Read lango 1 Tekwaro 27 Bible Online

1 Tekwaro 27 - lango bible

1 Tekwaro 27

¹Man en nyiŋ odoŋe atekere me Icrael me doggola a kwarigi, kede odoŋe ame onwoŋo obedo otel me mony, ame loo jo tutumia kede en ame loo jo mia, kede odoŋe ame rik tio baŋ abaka kun oloo kop ducu ame mako jo ame bino baŋ abaka kede en ame ya i bane. I dwe acel acel ame tye i mwaka acel dul apapat ame tye iye jo tutumia pyeroaryo wie aŋwen en ame rik bedo i tic man, kun otye kede atelgi me dwe nono.

²Magi en nyiŋ jo ame rik obedo otel me dwe acel acel: Jocobeam wot a Jabdiel en ame rik obedo adwoŋ ame loo dul me agege ame onwoŋo daŋ tio i dwe me agege;

³en rik obedo akwar Perej, kun telo mony ame tio i dwe me agege.

⁴Dodai ame obedo akwar Akoki en ame rik obedo adwoŋ ame loo dul mony me aryo, ame tio i dwe me aryo.

⁵Benaya wot a Yekoyadi alamdog, en ame rik obedo adwoŋ ame loo dul mony me adek, ame tio i dwe me adek.

⁶En ame rik daŋ obedo atel a jo pyeradek ame gin luŋ obedo twoni jo atek meicel, en onwoŋo dano acel i ak inagi. Wode Amijabed en ame rik leo kakare acalo adwoŋ ame loo dullere-nono.

⁷Acael ame obedo omin a Yoab, en ame rik obedo adwoŋ ame loo dul mony me aŋwen, ame tio i dwe me aŋwen. Wode Jebadia en ame rik leo kakare acalo adwoŋ ame loo dullere-nono.

⁸Camut ame obedo akwar Ijar en ame rik obedo adwoŋ ame loo dul mony me abic, ame tio i dwe me abic,

⁹Ira wot Ikec ame obedo dano me Tekoa en ame rik obedo adwoŋ ame loo dul mony me kanyape, ame tio i dwe me kanyape,

¹⁰Kelej ame obedo dano me Epraim, ame oya i Pelet en ame rik obedo adwoŋ ame loo dul mony me abiro, ame tio i dwe me abiro,

¹¹Cibekai ame obedo dano me doggola a Jera, me atekere a Juda ame oya i boma me Kuca, en ame rik obedo adwoŋ ame rik telo dul mony me aboro, ame tio i dwe me aboro,

¹²Abiejer ame obedo dano me atekere a Benjamin ame onwoŋo oya i Anatot en ame rik obedo adwoŋ ame loo dul mony me aboŋwen, ame tio i dwe me aboŋwen.

¹³Makarai ame onwoŋo oya i Netopa, dano me doggola a Jera, en ame rik obedo adwoŋ ame loo dul mony me tomon, ame tio i dwe me tomon,

¹⁴Benaya ame obedo dano me atekere Epraim ame onwoŋo oya i Piraton, en onwoŋo obedo adwoŋ ame loo dul mony me apar wie acel, ame tio i dwe me apar wie acel.

¹⁵Keldai ame obedo dano me doggola Otniel ame onwoŋo oya i Netopa en ame rik obedo adwoŋ ame loo dul mony me apar wie aryo, ame tio i dwe me apar wie aryo.

¹⁶Man en nyiŋ jo ame rik loo atekere apapat me Icrael: Eliejer wot a Jikri en ame rik obedo adwoŋ ame loo atekere a jo Reuben; Cepatia wot a Maaka en ame rik obedo adwoŋ ame loo atekere a jo Cimeon;

¹⁷Kacabia wot a Kamuel en ame rik obedo adwoŋ ame loo atekere jo Levi; Jadok en ame rik loo jo Aron;

¹⁸Eliku ame rik nat acel i akina omego a Daudi en ame rik loo atekere ajo Juda; Omri wot a Mikael en ame rik obedo adwoŋ ame loo atekere a jo Icakar;

¹⁹Jeimaya wot Obadia en ame rik obedo adwoŋ ame loo atekere ajo Jabulon; Jeremot wot Ajriel en ame rik obedo adwoŋ ame loo atekere a jo Naputali;

²⁰Kocea wot Ajajia en ame rik obedo adwoŋ ame loo atekere a jo Epraim; Joel wot a Pedaya en ame rik obedo adwoŋ ame loo nucu atekere a jo Manace;

²¹Eddo wot a Jekaria en ame rik obedo adwoŋ ame loo nucu atakere a jo Manace ocele ame onwoŋo tye i Gilead; Jaciel wot Abuneri en ame rik obedo adwoŋ ame loo atekere a jo Benjamin;

²²Ajarel wot a Jerukam en ame rik obedo adwoŋ ame loo atekere a jo Dan: Magi en aye odoŋe ame onwoŋo loo atekere luŋ me Icrael.

²³Daudi rik onwoŋo mom okwano wel jo ame mwaka me ditogi mom ru oromo pyeraryo, pien Rwot rik onwoŋo ociko ni ebino miyo jo Icrael bedo apol meicel acalo acer ame tye i polo.

²⁴Yoab wot a Jeruya en ame rik ogeo kwano jo Icrael, cite rik mom te tyeko ducu, Obaŋa rik oketo can i kom jo Icrael pi wel jo ame okwano naca, naka omio welgi mom obin ocoo i buk me Tekwaro ame tito kop i kom abaka Daudi.

²⁵Magi en nyiŋ jo ame rik onwoŋo loo jami abaka: Ajimavet wot Adiel en ame rik loo udi me kano lim abaka; Yonacan wot a Ujjia en ame rik loo udi me kano lim ame tye i akina pacci adoŋo kede en atino kede en ame tye i udi adono ame ocuŋ igun malo;

²⁶Ejri wot a Kelub en ame rik loo jo ame tio tic me pur i poto;

²⁷Cimei ame rik obedo dano me Rama en ame rik obedo nat ame loo potti olok; Jabdi ame rik obedo dano me Cipim en ame rik loo kono olok ame okano i udi me kano korjo olok.

²⁸Baal-kanan ame obedo dano me Geder en ame rik obedo nat ame loo yen Jeituni kede olam ame rik tye i bar me Cepela; eka Yowaci en ame te loyo ot ame okano iye moo jeituni,

²⁹Citrayi ame obedo dano me Caron en ame rik obedo ŋat ame loo dok ame rik okwao i Caron; Capat wot Adlai en ame rik loo dok luŋ ame okwao i luŋ apapat.

³⁰Obil ame obedo dano me Icmail en ame rik obedo nat ame loo inaga luŋ; Jedeya ame obedo dano me Meronot en a rik obedo nat ame loo kana luŋ. Jajij me Kagri en ame rik obedo nat ame loo rommi kede dyegi luŋ,

³¹Magi en nyiŋ jo luŋ ame rik gwoko jami abaka Daudi.

³²Yonacan ame obedo okeo a Daudi en ame rik obedo ami-tam pien en rik obedo loo ame niannere tut meicel, dok en ame rik obedo araŋ. En kede Jekiel wot a Kakmoni en ame rik loo kop i kom pwonyere awo be abaka.

³³Akitopel rik obedo ami-tam baŋ abaka, eka Kucai me Arki te bedo awot abaka.

³⁴I kare ame Akitopel oto, Yekoyada wot a Benaya kede Abiatar en ame te leyo kakare, Y oab en ame rik obedo adwoŋ ame loo mony abaka Daudi.