Read lango 2 Tekwaro 10 Bible Online

2 Tekwaro 10 - lango bible

2 Tekwaro 10

¹Rekoboam rik te wot i Cekem kan ame jo luŋ ocokere iye me kete i kom me bedo abaka.

²Jeroboam wot a Nebat owinyo pire i kare ame en onwoŋo pwod tye i Miciri kan ame en rik oriŋo iye pi riŋo abaka Culeman, en te ya oko i kuno te dwogo oko.

³Jo Icrael onwoŋo ocwao kwena me wot lwoŋe, eka Jeroboam karacel kede jo Icrael luŋ ame ocokere te kobbi Rekoboam ni,

⁴“Pappi rik otio kedwa agwa meicel. Aman doŋ ba, yin myero idwok tic apek ame pappi rik omiowa, kede yec apek ame en oketo i komwa, odok piny, wan obino bedo omironi.”

⁵Rekoboam te gamo ni, “Koŋ idok wunu iwot ityek wunu nino adek, ite dwogo wunu baŋa kan.” Lwak te dok oko ceŋ.

⁶Abaka Rekoboam te cako penyo tam i baŋ jo oteggo ame rik obedo tic i pappere acalo omi-tam, kun en penyogi ni, “Tam aŋo ame imia wunu me dok i peny a lwak?”

⁷Gin te kobbe ni, “Ka ce kica bino maki i kom jo man, ite kweyo cunygi kun i kobbigi kop abeco, gin bino bedo omironi nakanaka.”

⁸Ento en mom oketo cunye i tam ame jo oteggo-nono omie. En dok te cako penyo tam i baŋ olwagi mere ame onwoŋo bedo kede.

⁹En openyogi ni, “Kara tam aŋo ame imia wunu me dok i peny a lwak, ame okwaa ni, myero ajwik yecgi dok ayot?”

¹⁰Gin te gamo ni, “Yin myero ikobbigi kit man ni, ‘Nyako ciŋa acel dwoŋ kato pyer pappa oko.

¹¹An abino timo kit man: Pappa yam omiowu yec apek meicel, mega bino bedo apek akato me a pappa oko, Pappa rik pwodowu i del, cite an abino pwodowu i gin ame lit bala kwir yib yit.’ ”

¹²I ŋe nino adek, Jeroboam karacel kede jo Icrael luŋ te dwogo baŋ abaka Rekoboam, kite ame rik ocikogi kede, kun kobo ni, “Dwog wunu baŋa kan i ŋe nino adek.”

¹³Abaka te cako dok i peny a lwak kede gero, kun mom oye lubo tam ame odoŋe oteggo omie.

¹⁴En okobbi lwak kite ame olwagi mere omie kede tam, kun kobbigi ni, “Pappa rik omio iyeo wunu yec apek, an abino medo bedo apek ame kato mege. Pappa rik pwodowu kede del, ento an abino pwodowu i gin ame lit kato kwir yib yit oko.”

¹⁵En abaka rik okwero winyo kop a lwak pien Rwot ikome en omio otimere amannono, me wek kop ame rik eciko baŋ Jeroboam wot a Nebat ocobere kakare kite ame rik emio Akija dano me Cilo okobo kede baŋ Jeroboam wot a Nebat.

¹⁶I kare ame jo Icrael oneno ni abaka mom oye winyo kokogi gin te kobbi abaka ni, “Wan giwa mom otye kede dulloro ame obedo megwa i kom Daudi. Wan giwa mom obino nwoŋo ginnoro i baŋ wot a Yece. Dok giwu i kemawu, wun jo Icrael! Nen doŋ odi keni yin Daudi!” Jo Icrael doŋ te cako ket oko, kun ŋat acel acel dok i paco mere.

¹⁷Rekoboam te doŋ loyo ka jo Icrael ame onwoŋo bedo i Juda.

¹⁸Abaka Rekoboam te cwayo Adoram adwoŋ ame onwoŋo rik loo tic me eroni, cite jo Icrael ote nanapo en i gweŋe ote neke oko. Man omio abaka Rekoboam te ru ya oko yito i wi gadigadi lwennyere, te riŋo naka i Jerucalem,

¹⁹Cakere i karenono jo Icrael te cako jem oko i kom oloc ame ya i ot a Daudi naka atot tin.