Read lango 1 Tekwaro 29 Bible Online

1 Tekwaro 29 - lango bible

1 Tekwaro 29

¹Abaka te kobbi lwak luŋ ame ocokere ni, “Woda Culeman en obedo nat ame Obaŋa doŋ otyeko yero, cite en pwod tidi dok mom tye kede ŋec oromo. Ento tic me atia dwon meicel pien paco adwoŋ-ŋi mom bino bedo me a dano ento me a Rwot Obaŋa.

²Pi mannono, omio an atemo i tekona ducu me yiko jami luŋ pi ot a Rwot Obaŋana. Atyeko yiko jabu me tiyo jami me jabu, ryal me tiyo jami me ryal, mola me tiyo jami me mola, nyonyo me tiyo jami me nyonyo, bao me tiyo jami me bao, kun amedo iye daŋ lwak kiddi me wei apimpim, kede kiddi ocele atitino mege me amwona i kom jabu, kede kiddi gedo mogo apapat me wei, ame mogo i akinagi tar mogo mimila meicel.

³Medo i kom jami a doŋ otyeko coko-nono pi ot man acil, pi mit adwoŋ meicel ame at ye kede i kom ot Obaŋana, omio amio daŋ jabuna kede ryalla ikoma, a yam akano me gero ot Obaŋa,

⁴Amio jabu ame olio acil ame pekkere romo talanta tutumia adek kede ryal ame pekkere talanta tutumia abiro me puyo kor apama me icika ot a Rwot,

⁵kede pi jami luŋ ame odiro bino tiyo, jabu me tiyo jami me jabu, kede ryal me tiyo jami me ryal. Aman doŋ, ŋa i akinawu ame oye miyo mot kun mio i yomcuny ame tin en okwerre kene i nyim Rwot kan?”

⁶Eka odoŋe atekere ame loo doggola a kwarrigi kede odene atekere ame loo atekeregi kede odoŋe ame telo wi mony me jo tutumia kede en ame telo jo mia karacel kede odoŋe luŋ ame loo tic abaka te ye miyo mot me gero ot Obaŋa,

⁷Gin omio jami magi me gero ot Obaŋa, jabu ame romo talanta tutumia abic kede lim ocele me jabu ame romo talanta tutumia apar, kede ryal ame romo talanta tutumia apar kede mola ame romo talanta tutumia apar wie aboro, kede nyonyo ame romo talanta tutumia mia acel.

⁸Jo ame onwoŋo tye i kiddi atitino me wei omiogi i ot kano lim ame tye i ot a Rwot, ame Jekiel, Alevi ame obedo dano me doggola a Gercom onwoŋo gwoko.

⁹Lwak rik te bedo miyo motgi kite ame yigi mito kun omio daŋ i yomcuny gin ame gin oyero, pien gin omio motgi baŋ Rwot kede cunygi luŋ. Abaka Daudi daŋ cunye te bedo ayom meicel.

¹⁰Daudi rik te pwoyo Rwot i nyim lwak luŋ ame ocokere kuno, kun kobo ni, “Pwoc myero bed bani, yin Rwot Obaŋa a kwarowa Icrael wan i waŋ,

¹¹Dito kede teko, kwogo kede loc, kede woro obed gire megi, Ama Rwot pien jami luŋ ame tye i polo kede, i lobo, gin luŋ obedo megi, yin gire Ama Rwot, Ama Rwot, yin ame ibedo abaka ame loo jami luŋ aluŋa.

¹²Lonyo kede kwogo ya j bani, dok yin en ame iloogi ducu, Twer kede teko, gin luŋ tye i cini, dok yin ame imio dito kede teko baŋ jo luŋ,

¹³Aman doŋ wan opwoi, yin Obaŋawa, kun opako nyini me kwogo atek meicel.

