Read lango 1 Tekwaro 5 Bible Online

1 Tekwaro 5 - lango bible

1 Tekwaro 5

¹Magi gin ikwae a Reuben ame obedo atin kao Icrael. Ento pi timo tim me ipyeda me buto i cipappere, omio en orwenyo dittere oko me bedo atin kao, ote lunyo miyo dittere baŋ Lucepu, nyiŋe mom doŋ te donyo i buk me Tekwaro acalo atin kao,

²Kadi bed itekere a Juda obedo atek meicel ame aloc me Icrael luŋ te ya iye, cite dit me bedo atin kao obedo i wi Lucepu.

³Reuben ame obedo wot Icrael me kao rik tye kede awobe aŋwen: Kanok, Pallu, Kejeron kede Karmi.

⁴Aco awo be a Joel ene, Cemaya, ame wode Gog; Gog ame wode Cimei,

⁵Cimei ame wode Mika; Mika ame wode Reaya; Reaya ame wode Baal,

⁶Baal ame wode Beera. Abaka me Acuria ame nyiŋe Tiglat-pilecer rik obin omako Beera oko te tero oko iyi opii, kun onwoŋo en ame rik obedo atel a jo Reuben.

⁷Wati mere ame lubere i doggola i doggola i kare ame ocoo nyiŋ jo a Reuben piny, gin ene: Jeyel, Jekaria,

⁸Bela wot Ajaj, ame papa a Cema, ame oya i doggola a Joel. Atekere man rik obedo i Aroeor i lobo ame tye tutuŋ malo me Nebo kede Baal-meon.

⁹Gin rik onwoŋo tye kede lwak lim abup meicel i lobo Gilead, mannono omio gin obedo i lobo luŋ adok tutuŋ tim ame tye tutuŋ kide tuno kede naka i ŋet kulo Epurate.

¹⁰I kare a Caulo gin rik obedo lweny i kom jo Kagrit, ame gin te nekogi oko i lweny; eka gin te cako bedo i lobogi ame tye tutuŋ kide me Gilead.

¹¹Ikwae a Gad rik obedo i lobo Bacan tuno kede naka i Caleka, kun otenne i jo Reuben.

¹²Joel en ame rik ogeo bedo adwoŋgi ame neye, te bedo doŋ i Bacan,

¹³Watigi ocele ame olubere i ot i ot ene: Maeulam, Ceba, Jorai, Jaean, Jia kede Eber.

¹⁴Jo man rik obedo ikwae Abikail, wota a Kuri, wot a Jaroa, wot a Gilead, wot a Micael, wot a Jeci, wot a Jado, wot a Buj,

¹⁵Aki wot Abdiel, akwar Guni, en rik atel me atekere man,

¹⁶Gin rik obedo i Gilead, kede i Bacan, i paco luŋ ame tye i ŋetgi kuno, kede i lobo luŋ ame onwoŋo obedo me kwayo limgi i Caron.

¹⁷Man en jo ame rik ocoo nyiŋgi i buk me nyiŋ kwari a jo Icrael i kare me loc abaka Yocam me Juda kede Jeroboam, abaka me Icrael.

¹⁸I kom atekere a Reuben, Gad, kede nucu me atekere Manace ame onwoŋo bedo tuŋ kide, onwoŋo rik tye iye twoni jo atek i lweny, ame opwonyo meicel i tic kede kwot, pala romo kede bayo atero, ame romo tutumia pyeraŋwen wie aŋwen, kede mia abiro kede pyerabicel nono,

¹⁹Gin rik te cako lweny i kom Jetur, Napic, kede Nodab, ame gin luŋ obedo jo me itekere a Kagri.

²⁰Gin rik obedo jo ame geno Rwot, omio gin ocwao kwacgi baŋ Obaŋa me konyogi i lweny, Obaŋa daŋ te winyo kwacgi, te miyogi loyo jo-nono oko karacel kede jo ame onwoŋo rik oribere kedgi.

²¹Gin rik te yako jami magi i baŋ okworgi-nono, inaga ame romo tutumia pyerabic, rommi tutumia mia aryo kede pyerabic, kede kana tutumia aryo. Oyako daŋ cirikale ame romo tutumia mia acel,

²²ote neko daŋ lwak jo apol meicel, pien monygi rik obedo mony a Rwot. Gin rik te bedo i lobo-nono tuno naka i kare ame oterogi kede iyi opii.

²³Jo me Manace ame onwoŋo tye tutuŋ kide te bedo i lobo me Bacan, tuno kede i Baal-kermon, Cenir, kede i kidi me Kermon.

²⁴Magi nyiŋ jo ame rik obedo odoŋe me atekere me doggola a kwarigi: Eper, Ici, Eliel, Ajriel, Jeremia, Odavia, kede Jadiel. Gin luŋ rik obedo twoni jo ame tek meicel i lweny, ame neye meicel i doggola a kwarigi.

²⁵Ento jo rik te cako timo bal i kom Obaŋa a kwarogi, kun oweko wore oko ote lunyo woro obane a rok ocele ame obanagi onwoŋo oryemo oko i lobo-nono.

²⁶Mannono te miyo Obaŋa tugo cuny Pul abaka me Acuria ame olwoŋo daŋ ni Tiglat-pilecer, terogi oko iyi opii. En otero atekere a Reuben, Gad kede atekere a Manace ame onwoŋo tye tuŋ kide, te terogi i Kala, Kabor, Kara, kede i kulo me Gojan, gin te bedo kuno tuno naka atot tin.