Read lango 2 Tekwaro 11 Bible Online

2 Tekwaro 11 - lango bible

2 Tekwaro 11

¹Kare ame Rekoboam odwogo cen i Jerucalem, en ocako coko jo ame oyero ame romo tutumia acel kede pyeraboro iyi atekere a Juda kede Benjamin me wot lweny i kom jo Icrael me dwoggo jo luŋ i te loc a Rekoboam.

²Cite kop a Rwot te bino baŋ dano Obaŋa ame nyiŋe Cemaya, kun kobbe ni,

³“Wot ikobbi Rekoboam wot a Culeman, ame obedo abaka me Juda, kede jo luŋ me doggola a Juda kede me doggola a Benjamin ni,

⁴‘Rwot okobo ni myero kur iwot ilweny wunu i kom omegowu ame gin obedo jo Icrael. Ŋat acel acel myero dok i paco mere, pien gin ame otimere-nono Rwot en ame mio timere.’ ” Gin luŋ ote winyo kop a Rwot ote dok oko cen, kun ŋat acel acel dok i paco mere, Mom dok ote wot lweny i kom Jeroboam.

⁵Rekoboam obedo i Jerucalem, ogero boma ame ocecelo me mony i Juda.

⁶En ogero Beterekem, Etam, Tekoa,

⁷Bet-jur, Coko, Adullam,

⁸Gat, Mareca, Jip,

⁹Adoraim, Lakic, Ajeka,

¹⁰Jora, Aijalon, kede Kebron, gin luŋ boma ame ocecelo atek ame onwoŋo tye i Juda kede i Benjamin.

¹¹En oyiko cellere luŋ obedo atek, oketo odoŋe mony i yigi, te kano iye cam, moo kede koŋo olok,

¹²Te daŋ keto kwode kede toŋi i boma luŋ, ame te miyogi bedo atek meicel. Mannono kite ame Juda kede Benjamin obedo kede i te loccere.

¹³Olamdog kede jo Levi ame rik onwoŋo tye iyi Icrael luŋ, te bino baŋe luŋ, bino bedo i ŋete.

¹⁴Jo Levi onwoŋo oweko bar me kwatgi oko kede kan ame gin onwoŋo obedo iye, ote wot i Juda kede i Jerucalem, pien Jeroboam kede awobe mere onwoŋo oryemogi oko i tic me bedo olamdog a Rwot.

¹⁵Jeroboam te keto olamdoggere ame en oyero me tic i ka woro jogi ame tye malo i wi kiddi, kede me tic baŋ jogi me tim ame calo nyogi dyegi, kede baŋ cal twoni ame en otio,

¹⁶Jo ame rik onwoŋo cunygi tye i woro Rwot Obaŋa a jo Icrael olubo yo olamdog a Rwot, kun oya i atekere luŋ me Icrael, owoto i Jerucalem me wot yalo Rwot ame obedo Obaŋa a kwarigi,

¹⁷Gin te miyo loc me Juda bedo atek meicel, mannono te miyo Rekoboam wot a Culeman bedo atek abono ginnoro ayele pi mwakki adek, pien gin onwoŋo obedo lubo kite a Daudi kede Culeman pi mwakki adekkono.

¹⁸Rekoboam te nyomo Makalat nyaka a Jerimot wot a Daudi. Tota a Makalat obedo Abikairi nyaka Eliab wot a Yece.

¹⁹Makalat te nywalo itino awobe magi baŋ Rekoboam: Jeuc Cemaria, kede Jakam.

²⁰Icennere dok te nyomo Maaka nyaka Abicalom ame te nywalle Abija, Atai, Jija, kede Celomit.

²¹Rekoboam rik onwoŋo maro Maaka nyaka Abicalom kato monnere luŋ karacel kede mon aŋeca. En rik onyomo mon apar wie aboro kede mon aŋeca pyerabicel twal; onywalo awo be pyeraryo wie aboro kede anyira pyerabicel.

²²Rekoboam rik te keto wode Abija ame obedo wot a Maaka me bedo ŋat ame loo omego mere luŋ, pien rik onwoŋo mito kette me bedo abaka.

²³En obedo tic i ryeko, opoko awobe mere mogo i dul lobo apapat ame tye i Juda kede Benjamin; oketogi i boma ame ocecelo atek, kun miogi cam adwoŋ, dok daŋ te nyommigi mon luŋ.