¹⁴“Man omio an kede jona mom gire otwero miyi ginnoro, pien jami luŋ obedo mot ame oya i bani, doŋ gin ame wan omio bani obedo gire gin ame onwoŋo oya i cirji,

¹⁵Yin ineo, Ama Rwot ni wan ocalo welo ame bedo wot awota i kare me kwowa i lo bo kite ame rik kwariwa obedo timo. Nino ame wan obedo kede i lo bo calo tipo, mom otye i kabedowa i lobo kan,

¹⁶Ama Rwot Obaŋawa, lwak jami man adwoŋ wok-ki ame wan otyeko miyo me gero ot acil me wori, gin luŋ gire oya i cirji, gin luŋ obedo megi.

¹⁷An aneo ni yin Obaŋana itemo cuny dano acel acel dok ipwoo nat ame cunye ler. An atyeko miyo jami man luŋ bani i cuny aler ateteni, dok daŋ atyeko neno i wana ni jo meri ame ocokere kan-ni omio daŋ motgi i cuny ayom meicel, kun nat acel acel kwanyo gin ame yie omito.

¹⁸Ama Rwot Obaŋa a kwariwa Iburaim kede Icaka kede Yakobo, mi kodi cuny kede tam acalo mannono omedde bedo atek i cuny joni nakanaka, kun imiogi daŋ obedo jo ame ogeni.

¹⁹Dok mi woda Culeman obed i cuny me mako cikki i cunye ducu, kede gin ame iciko, kede icwil, kun tio jami ducu, dok daŋ me en ger ot me wori ame an doŋ atyeko yiko jami pire-ni.”

²⁰Daudi te kobo baŋ lwak luŋ ame ocokere ni, “Pwo wunu Rwot Obaŋawu.” Lwak ame ocokere luŋ te cako pwoyo Rwot Obaŋa a kwarogi, gin te ryebere pmy, ote woro Rwot kede abaka daŋ.

²¹Orwo mere, gin te cako ŋolo motgi me yalo Rwot, ote daŋ yale kede mot awaŋa. Gin oyale i mot me twoni tutumia acel, nyogi rommi tutumia acel, itino rommi tutumia acel kun daŋ omio mot amata ame oyik o pi mot awaŋa acel acel, kede mot ocele apipim ame omio pi jo Icrael luŋ.

²²I nino-nono gin rik te bedo i twon yomcuny adwoŋ meicel i kare ame gin onwoŋo otye ocam dok daŋ omatte i nyim Rwot. Gin te keto Culeman wot Daudi tyen me aryo me bedo abakagi, kun owire kede moo me bedo aloc pi Rwot, ote daŋ wiro Jadok kede moo me bedo alamdog Obaŋa.

²³Culeman doŋ te leyo tic a pappere Daudi, kun bedo i wi kom loc a Rwot. En rik te bedo aloc ame kome i gum atek, kun jo Icrael luŋ winyo koppere.

²⁴Odoŋe luŋ, twoni jo atek i lweny, karacel kede awobe abaka Daudi luŋ te cikere me woro abaka Culeman.

²⁵Rwot te miyo nyiŋ Culeman bedo malo meicel baŋ jo Icrael luŋ, dok te miyo Culeman bedo i twon kwogo adwoŋ meicel i loccere ame kato obakki luŋ ame yam onwoŋo oloo jo Icrael.

²⁶Daudi wot a Yece rik oloo jo Icrael kittono.

²⁷En rik oloo jo Icrael pi mwakki pyerarjwen twal. En obedo aloc i Kebron pi mwakki abiro, eka te loc i Jerucalem pi mwakki pyeradek wie adek.

²⁸Daudi oto ame onwoŋo doŋ oteggo atek meicel, kun twon alonyo moro a mom kobere, dokjo woro meicel, eka wode Culeman te leyo kakare acalo abaka.

²⁹Kop i kom kwo a Daudi cakere i tere naka iyi agikki mere tye ocoo i buk me Tekwaro araŋ-piny Camwiri, kede me adwarpiny Natan, kede i me araŋ-piny Gad.

³⁰Gin luŋ onyuto kite ame en oloo kede loccere, kede kite ame rik en tek kede, ginnoro luŋ ame otimere i kome, i kom jo Icrael, kede i kom loc me lobo ocele luŋ.