omego mere ame rik oyero me kuro ot Obaŋa, rik oromo apar wie adek.

¹²Ogwok doggola ot Obaŋa rik onwoŋo opoko i dul i dul, kun dul acel acel tye kede atelgi, rik opokkigi tic i ot Obaŋa kite ame rik opoko kede baŋ omegogi ame obedo jo Levi ame tio i ot a Rwot.

¹³Gin luŋ rik obolo kwir me neyo doggola me ot Obaŋa ame dul acel acel myero kur, kwir rik obolo arorom kun mom opoko ni jo me goggola moro-ni dwon onyo tidi.

¹⁴Kwir me gwoko doggola ame tye tutuŋ kide te poto i kom Celemia. K wir a wode Jekaria, ame en rik ami tam ame kare luŋ mio tam aber, mere rik te poto pi gwoko doggola ame tye tutuŋ anyarolum,

¹⁵Eka kwir Obededom te poto me gwoko doggola ame tye tutuŋ anyarodi. Awobe mere rik ote pokkigi tic me gwoko ot kano jami.

¹⁶Kwir a Cupim kede Koca te poto me gwoko doggola ame tye tutuŋ to, kede doggola ame Celeket ame tye i yo ame dok malo, Tic me gwoko doggola rik onwoŋo opoko baŋ jo i dul i dul, kun wel jo ame gwoko nino acel acel tye kit man:

¹⁷Jo abicel en ame kuro doggola ame tye tuŋ kide i nino acel acel, jo aŋwen en ame rik kuro doggola ame tye tutuŋ anyarolum nino acel acel jo aŋwen en ame rik kuro doggola ame tye tutuŋ anyarodi, jo aryo aryo en ame rik kuro ot kano jami,

¹⁸I ot ame tere peru ame tye tuturj to onwoŋo tye jo aŋwen en ame kuro kun obedo i ŋet yo kede jo aryo ame obedo i ot ame tere peru,

¹⁹Man en kit ame rik opoko kede tic baŋ omego me doggola a Kora kede me doggola a Merari.

²⁰I akina jo Levi rik oketo Akija me bedo adwoŋ ame gwoko udi me kano lim ame tye i ot Obaŋa, kede udi me kano lim me me mot ame ojalo baŋ Rwot.

²¹Laban, ame rik obedo dano me doggola a Gercon, onwoŋo rik obedo kwaro a jo me doggola apol apapat, ame iyi akinagi tye iye jo me doggola a Jekiel.

²²Awobe a Jekiel aryo, Jetam kede ominnere Joel, gin rik obedo odoŋe ame gwoko udi me kano lim ame onwoŋo tye i ot a Rwot kede udi me kano jami,

²³Rik daŋ opoko tic baŋ jo Amuram, jo Ijar, jo a Kebron, kede jo Ujiel.

²⁴Cebuel ame obedo akwar Gercom wot a Muca en ame rik obedo adwoŋ ame lo tic me gwoko udi me kano lim.

²⁵Omego mere rik ene: i akina ikwae Eliejer rik tye wode Rekabia ame obedo papa a Jecaya, ame wode Joram, ame obedo pappa Jikri ame wode Celomot.

²⁶Celomot karacel kede jo me ode luŋ rik gin obedo jo ame gwoko udi kano mot luŋ ame abaka Daudi ojalo baŋ Obaŋa, kede mot ame odoŋe atekere ame loo doggola acel acel ojalo kede en ame otel mony ame loo jo tutumia ojalo kede en ame otel mony ame loo jo mia ojalo karacel kede en ame otel mony adoŋo ojalo.

²⁷G in rik ojalo mot ame oya i kom gin ame oyako i lweny me yiko ot a Rwot.

²⁸Celumot karacel kede jo me ode luŋ rik gin obedo jo ame gwoko udi me kano mot luŋ ame ojalo me tic i ot Rwot, medo kede mot ame adwarpiny Camwiri okelo, kede en ame abaka Caulo wot a Kic okelo, kede en ame Abuneri wot a Ner okelo, kede en ame Yoab wot a Jeruya okelo.

²⁹I kom ikwae Ijar, rik oyero Kanania kede awobe mere me tiyo tic ocele iyi akina jo Icrael, kun gin obedo acalo rwode kede oŋolkop.

³⁰I kom ikwae a Kebron rik ote yero Kacabia karacel kede wati mere tutumia acel kede mia abiro ame gin luŋ odiro meicel i neno tic a jo Icrael ame tye tutuŋ to me kulo Jordan, kun oneno tic a Rwot kede tic abaka daŋ,

³¹Jerija en ame rik obedo adwoŋgi akina ikwae a jo Kebron luŋ. I mwaka me pyeraŋwen nono me loc a Daudi, rik ote bedo yenyo kite ame ikwae a Kebron tye kede, rik ote nwoŋo jo amw odiro meicel i lweny i doggola man ame onwoŋo bedo i Jajer i lobo me Gilead.

³²Daudi te yero Jerija kede jo ame odiro meicel i komgi ame romo tutumia aryo kede mia abiro ame gin luŋ obedo odoŋe atekere ame loo doggola a kwarigi me bedo jo ame ne no tic i lobo a jo Reuben, kede Gad kede me nucu atekere a jo Manace, kun oneno tic Obaŋa kede me abaka.