Read lango 1 Tekwaro 28 Bible Online

1 Tekwaro 28 - lango bible

1 Tekwaro 28

¹Daudi rik ociko odoŋe me Icrael luŋ me cokere karacel i Jerucalem. Mannono te miyo odoŋe ate ke re ducu, odoŋe ame loo tic apapat ame rik otio i te loc abaka, odoŋe ame loo mony, ame loo jo tutumia karacel kede en ame loo jo mia, odoŋe luŋ ame gwoko jami kede lim abaka luŋ kede awobe mere, karacel kede odoŋe ame loo paco abaka, kede twoni jo atek i lweny, karacel kede jo luŋ ame odiro meicel i lweny.

²Daudi te ya malo, cun i nyimgi, te kobbigi ni, “Wun jo luŋ me lobowa, omegona karacel kede jona, winy wunu koppa, Rik an abedo i tam icunya me gero ot kan ame canduk me cikere a Rwot twero bedo iye, kede kan ame obino keto iye kom me teno tyen Obaŋawa, Atyeko doŋ yiko kite a myero ger kede ot me woro Obaŋa,

³ento Obaŋa ogeŋa oko kun kobo ni, ‘Yin mom ibino gero ottoro me wora pien yin ibedo alweny ame ityeko onyo re mo a jo adwoŋ meicel.

⁴Rwot Obaŋa me Icrael yam oyera karacel kede jo me doggola a kwarona me bedo loyo jo Icrael nakanaka. En yam oyero atekere me Juda me bedo atekere ame loc me Icrael ya iye, eka i kom atekere me Juda, en oyero ot a pappa, iyi akina awobe a pappa en te kwanya me bedo abaka ame loo jo Icrael ducu,

⁵En yam omia itino awobe apol meicel, ento i kom awobe nanono en otyeko yero Culeman me bedo i kom me loc a Rwot kun loo jo Icrael.

⁶“Rwot okobba ni, ‘Wodi Culeman en ame bino gero ot me wora. An atyeko yere me bedo woda, an abino bedo pappere.

⁷Abino miyo loccere moko atwal ka ee en oketo cunye atek me lubo cikka luŋ kede gin ame aciko ducu, kite ame am an en tye ka timo kede i kare-ni.’ ”

⁸Doŋ aman ba, an acikowu i nyim jo Icrael ducu kede i nyim Obaŋawa, wun myero igwok wunu dok daŋ ibed yenyo wunu ignnoro luŋ ame Rwot Obaŋawu ocikowa iye, me wek imedde wunu bedo wegi lobo man aber-ri, dok daŋ ibed kobo wunu akoba i cirj ikwaewu ame bi no bulowu acalo gin ame gin oleo i banwu, me wek bed timere amano nakanaka.

⁹“Aco yin woda Culeman, aciki ni myero ibed ame ineo Obaŋa a pappi, kun itio bane kede cunyi ducu kede cuny ayom. Pien Rwot nio cuny jo ducu, en rjio ginnoro luŋ ame dano tye ayiko i cunye kede ginnoro luŋ ame en mito. Ka ee yin ibino bane, en gire bino gami; ento ka ee iya oko i bane en bino weki ata nakanaka.

¹⁰Myero ine aber ni Rwot doŋ otyeko yeri me gero ot me wore. Doŋ pi mano myero ibed atek acalo ico ikokome me icak ticcono oko.”

¹¹Daudi te miyo Culeman cal ame ogoo ame nyuto kite a myero ger kede ot Obaŋa luŋ, ame tye iye cal ot atidi ame tye i doggola me donyo i ot Obaŋa, kede cal udi iye luŋ, kede cal udi kano lim kede cal ici ka amala luŋ, kede cal me udi atitino ducu ame tye iye, karacel kede cal me icika ame kom me kica myero bed iye.

¹²Dok te miye cal ame nyuto dyekal luŋ ame tye i ŋet ot a Rwot kite ame rik en otamo kede, icika me udi atino ame omano ot ducu kede udi me kano lim luŋ ame tye i ot Obaŋa karacel kede udi me kano lim me mot ame otyeko jalo baŋ Rwot.

¹³Daudi dok te nyutte daŋ kite a myero tic olamdog kede jo Levi bed kede, onyutte kit tic apapat a myero gin ti i ot a Rwot; kede jami luŋ ame gin bino tic kede i ot a Rwot ame myero gin gwoki.

¹⁴Onyutte daŋ k it ame myero pim i jabu kede ryal me tiyo jami me tic luŋ,

¹⁵pek me jabu a myero pim me tiyo gi-cibo tara me jabu acel acel, kede pek me jabu myero pim me tiyo tara me jabu acel acel, kede ryal a myero pim me tiyo gi-cibo tara acel acel kede tara mere kun lubo kite ame otio kede gi-cibo tara acel acel i ot woro Rwot,

¹⁶kede jabu a myero pim me tiyo meja me jabu ame oketo iye ogati i nyim Rwot, kede ryal a myero pim me tiyo meja me ryal acel acel.

¹⁷Dok onyuto daŋ kite a myero pim kede jabu ame olio aber me tiyo acob riŋo, becen acel acel, ikopo acel acel kede bakuli acel acel, kede kite a myero pim kede ryal pi bakuli acel acel,

¹⁸kede kite a myero pim kede jabu ame olio aber me tiyo keno me waŋo odok akur, kede me tiyo gadi gadi okerubi ame bino yaro bwomgi wumo kede canduk me cikere a Rwot.

¹⁹Man luŋ en onyuto kannaler kite ame onwoŋo ocoye kede i buk ame Rwot ocoo i ciŋe, ame nyuto kite ame tic myero tiye kede luŋ.

²⁰Daudi te kobbi wode Culeman ni, “Bed ico ame cunyi nwan me icak tic oko, Kur ilwor, cunyi kur poti; pien Rwot Obaŋa ame obedo Obaŋana, tye kedi. En mom bino weki ata, en bino bedo kedi tuno ka tic ame myero iti i ot a Rwot otum.

²¹Nen ba, olamdog ame atyeko poko dul i dul karacel kede Olevi pi tic a myero gin ti i ot Obaŋa; jo ame odiro i tic apapat ame tye kede miti i cunygi bino nywako ticcono karacel kedi. Lwak luŋ karacel kede odoŋe ame telogi, gin luŋ obino winyo koppi.”